Azərbaycan Voleybol Federasiyasının məlumatına görə, kişi və qadın voleybolçular arasında Azərbaycan çempionatlarında yarımfinal mərhələsinin növbəti oyunlarının vaxtı dəqiqləşib.
Qadınların Yüksək Liqasında ikinci qarşılaşmalar aprelin 5-də keçiriləcək. Həmin gün saat 16:00-da “Murov” “Abşeron”u, 18:00-da isə UNEC “Azərreyl”i sınağa çəkəcək.
Aprelin 6-da isə kişi voleybolçuların Yüksək Liqasında ikinci görüşlər baş tutacaq. Kişilərin yarışında saat 16:00-da “Neftçi” “Xarıbülbül”lə qarşılaşacaq. Saat 18:00-da isə MOİK – “Muro” matçı oynanılacaq.
Qeyd edək ki, Yüksək Liqada qadınlar arasında yarımfinalın 1-ci oyunlarında “Abşeron” – “Murov” (1:3), “Azərreyl” – UNEC (3:0) hesabları qeydə alınıb.
Yüksək Liqa kişilərin yarışında “Murov” – MOİK oyununda meydan sahibləri 3:0 hesablı qələbə qazanıblar. “Xarıbülbül” – “Neftçi” (3:1) matçı isə 3:1 hesabı ilə bitib.
Qeyd edək ki, yarımfinal mərhələsi iki qələbəyə, final mərhələsi isə üç qələbəyə kimi oynanılacaq.
Elçin AĞAMİRZƏ, “Xalq qəzeti”