Bu, bölgədə idmanın inkişafını daha da sürətləndirəcək
I yazı
Zirvəsi yay-qış qarlı olan möhtəşəm Şahdağın ətəklərində, əsrarəngiz Qudyalçayın sahilində yerləşən gözəl Qubaya yağmış qar onun təbiətini daha füsunkar etmişdi. Yolumuz bu ecazkar məkana idi...
Quba–Bakı şossesinin 4-cü kilometrliyində yerləşən Quba Olimpiya İdman Kompleksinə (OİK) istiqamət alırıq. Məqsədimiz bu bölgənin idman həyatını qələmə almaq, təəssüratlarımızı oxucularla bölüşməkdir. Axı bu günlər Azərbaycan idmanının ürəyi Qubada döyünməyə başlayıb. Qubanın 2024-cü il üçün idman paytaxtı seçilməsi bu gözəl diyar üçün əlamətdar hadisələrdən sayılır.
Yol boyu bizi “təqib edən” velosipedçilərlə söhbət etmək fürsətini qaçırmırıq. Təxminən, 20–22 yaşlı gənclərlə maraqlı dialoq alınır. Məramımızdan xəbər tutan sakinlər çox sevinirlər. Çöhrəsi təbəssümlü, qonurgözlü, ucaboylu gənc deyir:
– Qubanın İdman paytaxtı seçilməsindən ən çox təsirlənən, belə demək mümkünsə, qürur hissi keçirən biz sakinlər olduq. Böyüklü-kiçikli hamı inanır ki, rayonumuz bu il, sözün həqiqi mənasında, Azərbaycanın idman paytaxtına çevriləcək.
Başqa bir velosipedçi də dostunun sözlərinə qüvvət verir:
– İdman ruhumuza çox yaxındır. Obaşdan velosipedli, atlı gəncləri, eyni zamanda, yamaclarda xizək sürənləri, dəstə ilə yürüş edənləri görməyə artıq adət etmişik. Hələ onu demirik ki, nəinki mərkəzdə, əksər kəndlərimizdə də idmanın bir çox növü ilə məşğul olmaq mümkündür.
14 hektarlıq ərazini əhatə edən Quba Olimpiya İdman Kompleksindəyik. 1100 nəfər tamaşaçı tutumu olan universal zal, həmçinin güləş və cüdo, kikboks, karate, fitnes, bilyard, stolüstü tennis zalları, 6 min 600 nəfər tamaşaçı tutumlu “Arena Quba” futbol stadionu, ayrıca mini-futbol, basketbol, tennis və voleybol meydançaları, üzgüçülük hovuzu, şahmat və uşaq əyləncə mərkəzləri ilə tanış oluruq. Burada idmançıların hərtərəfli hazırlıq keçmələri üçün hər bir şərait yaradılıb. Eyni zamanda, istirahət mərkəzi kimi, geniş imkanlara malikdir.
İdman Kompleksinin direktoru Cavid Seyidov ötən ilin sentyabrından idman qurğusunda 30-a yaxın təlim-məşq toplantısının, zona və regional yarışın, düşərgənin keçirildiyini bildirir:
– Kompleks 15 idman növü üzrə məşqlərin keçirilməsi üçün lazımı avadanlıqlarla təchiz olunub. Ötən aylar ərzində təşkil olunmuş genişmiqyaslı tədbirlər sırasında Quba və Şimal regionu üçün xüsusi əhəmiyyəti olan bədii gimnastika üzrə 28-ci Azərbaycam birinciliyini, “İdman festivalı 2023”ü qeyd etmək olar. Qubanın idman paytaxtı seçilməsi rayonda idmanın inkişafına birbaşa təsir göstərəcəkdir. Bu prosesdə Quba OİK tam dəstək göstərəcək.
Kompleksin həyətində anası ilə gəzişən 7 yaşlı Banu şirin yerli ləhcədə bura stolüstü tennislə məşğul olmaq üçün gəldiyini deyir.
Son illər rayonda komanda idman növlərinin kütləvi hal alması üçün yaradılan şərait xüsusi vurğulanmalıdır. Quba Rayon İxtisaslaşdırılmış Olimpiya Ehtiyatları Uşaq-Gənclər İdman Şahmat Məktəbinin (QRİOEUGİŞM) voleybol üzrə baş məşqçisi Vaqif Amani ilə söhbətimiz də bu mövzuda oldu. Voleybol üzrə 9–10 yaşdan yuxarı qızlar və oğlanlardan ibarət qruplarla məşq keçən mütəxəssis böyüklərdən ibarət komandanı da çalışdırır:
– Qubalılar idmana çox bağlıdırlar. Pandemiya səbəbindən yarışların təşkilində boşluq yaranıb. Rayonumuzun İdman Paytaxtı statusu qazanması yerlərdə bu sahənin inkişafına əsl töhfə olacaq. Düşünürük ki, bu il Qubada turnirlər daha çox olacaq ki, bu da yarışlarda iştirakımız üçün geniş imkanlar yaradacaq. Ötən ilin dekabrında keçirilən zona birinciliyində oğlanlardan ibarət komanda I, qızlarımız isə III yeri tutublar.
Qubanın Dağlı kəndindən Qələdüzə gedən yolda atletika üzrə 10-12 nəfərlik qrupla dözümlülük məşqləri keçən Vüqar Atayevlə tanış oluruq. V.Atayev Olimpiya Kompleksində məşqçi-müəllim kimi çalışır. O qeyd edir ki, atletika üzrə məşqlər, əsasən, Olimpiya İdman Kompleksində keçirilir. Bəzən xüsusi hərəkətlər, məsələn, dözümlülük məşqləri belə enişli-yoxuşlu yollarda təşkil edilir:
– Qubanın idman paytaxtı seçilməsi üzərimizə böyük məsuliyyət qoyur. Ötən il atletika üzrə 2 turnir təşkil etmişiksə, bu il regional səviyyədə çoxsaylı və kütləvi yarışlar keçirməyi planlaşdırırıq. Bu il, həmçinin marafon yürüşünün təşkilini də düşünürük. Belə yarışlarda həm istedadlı idmançılar üzə çıxır, həm də uşaqlar arasında dostluq əlaqələri yaranır.
Leyla QURBANOVA
XQ
