Azərbaycan komandası Paris Yay Olimpiya Oyunlarına daha bir lisenziya qazanıb. Bu nüfuzlu yarışa növbəti vəsiqəni batut gimnastikası üzrə Azərbaycan millisinin üzvü Selcan Mahsudova əldə edib. 

Bu, Azərbaycanın gimnastika ta­rixində batut gimnastikası üzrə əldə etdiyi ilk lisenziyadır. Bu növdə milli­mizin baş məşqçisi Vladimir Şulikin Azərbaycan gimnastika məktəbinin yetirməsi olan Selcan Mahsudovanın “Paris-2024”ə vəsiqə qazanmasını qü­rurverici hal adlandırıb: 

– Azərbaycan gimnastika məktəbinin yetirməsi olan Selcan Mahsudovanın bu nüfuzlu yarışa lisenziya qazanması bizi çox qürurlandırır. Bu gimnastla uzun yol qət etmişik. Azərbaycanda 10 ildir ki, ba­tut gimnastikası inkişaf edir və mən şa­dam ki, bu müddət ərzində biz belə yaxşı nəticə əldə etmişik. Azərbaycan Gimnas­tika Federasiyasının prezidenti Mehriban xanım Əliyevaya bizə göstərilən dəstəyə, diqqətə və idmançıların hazırlanmasına yaradılan şəraitə görə dərin minnətdarlı­ğımı bildirirəm. Bu dəstək olmasaydı, biz lisenziya qazana bilməzdik. 10 il ərzində bu gimnastika növünü inkişaf etdirmək və lisenziya qazanmaq böyük və əhəmiyyət­li bir işdir. Hamı bizi təbrik edir. Olimpiya lisenziyasını qazandığımızı hələ də tam dərk etməmişəm. İndi hər şey yenidən başlayır, arxayınlaşmamalıyıq. Qarşıda bizi Avropa çempionatı gözləyir. Selcanın yüksək idman formasında olmasına çalı­şacağıq. İndi bütün diqqətimizi Olimpiya Oyunlarına hazırlığa yönəldəcəyik.

Selcan Mahsudova Paris Oyunla­rına lisenziya qazandığı üçün çox se­vindiyini deyib. O qeyd edib ki, Olim­piya Oyunlarına lisenziya qazanmağı qarşıya məqsəd qoymuşdu:

– Bu, mənim başlıca arzum idi. Se­vinirəm ki, əziyyətim yerdə qalmadı və arzum həyata keçdi. Ümid edirəm ki, qazandığım nəticə gəncləri də ruhlandı­racaq və onlara örnək olacaq. Gəncləri­mizin də gələcəkdə bu növ üzrə Olimpiya Oyunlarında ölkəmizi təmsil edəcəklərinə inanıram.

İdmançı qarşıdakı Avropa çempio­natında medal qazanmaq üçün yüksək şanslarının olduğunu deyib. Bildirib ki, Olimpiada ərəfəsində keçiriləcək qitə çempionatında yüksək nailiyyət qaza­naraq bayrağımızı dalğalandırmaq onun böyük arzusudur. 

Qeyd edək ki, daha əvvəl bədii gim­nast Zöhrə Ağamirova da olimpiya li­senziyasına sahib çıxıb. Bununla da, Azərbaycan komandasının Paris Olim­piadasına qazandığı rəsmi lisenziyaların sayı 11-ə çatıb. 

L.QURBANOVA
XQ