Energetika Nazirliyində Rumıniya Hökumətinin Baş katibi Marian Neacșunun rəhbərlik etdiyi nümayəndə heyəti ilə keçirilən görüş zamanı “yaşıl enerji”nin Azərbaycandan Qara dəniz vasitəsilə Avropaya tranziti məsələləri ətrafında müzakirələr aparılıb.
Energetika nazirinin müavini Samir Vəliyev Azərbaycan və Rumıniya arasında əlaqələrin strateji tərəfdaşlıq səviyyəsində olduğunu bildirib və enerji sahəsində gündəliyin geniş olduğunu vurğulayıb. Təbii qaz, elektrik enerjisi, xüsusilə bərpaolunan enerji sahəsində əməkdaşlıq imkanları barədə danışıb.
Görüş zamanı ötən ilin dekabrında Buxarestdə imzalanmış “Azərbaycan Respublikası, Gürcüstan, Rumıniya və Macarıstan hökumətləri arasında “yaşıl enerji”nin inkişafı və ötürülməsi sahəsində strateji tərəfdaşlıq haqqında Saziş”in icrası məqsədilə 4 ölkənin nazirləri arasında gerçəkləşən ilk iclasda qəbul edilmiş qərarlardan irəli gələn məsələlər nəzərdən keçirilib. Tədbirdə, həmçinin ənənəvi və bərpaolunan enerji sahəsi ilə yanaşı, enerji səmərəliliyi və enerji məsələlərinin tənzimlənməsi kimi istiqamətlərdə də əməkdaşlığın inkişaf etdirilməsinin əhəmiyyəti vurğulanıb.
Görüşdə Energetika Nazirliyi, nazirlik yanında Bərpa Olunan Enerji Mənbələri Dövlət Agentliyi, nazirliyin tabeliyində Enerji Məsələlərini Tənzimləmə Agentliyi, “Azərenerji” ASC və “Azərişıq” ASC-nin nümayəndələri iştirak ediblər.
“Xalq qəzeti”
