Sağ olun, uşaqlar, siz fədakarlığınızla, prinsipiallığınızla, təəssübkeşliyinizlə, ən başlıcası, əsas məqsəd naminə birgə fəaliyyət göstərmək nümunənizlə futbolu mənə yenidən sevdirdiniz. Bundan əvvəlki oyun barədə qəzetimizdə geniş məlumat verildiyinə görə indi artıq bu yarışların məqsədi haqqında təfərrüata varmaq istəmirəm. Ancaq vurğulanmalıdır ki, qalib gəldiniz və tanınmış idman jurnalisti Oqtay Bayramovun proqnozlarının əlli faizini reallığa çevirdiniz.
Yaşıma və səhhətimə görə bu oyuna azarkeşlik etmək üçün stadiona getməyə bilərdim. Ancaq söhbət ulu öndərimizin 100 illiyi münasibətilə keçirilən yarışdan getdiyinə görə mütləq orada olmalı idim. Oldum və gördüm ki, meydandakı komandaların hər ikisi bu yarışa ən ciddi, peşəkar heyətlər kimi məsuliyyətlə yanaşıblar.
Yeri gəlmişkən, “Bələdiyyəçilər” də qələbəyə layiq oyun göstərdilər. Etiraf etmək lazımdır ki, komandaların peşəkarlığı, demək olar ki, eyni səviyyədə idi. Ancaq bizim komandanın əzmkarlığı sübut edirdi ki, qalib gələcəyik və gəldik də.
Bu yarış həm də “Xalq qəzeti” redaksiyasında ötən ilin payızından bəri davam edən yeniləşmə və müasirləşmə proseslərinin, eləcə də mütəşəkkil fəaliyyət göstərmək üçün atılan addımların nəticəsini göstərmək baxımından da vacib və önəmli idi. Bu dəfə redaksiyamızın təmsil olunduğu tədbirə ilk addımlarını atan “Xalq TV” də gəlmişdi. Oyunçularımız və bəzi azarkeşlər dedilər ki, yarışa öz televiziyamızın müşayiəti ilə gəlmək komandamız üçün düşərli oldu.
Nəsimi Bələdiyyəsi ilə keçirilən yarış bizə onu da göstərdi ki, ümumi məqsəd naminə birgə fəaliyyət göstərmək üçün hazırıq. “Oyunçularımızın” hamısı məhz komanda naminə çalışdığına görə ad çəkmək istəmirdim. Ancaq oyundan əvvəl, qızınma hərəkətləri zamanı “mənim qoruduğum” qapıya Rövşən Atakişiyev və Fuad Cəfərlinin vurduğu zərbələr (onlardan cəmi birini qaytara bildim) sübut edirdi ki, biz qalib gələcəyik.
Baş redaktorumuzun, baş mühasibimizin və digər əməkdaşlarımızın həyəcanla izlədiyi oyunda texniki direktorumuzun, məsul katibin müavininin, “XalqTV”nin yaradıcısı və icraçısının da iştirak etməsi sübut edirdi ki, biz bir amal uğrunda çarpışanda güclü oluruq. Bu keyfiyyət bizim nəsillərə ulu öndər Heydər Əliyevin tövsiyələrindəndir. Komandamız sübut etdi ki, biz finala doğru qətiyyətlə addımlayacağıq.
Afərin sizə, “uşaqlar”, əhsən! Mən gənclik illərimdə futbolu çox sevmişdim və müdafiəçi kimi oynamışdım. İndi Əvəz Rüstəmovun vurduğu ilk qoldan sonra fikirləşdim ki, kaş o vaxt hücumçu olaydım. Çünki bizim dünənki qələbəmizi məhz ilk qol təmin etdi.
Təkrar edirəm, bu oyunla siz futbolu mənə yenidən sevdirdiniz, həmkarlar. Uğur olsun!
İttifaq MİRZƏBƏYLİ,
Elşən AĞALAR (foto), “Xalq qəzeti”
