Olimpiya çempionu, Azərbaycan Atıcılıq Federasiyasının və Milli Olimpiya Komitəsinin (MOK) vitse-prezidenti Zemfira Meftahətdinovanın 60 illik yubileyinə həsr olunan mərasim keçirilib.
MOK-un vitse-prezidenti Çingiz Hüseynzadə, baş katibi Azər Əliyev, gənclər və idman naziri Fərid Qayıbov, digər rəsmilər, Gənclər və İdman Nazirliyinin, həmçinin müxtəlif federasiyaların nümayəndələri və idmançıların iştirak etdikləri tədbirdə əvvəlcə yubilyarın yubilyarın idmançı karyerasını əks etdirən və təbriklərin yer aldığı videoçarxlar nümayiş olunub.
Tədbirdə çıxış edən Çingiz Hüseynzadə yubilyarın Beynəlxalq Olimpiya Komitəsi tərəfindən “Woman Sport” mükafatı ilə təltif olunduğunu bildirib. Ç.Hüseynzadə həmin mükafatı Zemfira Meftahətdinovaya təqdim edib.
Fərid Qayıbov çıxışında Zemfira Meftahətdinovanın Azərbaycanın ilk qadın Olimpiya çempionu olduğunu qeyd edərək deyib: “Zemfira xanımla son iki ildə daha yaxından tanış olmuşam. O, həm də çox yaxşı insandır, müstəqil Azərbaycanın ilk qadın Olimpiya çempionudur. İstərdim ki, onun qızı da Olimpiya çempionu olsun. Zemfira xanımın çalışdığı sahədə də nailiyyətlərinin davam edəcəyinə inanıram”.
Tədbirdə Azərbaycan Cüdo Federasiyasının İcraiyyə Komitəsinin üzvü Asif Əsgərov, MOK-un Ədalətli Oyunlar Komissiyasının sədri Xəzər İsayev, Olimpiya çempionları Namiq Abdullayev, Fərid Mansurov, Elnur Məmmədli, veteran idmançılar və idman ictimaiyyətinin digər nümayəndələri çıxış edərək yubilyarı təbrik ediblər.
Sonda çıxış edən Zemfira Meftahətdinova tədbirin təşkilini özü üçün böyük hədiyyə adlandırıb. Göz yaşlarına hakim ola bilməyən idmançı qazandığı uğurlarda məşqçisinin əməyinin böyük olduğunu deyib.
Olimpiya çempionu sonda Prezident İlham Əliyevə, Birinci vitse-prezident Mehriban xanım Əliyevaya minnətdarlığını bildirib. Qeyd edib ki, onların idmana qayğı və diqqəti bu sahədə böyük nailiyyətlərin qazanılmasında mühüm rol oynayır.
L.QURBANOVA, “Xalq qəzeti”
