Dünyanın kütləvi və multiidman tədbirlərindən biri olan Ümumdünya Yay Universiadasına sayılı günlər qalır. Dünən Çinin Çenqdu şəhərində keçiriləcək XXXI Ümumdünya Yay Universiadasına Azərbaycan nümayəndə heyətinin hazırlığı ilə bağlı Gənclər və İdman Nazirliyində görüş keçirilib.
Tədbirdə nazirliyin idman şöbəsinin müdir müavini, nümayəndə heyətinin rəhbəri Nicat Həsənov yarışların keçiriləcəyi məkanlar, görülən işlər, həmçinin akkreditasiya, tibb, nəqliyyat, idmançıların qeydiyyatı, yerləşdirilməsi və digər məsələlərdən danışıb. O deyib ki, XXXI Ümumdünya Yay Universiadasında ölkəmizi 88 idmançı təmsil edəcək. Ümumilikdə isə 134 nəfərlik heyət Çinə yollanacaq: “Azərbaycan universiadalar tarixində ilk dəfə ən böyük heyətlə təmsil olunacaq. İyulun 28-də start götürəcək yarış avqustun 8-dək davam edəcək. Komandamız avqustun 9-da Vətənə qayıdacaq”.
Qeyd edilib ki, bu nüfuzlu yarışda Azərbaycan komandasının bayraqdarı kişilərdə atlet Nazim Babayev, qadınlarda isə cüdoçumuz Gültac Məmmədəliyeva olacaq. Bu il yarışa 100-dən çox ölkə qeydiyyatdan keçib. Bəzi idman növü üzrə idmançılarımız təlim-məşq toplanışından sonra Çinə yollanacaqlar. Nicat Həsənov komandamızdan uğurlu nəticə gözlədiyini də söyləyib. O bildirib ki, bəzi idman növləri üzrə yığmalar birbaşa təlim-məşq toplanışlarından sonda turnirə yollanacaqlar.
“Gənclik” Tələbə İdman Cəmiyyətinin sədri Tofiq Xanəliyev “Xalq qəzeti”nə müsahibəsində komandamızın yarışlarda 1992-ci ildən iştirak etdiyini bildirdi: “Azərbaycan idmançıları 15-ci dəfədir ki, bu yarışlarda iştirak edir. Universiada, ümumilikdə, 18 idman növü üzrə keçirilsə də, təmsilçilərimiz onlardan 16-da gücünü sınayacaq. İndiyədək idmançılarımız maksimum 10 növ üzrə yarışlarda mübarizə aparıb. Bu, komandamız üçün rekord hesab oluna bilər”.
T.Xanəliyev deyib ki, Ümumdünya Yay Universiadasından əvvəl tələbələrimizin iştirakı ilə Respublika Universiadası keçirilir. Bu yarışın nəticələrinə görə, ən güclü idmançılar müəyyənləşdirilir. İlk dəfə voleybol və basketbol üzrə kişilərdən ibarət komandalarımız da universiadada iştirak edəcəklər.
“Tələbə idmançılarımız yarışa yaxşı hazırlaşıblar. Cüdo, taekvondo, uşu, gimnastika, atletika və digər idman növlərində atletlərimizdən medal gözləyirik. Bu dəfə komandamız da çox geniş heyətlə təmsil olunur. Ümid edirik ki, idmançılarımız öz güclərindən maksimum istifadə edib, Vətənə yaxşı nəticələrlə dönəcəklər”, – deyə o, əlavə etdi.
Azərbaycan idmançıları ötən Yay Universiadalarında uğurla çıxış ediblər. Analoji yarışlarda komandamız medal sayında fərqlənməyi bacarıb. İtaliyanın Neapol şəhərindəki XXX Ümumdünya Yay Universiadasında komandamız 7 medal qazanıb. Bu nəticə ilə Azərbaycan 165 ölkə arasında 18-ci yeri tutub.
Ümid edirik ki, atletlərimiz nəticələrini daha da yaxşılaşdırıb, Vətənə qələbə ilə dönəcəklər!
Leyla QURBANOVA, “Xalq qəzeti”