Bosniya və Herseqovinanın paytaxtı Sarayevoda gənc və yeniyetmə taekvondoçular arasında Multi Avropa Oyunlarında uğurla çıxış edən millimizin üzvləri Vətənə qayıdıblar. Taekvondoçularımızı Heydər Əliyev Beynəlxalq Aeroportunda federasiyasının kollektivi, idman ictimaiyyətinin nümayəndələri qarşılayıblar.
Yeniyetmələrdən ibarət yığmanın baş məşqçisi Rəşad Məmmədov “Xalq qəzeti”nə açıqlamasında bildirdi ki, komanda yarışa yaxşı hazırlaşmışdı. Təmsilçilərimizin 2 qızıl və 1 gümüş medal qazanması yaxşı nəticədir: “Azərbaycan yeniyetmələrin yarışında ümumi hesabda oğlanlar arasında ikinci yeri tutdu. Təbii ki, bununla arxayınlaşmaq olmaz. Növbəti yarışlarda daha yüksək nəticələr əldə etmək üçün çalışmalıyıq”.
Turnirin qızıl medalını qazanan İlyas Hətəmli rəqiblərinin güclü olmasına baxmayaraq, çempion olduğunu vurğuladı. Turnirdə birinci yeri tutmağı qarşıya məqsəd qoyduğunu bildirən idmançı hədəfə çatdığı üçün məmnun olduğunu dedi.
Millinin digər üzvü Şəms Əlizadə isə çempion olmağı hər bir idmançının arzusu olduğunu qeyd etdi: “Məhz yarışa yaxşı hazırlaşmaqla bu uğuru əldə etmək olar. Yarışda qızıl medal qazanmağımda məşqçilərimin böyük əməyi var. Onlara minnətdarlığımı bildirirəm.
Qeyd edək ki, gənclərdən ibarət komanda isə yarışı 1 gümüş, iki bürünc medalla başa vurub.