Bakıda Türk Dövlətləri Təşkilatına üzv və müşahidəçi ölkələr arasında ötən 2 gün ərzində davam edən “Üzgüçülük hamı üçün” layihəsi çərçivəsində turnir maraqlı mübarizə ilə yadda qaldı. Həvəskar idmançıların iştirak etdiyi yarış su idmanı həvəskarları üçün əsl bayrama çevrildi.
Bakı Su İdmanı Sarayında təşkil olunan ənənəvi yarışda əvvəlcə iştirakçı ölkələrin təmsilçilərinin paradı oldu. Turnirin açılış mərasimindən sonra isə mübarizəyə start verildi. Artıq 2-ci ildir həyata keçirilən “Üzgüçülük hamı üçün” layihəsi çərçivəsində budəfəki turnirdə Azərbaycanla yanaşı, Türkiyə, Qazaxıstan və Şimali Kipr Türk Respublikası ölkələrindən 15 müxtəlif yaş kateqoriyasında (9 yaşdan aşağı, 9-10 yaş, 11-12 yaş, 13-14 yaş, 15-16 yaş, 17-19 yaş, 20-24 yaş, 25-29 yaş, 30-34 yaş, 35-39 yaş, 40-44 yaş, 45-49 yaş, 50-54 yaş, 55-59 yaş və 60 yaşdan yuxarı) idmançılar iştirak etdilər.
Gənclər və idman naziri Fərid Qayıbov jurnalistlərə müsahibəsində ilk yarışa yalnız ölkəmizdən iştirakçıların qatıldıqlarını, bu dəfə isə beynəlxalq status daşıdığını bildirdi:
– Yarış artıq beynəlxalq status daşıyır və burada bir neçə ölkədən idmançılar iştirak edirlər. İnanırıq ki, növbəti illərdə iştirakçı ölkələrin sayı daha da artacaq.
Nazirin sözlərinə görə, yarışın təşkilində əsas məqsəd insanların sağlamlığının təmin edilməsidir. Qeyd edildi ki, ölkəmizdə üzgüçülüklə yanaşı, digər idman növləri üzrə kütləvi yarışlar keçirilir. Belə yarışlarda müxtəlif yaş qruplarından olan insanlar, hətta 60 yaşdan yuxarı olan şəxslər də iştirak edirlər ki, bu da sevindirici məqamdır. Bu cür turnirlərə aşağı yaş qruplarından uşaqlar da qatılırlar. Artıq orta məktəblərdə üzgüçülük idman növünə maraq oyatmaq üçün məşqçilər tərəfindən seçim işləri aparılır. Orada özünü göstərən uşaqlar gələcəkdə əsas yarışlara qatılırlar. Məqsəd gəncləri idmana cəlb etməkdir.
Şimali Kipr Türk Respublikasının Su İdmanları Federasiyasının prezidenti Mustafa Abitoğlu isə açıqlamasında belə bir layihənin təşkilinin müsbət addım olduğunu dedi. O bildirdi ki, ikinci Vətəni olan Azərbaycana səfər etdiyi üçün xoşbəxtdir:
– Hisslərimi sözlə ifadə etmək çətindir. Azərbaycanda olmaq möhtəşəm bir hissdir. Çox həyəcanlıyıq. Mən dövlətimizin və xalqımızın sevgisini bura gətirdim. Möhtəşəm təşkilatçılıq üçün Gənclər və İdman Nazirliyinə və Üzgüçülük Federasiyasına təşəkkür edirəm.
60 yaşdan yuxarı qadınlar arasında fərqlənən Nesrin Arslan Bakıda yarışda iştirakdan məmnun olduğunu bildirdi. Su İdman Sarayında ilk dəfə olduğunu bildirən N.Arslan burada qələbə qazanacağına əmin olduğunu dedi:
– Hər kəsin öz potensialından tam istifadə etməsi üçün lazımi şərait yaradılıb. Bakı Su İdmanı Sarayı möhtəşəmdir. 7 yaşdan üzgüçülüklə məşğul oluram. 60 ildir üzürəm. Bədən tərbiyəsi müəlliməsiyəm və ixtisasım üzgüçülükdür. İndiyədək minlərcə uşağa bu idman növünün sirlərini öyrətmişəm. Açıq dəniz yarışlarında da iştirakımı davam etdirirəm. Türk dünyasının bütün gənc qadınlarını üzgüçülüklə məşğul olmağa həvəsləndirirəm.
Yarışlara tamaşa edən balaca uşaqlar arasında bu idman növlərinin sirlərini öyrənməyə başlayan çoxlu həvəskarlar var idi. Onlardan biri – Dinarə Ağayevanın 6 yaşı var:
– Üzgüçülüyü çox sevirəm. Əsasən, balaca uşaqların yarışı xoşuma gəldi. Mən də üzmək istəyirəm.
Sevindirici məqamlardan biri də bu balaca tamaşaçıların hər birinin üzmək arzusunun böyük olması idi. Son vaxtlar bu idman növü üzrə kütləvi yarışların təşkili və təmsilçilərimizin beynəlxalq arenalarda qazandıqları nailiyyətlər ölkəmizdə üzgüçülüyün kütləvi hal almasının bir daha təsdiqidir.
Gənclər və İdman Nazirliyi, Üzgüçülük Federasiyasının birgə əməkdaşlığı ilə təşkil olunan “Üzgüçülük hamı üçün” layihəsi çərçivəsində turnir də bu idman növünün kütləviliyinin, populyarlığının artırılması istiqamətində daha bir önəmli tədbir kimi yadda qaldı.
Leyla QURBANOVA
XQ
