Bu gün, yəni yarışın ilk günündə parataekvondoçumuz Sabir Zeynalov dayanq üzərinə çıxacaq. O, K44 kateqoriyasında 58 kiloqram çəki dərəcəsində mübarizə aparacaq. Paraüzgüçümüz Könül Süleymanova isə S2 kateqoriyasında 100 metr məsafə üzrə arxası üstə üzmə yarışlarına qatılacaq. Daha bir təmsilçimiz Cahan Musayev isə parakamandan oxatma üzrə yarışda mübarizə aparacaq. Hər 3 təmsilçimiz çıxışa təsnifat mərhələsindən başlayacaq.
Dünya Taekvondo Federasiyasının prezidenti Çunqvon Ço oyunlar ərəfəsində fikirlərini bölüşərkən Bakıda keçirilən parataekvondo üzrə ilk dünya çempionatını xatırlayıb:
– İnanıram ki, 2019-cu ildə Bakıda keçirilən parataekvondo üzrə ilk Dünya çempionatını hamınız xatırlayırsınız. Mundiala 15 ölkənin komandası gəlmişdi. Biz onların sayını artırmaq üçün çox iş görmüşük. Parataekvondo 3 il əvvəl Tokioda keçirilən oyunlarda debüt etdi. Yaponiyada 38 ölkədən idmançılar iştirak edirdilər. Paris Olimpiadasında isə 52 ölkədən, ümumilikdə 121 iştirakçı medallar uğrunda yarışacaq.
Ümumilikdə isə komandamızın heyətində 19 idmançı 7 növdə mübarizə aparacaq. Azərbaycan yığmasını Paralimpiadada Sabir Zeynalovla (58 kq) yanaşı, İmaməddin Xəlilov (70 kq) və Əbülfəz Abuzərli (80 kq) təmsil edəcəklər. Paraatletika üzrə Rüfət Rəfiyev (F36), Oloxan Musayev (hər 2-si nüvə itələmə, F55), Səid Nəcəfzadə (T12), Orxan Aslanov (hər 2-si uzunluğa tullanma, T13), Lamiyə Vəliyeva (100 və 400 metr məsafəyə qaçış) güclərini sınayacaqlar.
Paraüzgüçülükdə Könül Süleymanova (50 və 100 metr məsafələrə arxası üstə üzmə, S2), Raman Salei (50 və 100 metr məsafələrə sərbəst üsulla üzmə, S12)
Vəli İsrafilov (100 metr məsafəyə brass üsulu ilə üzmə, SB13) medallar qazanmağa çalışacaqlar. Paracüdo üzrə Dürsədəf Kərimova (+70 kq, J2)
Xatirə İsmiyeva (+70 kq, J1), İlham Zəkiyev (+90 kq, J1) Paris tatamisini fəth etməyə səy göstərəcəklər. Kamran Zeynalov, Aybəniz Babayeva paraatıcılıq, Cahan Musayev parakamandan oxatmada, Ceyhun Mahmudov (54 kq) parapauerliftinq üzrə bacarıqlarını nümayiş etdirəcəklər.
Beləliklə, komandamız ötən yarışlarda olduğu kimi, XVII Paralimpiya Yay Oyunlarında da öz potensialından maksimum istifadə edib, yüksək nəticə qazanmaq əzmindədir.
Qeyd edək ki, Azərbaycan komandası bir neçə gün bundan əvvəl başa çatmış Paris Yay Olimpiya Oyunlarında 2-si qızıl olmaqla 7 medal qazanıb.
Leyla QURBANOVA
XQ
.jpg)
