Bakıda atıcılıq üzrə keçirilən “Dünya Kuboku 2023”ün üçüncü yarış günündə qarışıq komandalar 10 metr məsafəyə pnevmatik tüfəng və tapançadan atış yarışlarında güclərini sınayıblar.
Türkiyə komandası turnirdə ilk medalını qazanıb. Pnevmatik tapançadan atəş açma yarışlarında Şimal Yılmaz və İsmail Keleş cütlüyü İtaliya komandasını 17:9 hesabı ilə üstələyərək bürünc medala sahib olub. Hindistanlı Divya Tadigol Subaraju və Sarabjot Sinqh cütlüyü serbiyalı Zorana Arunoviç və Damir Mikeç duetini 16:14 hesabı ilə məğlub edərək qızıl medal qazanıb.
Qarışıq komandalar arasında isə pnevmatik tüfəngdən atəş üzrə finala düşən Çinin iki komandasından biri (Yuting Hvang və Lihao Şenq) qızıl, digəri (Jiling Vanq – Aoran Yanq) gümüş medala sahib olub. Həmyerlilər finalı 16:14 hesabı ilə tamamlayıblar. Çexiya komandasını təmsil edən Aneta Brabçova - Frantisek Smetana cütlüyü Macarıstan təmsilçilərindən (17:11) önə çıxaraq bürünc medala yiyələnib.
Qeyd edək ki, mayın 9-da Bakı Atıcılıq Mərkəzində start götürən yarış 6 gün davam edəcək.
.jpeg)
