Dünya qadın voleybolunda Türkiyə dövranı
Türkiyənin qadınlardan ibarət milli voleybol komandası son 3 ayda beynəlxalq meydanda iştirakçısı olduğu 3 mötəbər yarışda bir dəfə belə uduzmayaraq, üst-üstə 22 oyunun hamısından qələbə ilə ayrılmışdır. Bu, ən şirin yuxunu da üstələyə biləcək ağlagəlməz, fantastik nailiyyətdir. Tarixi uğurun Türkiyə Cümhuriyyətinin qurulmasının 100 illiyinə təsadüf etməsi isə gözəl və qüdrətli ölkənin vətəndaşları, bütün türk dünyası üçün ikiqat fərəhli hadisədir.
Zəhra Günəş, Eda Erdem, uzaq Kubada doğulub hazırda Türkiyə vətəndaşı olan Melissa Varqas, Ebrar Karakurt, İlkin Aydın, Dərya, Ayça, Kübra və onların rəfiqələri italiyalı baş məşqçiləri Daniele Santarellinin rəhbərliyi ilə əsl ustalıq, əzmkarlıq və fədakarlıq nümunəsi göstərmişlər. Türkiyə öz voleybol şahzadələri ilə fəxr edə bilər!
“Ay-ulduzlar” əvvəlcə iyulda ABŞ-ın Arlinqton şəhərində keçirilmiş Beynəlxalq Voleybol Federasiyasının Millətlər Liqası turnirində fərqlənmişlər. Finaladək bütün rəqibləri üzərində üstünlüyünü inamla sübuta yetirən Türkiyə millisi həlledici görüşdə Çin komandasına da heç bir ümid yeri qoymamış (3:1) və okeanın o tayından vətənə qızıl medalla qayıtmışdır. Bununla da Türkiyə kollektivi öz tarixində ilk dəfə dünyanın ən yaxşı komandası olması münasibətilə təbrikləri qəbul etmişdir. Həmin müvəffəqiyyət həm də Türkiyə millisini dünya reytinq cədvəlində ilk dəfə zirvəyə, birinci pilləyə yüksəltmişdir.
Avqustda Belçika, İtaliya, Estoniya və Almaniyanın birgə təşkil etdikləri Avropa çempionatında da baş rolda Türkiyə komandasını gördük. İlkin mərhələdə Azərbaycan millisi ilə eyni qrupda çıxış edən və yenə də bir görüşdə belə uduzmayan bu səmimi və mübariz kollektiv sonadək məğlubiyyətsiz oyunlar seriyasını davam etdirməyi bacardı. Yarımfinalda Avropa çempionu İtaliya, finalda isə 2019-cu ilin qitə çempionatının qalibi və 2022-ci ilin dünya çempionu Serbiya voleybolçuları üzərində çətin, amma çox layiqli qələbələr (hər iki oyunda 3:2 hesabı qeydə alınmışdır) türkiyəli voleybol ustalarının böyük uğurunun bəzəyinə çevrildi. Qızlar bu dəfə ölkələrinə Avropa çempionu adını qazandırdılar.
Sentyabrın 16-da Yaponiyada starta çıxıb, yenicə finişə çatmış və “TRT Spor”un sayəsində Türkiyə voleybolçularının keçirdikləri bütün yeddi görüşü maraqla izlədiyimiz 2024-cü il Olimpiya oyunlarının təsnifat turniri də böyük zəfərlə yadda qalacaq. Türkiyə kollektivi səkkiz komandanın Paris Olimpiadasına iki vəsiqə uğrunda mübarizə apardığı yarışda bütün rəqiblərini – meydan sahibləri Yaponiya idmançılarını, Argentina, Braziliya, Puerto-Riko, Bolqarıstan, Peru və Belçika komandalarını məğlubiyyətlə barışmağa məcbur etdilər. Nəticədə sanki birnəfəsə qazanılan olimpiya lisenziyası təmin edildi.
Gündoğar ölkədə möhtəşəm zəfərdən sonra Türkiyə komandası öz tarixində üçüncü dəfə Olimpiya oyunlarının iştirakçısı olacaq. Əvvəlki olimpiadalarda komanda fəxri kürsüdən kənarda qalmışdır. Gələn il isə Türkiyə, Azərbaycan, bütün türk dünyası 2023-ün voleybol qəhrəmanlarından olimpiya medalı gözləyəcəklər. Elə qeydlərimizi də məğlubedilməz komandaya ən xoş arzularla yekunlaşdıraq.
Oqtay BAYRAMOV,
Əməkdar jurnalist