Paris Yay Paralimpiya Oyunlarında Azərbaycanın parataekvondo komandası tarixi nəticə əldə edib.
Yarışın 2-ci günündə finaladək bütün rəqiblərini mübarizədən kənarlaşdıran İmaməddin Xəlilov (K44, 70 kq) həlledici mərhələdə Türkiyə təmsilçisi Fatih Çəliklə qarşılaşıb. Əzmkar mübarizə nəticəsində rəqibə 15:2 hesabı ilə qalib gələn idmançımız parataekvondo tarixində ilk dəfə paralimpiya çempionu adını qazanıb. Bu, həm də komandamızın mötəbər yarışda ilk qızıl medalı olub.
Növbəti gün – avqustun 31-də komandamızın daha 4 üzvü –paraüzgüçülər Raman Salei, Könül Süleymanova, parataekvondoçu Əbülfəz Abuzərli (K44, 80 kq), paraatıcı Aybəniz Babayeva mübarizəyə qoşulublar.
Azərbaycanın ən titullu paraüzgüçüsü Raman Salei S12 kateqoriyasında 100 metr məsafəyə arxası üstə üzmə yarışında qüvvəsini sınayıb. Finişə 1 dəqiqə 1,29 saniyə ilə birinci çatan paraüzgüçü finala vəsiqəni təmin edib. Bu mərhələdə isə idmançımız 1:00.67 nəticə ilə gümüş medal qazanıb.
Onun komanda yoldaşı Könül Süleymanova S2 kateqoriyası üzrə 50 metr məsafəyə arxası üstə üzməkdə mübarizə aparıb. Könül Fransa paytaxtında ikinci cəhdində 1:52,64 dəqiqəlik göstərici ilə qrupda 5-ci, yekun siyahıda 11-ci olub. Bununla da Süleymanova Fransa paytaxtında çıxışını başa vurub. O, eyni kateqoriya və üsulla 100 metr məsafəyə üzməkdə öz qrupunda 5-ci olub.
Dünən parataekvondoçu Əbülfəz Abuzərli 1/8 final çərçivəsində ilk qarşılaşmada Allain Qanapinə (Filippin) 12:9 hesabı ilə qalib gələrək 1/4 finala yüksəlsə də növbəti görüşlərdə uduzaraq çıxışlarını dayandırıb.
Azərbaycan millisinin daha bir üzvü – paraatıcı Aybəniz Babayeva (P2) isə 10 metr məsafəyə atəşaçma yarışında məharətini nümayiş etdirib. 542 xal toplayan təmsilçimiz təsnifat mərhələsində 14-cü yeri tutub. Finala vəsiqə qazanan 8 iştirakçı arasına düşə bilməyən idmançımız mübarizəni dayandırıb.
Bununla da, komandamızın qazandığı medalların sayı 3-ə çatıb. Xatırladaq ki, yarışın 1-ci günündə parataekvondoçumuz Sabir Zeynalov bürünc medal qazanmışdı.
Qeyd edək ki, Azərbaycan sentyabrın 8-dək davam edəcək yarışda 7 növ üzrə 18 idmançı ilə təmsil olunur.
Leyla QURBANOVA
XQ
