O, Parisə ən yüksək pilləni də qazanmaq üçün gedəcək

Dünyanın ən böyük idman hadisəsi – Yay Olimpiya Oyunlarının açılışına 15 gün qaldı. İyulun 26-dan avqustun 11-dək Parisdə keçiriləcək olimpiadada ölkəmizi 15 idman növü üzrə 17 proqramda 48 idmançı təmsil edəcək. Ötən olimpiadalarda olduğu kimi, budəfəki mötəbər Oyunlarda da komandamızın heyətində güclü idmançılar yer alıb və onların hər biri medal qazanmağa iddialıdır.

Paris Olimpiadasında me­dal ümidlərimizdən biri də, cüdo üzrə dünya Olimpiya reytinqinin lideri Hidayət Hey­dərovdur. 

Hidayət Heydərov 1997-ci ildə Qazaxıstan Respublika­sının Karaqanda şəhərində dünyaya göz açıb. Əslən Göy­çayın Alxasava kəndindəndir. 3 yaşında olarkən ailəsi Bakı­ya köçüb. 6 yaşda ikən Tərlan Həsənovun rəhbərliyi altında ilk məşqlərinə başlayıb. 

Əzmkarlığı ilə diqqət çəkən Hidayət Heydərov ki­şilər arasında ilk böyük uğu­runu – Avropa çempionluğunu 2017-ci ildə qazanıb. Növbəti illərdə daha 3 dəfə qitədə rəqiblərindən güclü olub. Dün­ya çempionatlarında 2018-2019 və 2022-ci illərdə bürünc medala sahib olsa da, qızıl medal arzusu bu il gerçəklə­şib. 

Şəxsi məşqçisi Tərlan Həsənov qəzetimizə açıqla­masında bu barədə danışdı: 

– Bir neçə ay bundan əvvəl mənə yanıqlı-yanıqlı şikayət etdi ki, 26 yaşı var, amma hələ də dünya çempionu ola bilməyib. Onu sakitləşdirib, mütləq bu titulu qazanacağı­na inandığımı bildirdim. Bu il Abu-Dabidə dünya çempionu olanda evdə idim. Göz yaşla­rı içərisində onun Azərbaycan Himnini oxuduğunu ekranda görəndə, sevincimdən mən də ağladım. Ümumiyyətlə, Hidayət uşaqlıqdan əzmkar­lığı ilə yanaşı, emosionallığı, inadkarlığı ilə digərlərindən fərqlənirdi. 6 yaşdan rəhbəri olduğum “Kanokan TT” klu­bunda cüdo məşqlərinə başla­yıb. Onun enerjisi bitib-tükən­mirdi. Məşqlərdən doymurdu. Nə qədər yük vermişiksə, dö­züb, heç vaxt şikayət etməyib. Onu da qeyd edim ki, uduz­maq ona çox pis təsir edirdi və indiyədək də belədir. 

İlk beynəlxalq yarışda – 2007-ci ildə Xarkovda Uk­raynanın birinci Olimpiya mü­kafatçısı Nokolay Novikovun adına keçirilən turnirin finalın­da ona qarşı ədalətsizlik oldu. Yerli idmançıya uduzduruldu və gümüş medal aldı. Onun rəqibi Novikovun nəvəsi idi. Final qarşılaşmasından son­ra diz üstə oturub ağlayır və yenidən güləşmək istədiyini tələb edirdi. Hidayət nadir hal­larda yarışlarda gümüş medal qazanıb. Əksər vaxtlarda bü­rünc, yaxud qızıl medala sa­hib olub. Finalda həmişə qızıl uğrunda güləşib. 

Tərlan müəllim “Hidayət­dən Paris Oyunlarında han­sı nəticəni gözləyirsiniz”, – sualına belə cavab verdi:

– Ondan qızıl medal göz­ləyirəm. Hidayət ümidimizi həmişə doğruldub. Ötən ilin dekabr ayında Tokioda “Böyük dəbilqə” yarışının finalında 5 qat dünya çempionu Soiçi Ha­şimotonu məğlub edərək qızıl medal aldı. Həmin idmançı­ya karyerası ərzində 6 dəfə məğlub olmuşdu. Bu, inamlı qələbə idi. Bu il Hidayəti çox önəmli bir şans gözləyir. Onun hədəfi Olimpiya çempionluğu­dur. Amma o, olimpiadadan sonra karyerasını bitirməyə­cək və uğurlarına davam edə­cək. 

Azərbaycan Cüdo Fede­rasiyasının vitse-prezidenti, 73 kiloqram çəkidə Olimpiya çempionu olmuş Elnur Məm­mədli federasiyanın saytına açıqlamasında yetirməsinin çox güclü potensialının oldu­ğunu bildirib:

– Hidayətlə oxşar cəhət­lərimiz çoxdur. O, düşünən­də artıq nə demək istədiyini bilirəm. Tatamidə mübarizə zamanı məndə də çılğınlıq, emosiya var idi. Amma Hi­dayətdə bu, daha qabarıqdır. Amma onda elə xüsusiyyət­lər var ki, məndən üstündür və özünə də deyirəm. Məndə bu qədər enerji olsaydı, bəlkə də, 3 dəfə Olimpiya çempio­nu olardım. O, fasiləsiz 25-30 dəqiqə güləşə bilir. Mən isə 5-6 dəqiqədən sonra yorulur­dum. Bir özəlliyi də odur ki, çox diqqət sevir və bununla yaşayır, güləşir. 

Hidayət, həm də prinsi­pial idmançıdır. Kosovoda keçirilən Avropa kuboku yarı­şında hakim finalda haqsızlıq edib, Hidayəti yerli idmançıya uduzdurdu. Son dünya çempi­onatında Hidayət dedi ki, kaş kosovolu ilə görüşəydim. Tale elə gətirdi ki, elə ilk görüşdə mübarizəsi kosovolu idmançı ilə oldu. Görüşdən qabaq prin­sipiallıqla “Onu yaxşıca döyə­cəyəm”, – dedi və rəqibi üzə­rində inamlı qələbə qazandı. 

Hidayət Heydərov dünya çempionatında bütün rəqib­lərini, o cümlədən yaponiyalı Tatsuki İşiharanı da məğlub edərək, cüdo tariximizdə 11 ildən sonra dünya çempionatı­nın qızıl medalına sahib oldu. Onu da qeyd edək ki, istedad­lı tatami ustası bu il həm də 4-cü Avropa çempionluğunu qazanıb. İndi idmançının me­dal kolleksiyasında qatıldığı bütün böyük turnirlərin baş mükafatı var. Çatışmayan yal­nız “Olimpiya qızılı”dır. Ümid edirik ki, Hidayət Heydərov Paris Olimpiadasında da fəxri kürsünün ən yüksək pilləsində yer alacaq. 

Leyla QURBANOVA
XQ