Milli Paralimpiya Komitəsinin idmançıları Fransanın paytaxtı Paris şəhərində keçirilən dünya çempionatını 2 qızıl, 1 bürünc medalla başa vurublar. Komandamız Paris Yay Paralimpiya Oyunlarına isə 5 lisenziya qazanıb.
Hər iki qızıl medalı komandamızın aktivinə atletika üzrə Lamiyə Vəliyeva yazdırıb. Təmsilçimiz 100 metr qaçışda 11.99 nəticə göstərərək fəxri kürsünün ən yüksək pilləsində qərarlaşıb. İdmançımız ikinci qızıl medalı 400 metr qaçışda 55:34 saniyə nəticə göstərməklə əldə edib. Bu nəticə ilə Lamiyə Vəliyeva Paris Yay Paralimpiya Oyunlarında ölkəmizi 2 növdə (100 metr və 400 metr) təmsil edəcək.
Milli komandanın digər üzvü Səid Nəcəfzadə isə uzunluğa tullanma növündə 7.11 metr nəticə göstərərək dünya çempionatının bürünc medalına və Paris Olimpiadasında iştirak hüququna yiyələnib.
Paris Oyunlarına digər iki lisenziyanı Oloxan Musayev və Orxan Aslanov qazanıblar. Belə ki, Oloxan Musayev dünya çempionatında nüvə itələmə yarışında 11.74 metr, Orxan Aslanov isə uzunluğa tullanma növündə (T13 kateqoriyasında) 6.95 metr nəticə göstərərək 4-cü yerə sahib çıxıblar.
Qeyd edək ki, dünya çempionatında ilk 4 yerə sahib çıxan atletlər XVII Yay Paralimpiya Oyunlarına birbaşa lisenziya qazanırlar.
L.QURBANOVA, “Xalq qəzeti”
