Azərbaycan Türkiyə İş Adamları Birliyinin (ATİB) İdarə Heyəti və bir qrup üzvləri Şimali Kipr Türk Respublikasında (ŞKTR) işgüzar səfərdə olublar. Səfər proqramında heyəti ŞKTR-nın Azərbaycandakı təmsilçisi, xanım Ufuk Turğaner müşayiət edib.
Nümayəndə heyətini ölkənin prezidenti Ersin Tatar qəbul edib. Söhbət zamanı Azərbaycanla Şimali Kipr arasında ticarət potensialının inkişafı üçün yeni layihələrin həyata keçirilməsinin və investisiya mühitinin yaxşılaşdırılması istiqamətində hər iki ölkənin iş adamlarının qarşılıqlı əməkdaşlığının təmin edilməsinin vacibliyi qeyd edilib.
ATİB İdarə heyətinin sədri Cemal Yanğın qəbula görə prezidentə təşəkkür edib və iş adamlarının Şimali Kiprdə yeni layihələr həyata keçirmək niyyətində olduqlarını bildirib. O, Azərbaycanın mədəniyyət paytaxtı Şuşa haqqında kitabı prezident Ersin Tatara hədiyyə edib.
Səfər çərçivəsində nümayəndə heyətinin Kipr Türk İnvestisiya və İnkişaf Agentliyinin direktoru Ebru Kaptan Sertoğlu, Kipr Türk Sənaye Palatasının sədri (KTSO) Əli Kamacıoğlu, Xarici işlər naziri Tahsin Ertuğruloğlu, Baş nazirin müavini, Turizm, Mədəniyyət, Gənclər və Ekologiya naziri Fikri Ataoğlu, İqtisadiyyat və enerji naziri Olgun Amcaoğlu, Kənd təsərrüfatı və təbii sərvətlər naziri Dursun Oğuzla keçirdiyi görüşlərdə qarşılıqlı maraq doğuran məsələr müzakirə edilib. Kipr Türk Ticarət palatasının sədri Turgay Deniz və idarə heyətinin geniş tərkibli üzvləri ilə keçirilən görüşdə palatanın sədri Azərbaycanla turizm, kənd təsərrüfatı və diğər sahələr üzrə əməkdaşlıq etməkdə maraqlı olduqlarını bildirib.
Cemal Yanğın 1991-ci ildə Azərbaycanın dövlət müstəqilliyini bərpa etdikdən sonra islahatlar apararaq bazar iqtisadi sisteminə keçdiyini və buğün sosial-iqtisadi inkişafın davam etdiyini bildirib. Görüşün sonunda ATİB-lə Kipr Türk Ticarət Palatası arasında əməkdaşlıq protokulu imzalanıb.
Qonaqlar Yaxın Doğu Universitetinin İnnovvasiya Mərkəzində istehsal edilən “Günsel” avtomobilləri ilə tanış olublar. Prorektor Murat Tuzinkan bildirib ki, yaxın gələcəkdə satışa çıxarılacaq bu avtomobillərin qardaş türk respublikalarında da zavodlarının qurulması nəzərdə tutlub.
Nümayəndə heyəti Kipr türklərinin öndəri Fazil Küçükün və ilk prezident Rauf Denktaşın məzarlarını ziyarət edib.
Z.BƏŞİRQIZI, “Xalq qəzeti”
