Avrokuboklardakı təmsilçilərimiz cavab görüşləri ərəfəsindədirlər. Bu axşam “Qarabağ” Azərbaycanın futbol pərəstişkarlarına Helsinkidə UEFA Avropa Liqası turnirinin pley-off mərhələsinə vəsiqə sevinci yaşatmaq üçün əlindən gələni edəcək. Elə ilk cəhdindən qitə klub futbolunda tarix yazmağa başlayan “Sabah”, Bakıdakı kimi, Belqradda da Konfrans Liqasının 3-cü təsnifat mərhələsində bütün Serbiyanı təəccübləndirmək əzmindədir. Onlarla müqayisədə arzuolunmaz vəziyyətdə olan “Neftçi” isə İstanbulda “Beşiktaş” qarşısında imtahan verəcək. Bu, Bakıdakından da çətin sınaq olacaq. 

Mərhələnin ilk oyunlarında qeydə alınmış nəticələr belə bir qənaətə gəl­məyimizə əsas verir ki, üç komanda­mızdan ikisi pley-off görüşlərinə “bilet” almaq üçün özünə kifayət qədər zəmin yaratmışdır. İndi həlledici anda üstünlü­yü qoruyub-saxlamaq vaxtıdır.

Qrup mərhələsinin astanası sayı­lan pley-offa aparan yolda ilk addımı Azərbaycan çempionu atmalıdır. Bu axşam komandalarımızdan birinci ola­raq meydana məhz Ağdam klubu çıxa­caq. Bizim vaxtla saat 20-də Helsinkidə başlayacaq HİK—“Qarabağ” görüşü ərəfəsində hesab Qurban Qurbano­vun komandasının xeyrinə 2:1-dir. İki oyunun yekununda növbəti mərhələyə vəsiqənin xoşbəxt sahibinin kim olduğu Finlandiya paytaxtında fransalı hakim Villi Delajodun final işarəsindən sonra məlum olacaq.

Saat 21-də isə UEFA-nın Yulian Veinbergerin başçılığı ilə avstriyalı ha­kimlər briqadasına həvalə etdiyi “Beşik­taş”–“Neftçi” matçına start veriləcəkdir. Dost-rəqiblərin İstanbul görüşü qarşı­sında meydan sahibləri özlərini daha inamlı hiss edirlər. Bir həftə əvvəl “Neft­çi Arena”da Şenol Günəşin komanda­sının xeyrinə qeydə alınmış 3:1 hesabı kiçik üstünlük deyil. Ancaq yeniləşən, 1937-ci ildən bəri tarixinin növbəti, 86-cı səhifəsini yazmaqda olan “Neftçi” də tam ümidsiz vəziyyətdə deyil. Komanda qardaş Türkiyə futbolunun nəhənglərin­dən birinə bu dəfə daha güclü müqa­vimət göstərə bilər.

Nəhayət, nəzərlərimizi Belqrada yönəldək. “Srvena Zvezda” ilə birlik­də Serbiyanın iki ən böyük klubundan biri kimi yaxşı nüfuz sahibi “Partizan”ın Konfrans Liqasının üçüncü təsnifat mərhələsinin start görüşündə Masazır qəsəbəsindəki “Bank Respublika Are­na”da ilk dəfə avrokuboklar səhnəsinə çıxmış sonuncu Azərbaycan milli çem­pionatının gümüş mükafatçısı “Sabah”a iki cavabsız qolla uduzması Belqrad “partizanlarının” sıralarında ciddi nara­hatlıq yaratmışdır. Serbiya mətbuatı­nın təmsilçimizin oyununu bəyənməsi, hətta onu Almaniyanın “Bavariya”sı ilə müqayisə etməsi də “Sabah”ın əzmkar­lığına və layiqli qələbəsinə verilən yük­sək qiymətdir.

Maraqlıdır, rəsmi beynəlxalq mey­danda keçirdiyi ilk üç görüşün hər bi­rində iki top vurub, məhsuldar oyunu ilə diqqətləri özünə cəlb edən “Sabah” bu axşam serbiyalı azarkeşləri bir daha məyus edə biləcəkmi? Bakı vaxtı ilə saat 23-də başlanacaq və polşalı ha­kim Bartoş Frankovskinin idarə edəcəyi hər iki rəqib üçün ağır görüş kimə nə vəd edir? Yatmayıb, gecə saat 1-i göz­ləyək… 

Oqtay BAYRAMOV,
Əməkdar jurnalist