Azərbaycan Minifutbol Federasiyasının(AMF) prezidenti Orxan Məmmədov millinin sabiq futbolçuları ilə görüşüb.
Federasiyadan “XQ”yə bildirilib ki, tədbirə Rəşad Sadiqov, Kamran Ağayev, Əfran İsmayılov, Cavid Hüseynov, Rahid Əmirquliyev, Elvin Məmmədov, Ruslan Əmircanov, Cavid İmamverdiyev və Elhad Nəzirov kimi tanınmış simalar qatılıblar. Orxan Məmmədov yığma komandamızın sabiq futbolçularının minifutbola maraq göstərməsindən məmnun olduğunu bildirib. Tədbirdə bu idman növünün ölkəmizdəki inkişafından və kütləviliyindən danışılıb, həyata keçirilən tədbirlərlə bağlı müzakirələr aparılıb, futbolçuların fikirləri dinlənilib.
Yekunda millinin sabiq futbolçularından ibarət “Xankəndi” komandasının yaradılması və onun ölkə çempionatında iştirakı qərara alınıb.
Leyla SABİRQIZI
XQ