Dünən UEFA Avropa Liqasının qrup mərhələsinin III turunda Almaniyada Leverkuzenin “Bayer” və Ağdamın “Qarabağ” komandaları qarşılaşıblar.
“Bay Arena”da keçirilən oyunda meydan sahibləri 5:1 hesabı ilə irəli çıxaraq daha güclü olduqlarını nümayiş etdiriblər. Rəqibə müqavimət göstərən “Qarabağ”ın isə yalnız bir qol vurmağa gücü çatıb. Həmin qola 11 metrlik cərimə zərbəsindən Toral Bayramov imza atıb.
Oyundan sonra “Qarabağ”ın baş məşqçisi Qurban Qurbanov bildirib:
– Çox yaxşı bir komandaya məğlub olduq. Futbolçularımız çox əziyyət çəkdilər. Rəqib topla çox yaxşı davranırdı. Bunu əvvəldən də görmüşdük. Həddindən artıq yaxşı komandadır. Bütün xətlərdə ustalıq səviyyəsi aşağıda olan futbolçu yox idi. Bundan başqa, oyun sistemlərini də yaxşı yerinə yetirirdilər. Reallığa baxmalıyıq. Səviyyə fərqi elə-belə deyil.
XQ
