Bakıda COP29 könüllüləri üçün “Eco Enacthon” adlı interaktiv layihə hə­yata keçirilib. Layihə COP29 Azərbaycan Əməliyyat Şirkətinin təşkilatçılığı ilə reallaşdırılıb. Könüllülər iki gün ərzində aktual ekoloji problemlərin həlli istiqamətində orijinal və innovativ layihələrin hazırlanması ətrafında birlə­şiblər. 

COP29 Azərbaycan Əməliyyat Şirkə­tinin məlumatına görə, 29–30 avqust ta­rixlərində Heydər Əliyev Mərkəzində keçirilən təlimin ilk günündə könüllülər ixtisaslaşmış ekspertlərin iqlim dəyişmələ­ri və dayanıqlılıq, tullantıların idarə edil­məsi və çeşidlənməsi kimi müxtəlif ekoloji mövzularda, eyni zamanda, dayanıqlı biz­nes ideyalarının təkmilləşdirilməsi, məh­sul brendlərinin yaradılması və idarə olun­ması kimi praktiki mövzularda apardıqları təlimlərdə iştirak ediblər.

Əldə edilən nəzəri və praktiki biliklər proqramın ikinci günündə təşkil olunan ekoloji layihə müsabiqəsində öz tətbiqini tapıb. Belə ki, “Eco Enacthon” yarışının qaydalarına əsasən, bir neçə komandaya bölünən könülüllər gün ərzində verilən tapşırıq və mövzular üzrə öz layihələrini təkmilləşdirərək münsiflər heyəti qarşısın­da təqdim ediblər. Komanda ruhunu möh­kəmləndirən və birgə səylərin vacibliyini bir daha nümayiş etdirən “Eco Enacthon” çərçivəsində könüllülər dayanıqlı enerji həllərindən innovativ tullantıların idarə olunması təşəbbüslərinə qədər müxtəlif sahələri əhatə edə biliblər. Nəticədə, ən kreativ yanaşma ilə işlənilən və daha çox aktuallıq kəsb edən layihələr münsiflər heyəti tərəfindən qalib elan edilib, müva­fiq komanda üzvlərinə mükafatlar təqdim olunub.

Xatırladaq ki, iqlim dəyişikliklərinin təsirlərinin qarşısının alınmasında gənc­lərdə innovativ düşüncənin təşviqi və mövcud problemlərə fərqli yanaşmanın stimullaşdırılmasına, aktiv və təşəbbüskar gənclərin potensialının dəstəklənməsinə xidmət göstərən bu layihə könüllülərə öz ideyalarının daha sərbəst ifadə edilməsi və tətbiqi, bunun üçün müvafiq sahələrdən olan ekspertlərdən dəyərli mentor məs­ləhətlərinin alınması üçün platforma rolu­nu oynayıb.