Bəlkə də, nadir təsadüfdür: Azərbaycan çempionunun baş məşqçisi Qurban Qurbanov bu gün öz futbolçuları ilə birlikdə hələ dünənədək oyunçusu olmuş oğlu Musa Qurbanlının legioner həyatı yaşadığı İsveçdə səfərdədir. Getdikcə yad ölkə mühitinə uyğunlaşan və əsas heyətdə yerini möhkəmləndirən istedadlı hücumçu, göz dəyməsin, paytaxt Stokholmun “Yurqorden” klubunda özünü inamlı hiss edir. 

Məşqçi isə komandasını UEFA Av­ropa Liqasının qrup mərhələsinin ikinci turu çərçivəsində Geteborq şəhərində yer­li “Hekken” klubu ilə oyuna aparmışdır. “Yurqorden”in məşq və yarış cədvəli imkan versə, Qurbanlı bu axşam həmin şəhərdəki “Ullevi” stadionunun tribunasında olmağa can atacaq. Musa onu böyük futbola pər­vazlandıran “Qarabağ”ın oyununu İsveçdə izləmək imkanını qaçırmaq istəməz.

Hakimin elə start işarəsindən dərhal sonra görüşün son dərəcə kəskin xarakter alacağına şəkk-şübhə yoxdur. Qrup sınaq­larına Bakıda Norveçin “Molde” klubu üzərində qələbə ilə başlayan (1:0) və səfərə “H” qrupunda turnir cədvəlinin iki lide­rindən biri kimi yola düşən “Qarabağ”dan fərqli olaraq, “Hekken” birinci turda Lever­kuzendə yerli “Bayer” qarşısında açıq-aş­kar aciz qalmışdır (0:4). Deməli, isveçlilər almanlardan aldıqları ağır zərbədən sonra azarkeşləri qarşısında özlərini doğrultmaq, qrupdan “sağ” çıxmaq uğrunda mübarizədə imkanlarını daha da pisləşdirməmək üçün əllərindən gələni edəcəklər.

“Qarabağ” da öz növbəsində startda qa­zandığı üstünlüyü bir qədər də artırmağın bu məqamda necə böyük əhəmiyyət daşıdı­ğını yaxşı bilir. Evdə qələbədən sonra səfər­də hətta heç-heçə də məqbul nəticə olar. Amma burası da var ki, bizim çempion istə­nilən şəraitdə və vəziyyətdə “doğma divar­lar” arasında və ya özgə şəhərdə oynama­sından asılı olmayaraq, həmişə xoşbəxtliyi rəqib qapısında axtarır və çox vaxt da tapır!

Ağdam komandasının sentyabrın 29-da milli çempionatımızın 8-ci turu çərçivə­sində “Sumqayıt”la görüşdə qibtəediləcək məhsuldarlıq nümayiş etdirib, beş cavabsız qolla qələbə qazanması da bugünkü oyun ərəfəsində yaxşı əlamətdir. Hesabdan da gö­ründüyü kimi, qalib komanda hücum əmə­liyyatlarını yüksək peşəkarlıq və dəqiqliklə həyata keçirmiş, arxa xətdə də səhvsiz oyna­mışdır. Üstəlik də, qələbə həmin gün 34 yaşı tamam olmuş “Qarabağ”ın kapitanı Maksim Medvedevin doğum gününə oyundaşları tərəfindən ən yaxşı hədiyyə idi. Bu fədakar müdafiəçi həyatının düz yarısını “Qarabağ”­da keçirmiş, 2006-cı ildən bugünədək, yəni, 17 il ərzində etibarlı oyunu ilə komandaya böyük fayda vermişdir. Azərbaycan Premyer Liqasında növbəti qələbədən sonra Avropa Liqası qrup mərhələsinin ikinci turunda da uğurlu nəticə çox yerinə düşər, Medvedevə hədsiz sevinc gətirər.

İsveçdə maraqlı mübarizə vəd edən “Hekken”–“Qarabağ” görüşünü Bakı vaxtı ilə saat 23-dən etibarən izləyəcəyik. Oyunu avstriyalı hakimlər briqadası idarə edəcək. Qarşıda “Qarabağ”ın, Azərbaycan futbo­lunun bütün pərəstişkarlarını həyəcan dolu gərgin mübarizə gözləyir.

Bu gün qrupumuzda digər oyunun isə Norveçdə keçiriləcəyini də xatırladaq. Ora­da “Molde” futbolçuları “Bayer”i qəbul edəcəklər.

Oqtay BAYRAMOV,
Əməkdar jurnalist