Türkiyə Ukraynada sülhə və bu ölkənin bərpasına töhfə vermək üçün istənilən rolu oynamağa hazırdır. Bunu Türkiyənin xarici işlər naziri Hakan Fidan Türkiyənin “TRT World” telekanalına açıqlamasında deyib.

Türkiyənin baş diplomatı xatırladıb ki, ABŞ prezidenti Donald Tramp Rusiya və Ukrayna arasında “dərhal atəşkəs”in tərəfdarıdır. Onun fikrincə, potensial sülh planının həyata keçirilməsi çətin məsələdir, lakin cəhd etməyə dəyər.

Fidan artıq üçüncü ildir ki, davam edən Rusiya-Ukrayna münaqişəsində dağıntıların miqyasına və çoxlu sayda itkiyə diqqət çəkib.

Türkiyə Xarici İşlər Nazirliyinin rəhbəri əmindir ki, ilk növbədə həyat qabiliyyətli və uzunmüddətli sülh planı hazırlamaq lazımdır: “Hazırda ABŞ administrasiyası, avropalılar və biz hamımız mümkün atəşkəs və sülh planının müxtəlif aspektləri üzərində işləyirik. Bununla belə, qısamüddətli fövqəladə atəşkəs zərurətinin uzunmüddətli strateji məsələlərin həlli ilə uzlaşdırılması indi kritik məsələdir. Hazırda biz məhz bunun üzərində işləyirik”, - deyə nazir bildirib.

Fidan qeyd edib ki, Türkiyə atəşkəs danışıqlarında iştirak etmək təklifi verib, dialoqu öz ərazisində keçirməyi təklif edib və onu təşkil etməyə hazır olduğunu bəyan edib. 

Hazırda ABŞ ilkin danışıqlar aparır və plan hazırlayır.

P.ƏMİRCANOV

XQ