Mən burada təəccüblü heç bir hal ilə qarşılaşmamışam. Ölkənizə gəlib seçkiləri müşahidə etməkdən xeyli məmnunam.
Bunu AZƏRTAC-ın bölgə müxbirinə açıqlamasında Şuşada Milli Məclisə növbədənkənar seçkilərdə səsvermə prosesini izləyən Britaniya Lordlar Palatasının üzvü Qurban Huseyin bildirib.
“Burada müşahidə etdiyim seçkilər Britaniya Krallığındakı seçki sistemi və proseduralarla oxşardır. Seçicilər ilk olaraq məntəqələrə gəlir, sənədləri yoxlanıldıqdan sonra onlara seçki bülleteni verilir”, - deyə o əlavə edib.
Qeyd edək ki, ilk dəfədir Azərbaycanın bütün suveren ərazilərində Milli Məclisə seçkilər keçirilir. Növbədənkənar seçkilər 6478 seçki məntəqəsində təşkil olunur. Onlardan 6343-ü daimi, 135-i isə müvəqqətidir.
Budəfəki seçkilərdə 125 yer uğrunda 990 namizəd mübarizə aparır. Namizədliyi qeydə alınan 305 nəfər 25 siyasi partiyanın nümayəndəsidir.
Parlament seçkilərində 6 milyon 421 min 960 vətəndaş səsvermə hüququndan istifadə edə biləcək. İşğaldan azad olunmuş ərazilərdə səsvermə hüququna malik 42 mindən artıq seçicinin konstitusion hüquqlarını reallaşdırmaları üçün 54 seçki məntəqəsi yaradılıb.
Seçki günü 18 yaşı tamam olan seçicilərin sayı 374, Milli Məclisə seçkilərdə səsvermədə ilk dəfə iştirak edəcək seçicilərin sayı isə 51 min 141 nəfərdir.
Seçkiləri izləmək üçün 51 beynəlxalq qurum və 69 ölkədən olmaqla, 598 beynəlxalq müşahidəçi akkreditasiyadan keçib. Yerli müşahidəçi kimi isə 112 min 749 nəfər qeydə alınıb.
Ölkə ərazisində 1000 seçki məntəqəsində veb-kameralar quraşdırılıb.
Səhər 08:00-da başlayan səsvermə saat 19:00-da başa çatacaq.
