Bakı 500 milyonluq auditoriyası olan möhtəşəm Formula 1 yarışlarına tam hazırdır.
Bu sözləri “Xalq qəzeti”nə müsahibəsində Formula 1 Azərbaycan Qran–Prisinin mətbuat katibi Turab Teymurov bildirdi. O qeyd etdi ki, hazırlıq işləri uğurla tamamlanıb, trek, tribunalar tam hazırdır. Builki Formula 1 yarışlarında 3 rekorda imza atılıb. Bütün tribunalara biletlərin satılması böyük nailiyyətdir. Yarışı rekord sayda – dünyanın 100-dən çox fərqli ölkəsindən azarkeş canlı izləyəcək. Əcnəbi sayına görə də rekord əldə edilib. Bundan başqa, mövsümün ilk sprint yarışının Bakıda keçirilməsini xüsusi qeyd etməliyəm. Bu, Formula 1 fanatları üçün yenilikdir.
Formula 1 Azərbaycan Qran–Prisinin keçirilməsində marşal və könüllülərin hazırlığı mühüm əhəmiyyət kəsb edir. Ötən yarışlarda olduğu kimi, bu dəfə də həm marşal, həm də könüllülərin bacarıq və təcrübələrinin artırılması məqsədilə ciddi təlim proqramlarından keçiblər. Təlimlərdə əsas məqsəd yarışların təşkili istiqamətində vacib bilik və bacarıqların aşılanması, eyni zamanda öz fəaliyyətləri çərçivəsində çevikliyin və peşəkarlığın artırılmasıdır. Yarış müddətində 1471 marşal iştirak edəcək. BŞH Akademiyasının könüllüləri bu il də bütün əməliyyatlara cəlb olunacaqlar. Budəfəki yarışlarda 1500 nəfər könüllü kimi çalışacaq.
Yerli və əcnəbi media nümayəndələri üçün Media Mərkəzi fəaliyyət göstərir. Mərkəzdə jurnalistlər və fotoqraflar üçün hər cür şərait yaradılıb. Onların yürüşləri izləməsi üçün xüsusi monitorlar quraşdırılıb. Eyni zamanda fotoqrafların çəkiliş məkanlara çatdırılması üçün bütün imkanlar var.
Bu il ötən illərdən fərqli olaraq BŞH-yə daxil olan bəzi yollar avtomobillərin rahat hərəkətini təmin etmək üçün açıq olacaq. Yarışlar zamanı şəhər sakinləri trekə daxil olan ərazilərdə yeraltı keçidlərdən maneəsiz istifadə edə biləcəklər. Eyni zamanda piyadalar, həmçinin Azərbaycan prospekti ilə İstiqlaliyyət küçəsinin kəsişməsində, Xəqani və Rəşid Behbudov küçələrində, habelə halqanın ətrafında yerləşən Azadlıq prospekti ilə Xəqani küçəsində quraşdırılmış müvəqqəti yerüstü keçidlərdə sərbəst hərəkət edə biləcəklər. Bununla yanaşı, Rəşid Behbudov küçəsi ilə Neftçilər prospektinin kəsişməsində yerləşən yerüstü keçid də bu məqsəd üçün daimi əsasda quraşdırılıb.
Turab Teymurov qeyd etdi ki, Bakı yarışında hər il əyləncə proqramı əvvəlkindən daha maraqlı təşkil edilir. Bu ənənə bu il də davam edəcək. Belə ki, bu il də Dənizkənarı Milli Park ərazisində F-1 azarkeşləri üçün müxtəlif əyləncə proqramları baş tutacaq. BŞH sürət həvəskarlarının marağını və istəyini nəzərə alaraq yarış çərçivəsində baş tutacaq dünya ulduzları – niderlandlı sənətçilər DJ Don Diablo və DJ Hardvell konsertlərinə əlavə məhdud sayda ayaqüstü biletləri satışa çıxarıb. Bilet sahibləri, həm də fan zonaya giriş əldə edə biləcəklər.
Leyla QURBANOVA, “Xalq qəzeti”