Onlar beş nəfərdir. Beşi də ölkəmizdə yaxşı nüfuz sahibidir, demək olar, hamıya tanışdır. Aralarında yaş fərqi çox deyil. Ən yaşlısı ən kiçiyindən yeddi yaş böyükdür. Ən azı iyirmi beş ildir bir yerdədirlər, eyni məqsədə xidmət edir, doğma vətəndə şahmatın uğurları üçün düşünür, çalışır və bu işin öhdəsindən gəlməyi bacarırlar. Əzmkarlıqlarına, möhkəm iradələrinə mükafat olaraq fəxrlə qrossmeyster adı daşıyırlar, uzun illərdir milli komandamızın şərəfini layiqincə qoruyurlar. Ən başlıcası isə beşi də bahar oğludur, yəni hamısı ilin ən mülayim, həmişə hər birimizin sevinclə, təbəssümlə gözlədiyimiz və qarşıladığımız bahar fəslində dünyaya göz açıb. 

Əgər Azərbaycanda kişi şahmatı­nın bu qızıl beşliyindən hər hansı biri ilin başqa fəslində doğulmuş olsaydı, bəlkə də, indi oxuduğunuz sətrlər öz mənasını müəyyən dərəcədə itirərdi və ya bu gün qəzet səhifəsinə çıxarılmaz­dı. Amma, təkrar edək, beşi də bahar oğullarıdır – kimisi martda, kimisi də apreldə və mayda doğulub. 

Aralarında ən yaşlısı beynəlxalq şahmat dairələrində ilk dəfə kiminsə, nə vaxtsa çox dəqiq işlətdiyi "Şah" ləqəbi ilə tanınan Şəhriyar Məmməd­yarov aprelin 12-də (1985-ci il), Teymur Rəcəbov martın 12-də (1987), Rauf Məmmədov aprelin 26-da (1988), Qə­dir Hüseynov mayın 21-də (1986), nə­hayət, beşliyin "sonbeşiyi" Eltac Səfərli mayın 18-də (1992) həyata "biz gəldik" demişlər.

Çox səmimi və mübariz komanda­dır. Millimizin indiyə qədər əldə etdiyi uğurlarda, xüsusən də üç Avropa çem­pionatında – Novi Sad-2009 (Serbiya), Varşava-2013 (Polşa) və Krit ada­sı-2017 (Yunanıstan) qızıl medallar qa­zanmasında hər birinin xidməti böyük olmuşdur. Deməli, parlaq zəka sahib­ləri olduqlarını tam sübuta yetirmişlər.

Yenə elimizə-obamıza bahar gə­lib. Həyat daha fəallıqla davam edir. Avropa çempionatlarının üçqat qızıl komandasının üzvlərini qarşıda yeni sınaqlar gözləyir. Beynəlxalq Şahmat Federasiyasının 2023-cü ilin yarışlar təqvimində nəzərdə tutulan ən məsul turnirlərdən biri iyulun sonu–avqustun əvvəlində Bakının ev sahibliyi edəcəyi və planetin bir-birindən məşhur qross­meysterlərini paytaxtımıza toplayacaq Dünya kuboku yarışı olacaq. Beşlik bu turnirdə geniş təmsil olunmaq, "doğma divarlar" arasında yüksək yerlər uğrun­da layiqincə mübarizə aparmaq əzmin­dədir. Dostlara uğurlar arzulayaq!

Oqtay BAYRAMOV,
Əməkdar jurnalist