ABŞ-ın Rusiyaya qarşı son sanksiyalar paketi enerji sektorunda Mərkəzi Avropa üçün “ciddi problem yaradır” və yanacağın qiymətlərinin artmasına səbəb olur.

Bunu Macarıstanın xarici işlər və xarici iqtisadi əlaqələr naziri Peter Siyarto Co Bayden administrasiyasının Rusiyanın neft-qaz şirkətlərinə, eləcə də Serbiyanın NIS şirkətinə qarşı cəza tədbirləri tətbiq etmək qərarını şərh edərkən deyib.

"Bu yeni sanksiyalar paketi Mərkəzi Avropa üçün ciddi problem yaradır, çünki burada Mərkəzi Avropada sanksiyalar siyahısına Serbiyaya neft tədarükündə əsas rol oynayan şirkət daxildir", - XİN rəhbəri bildirib.

Cənab Siyarto qeyd edib ki, bu sanksiyalar neft və qaz tədarükünün azalmasına gətirib çıxarır və “Mərkəzi Avropada yanacağın qiymətlərində ciddi artıma səbəb ola bilər”.

“Buna görə də biz yaxın günlərdə və həftələrdə macar xalqını və Mərkəzi Avropa iqtisadiyyatını qorumaq üçün enerji sanksiyalarının yanacağın qiymətinin artımına təsirini minimuma endirmək üçün regional tərəfdaşlarımızla sıx məsləhətləşmələr aparacağıq”, - Siyarto bildirib.

O qeyd edib ki, sanksiyalar ABŞ seçkilərində məğlub olan və son bir neçə gündə hakimiyyətdə olan Bayden administrasiyası tərəfindən tətbiq edilib.

Yanvarın 10-da Bayden administrasiyası Rusiyanın neft-qaz sektoruna qarşı genişmiqyaslı sanksiyalar paketi elan edib. Sanksiyalar “Qazprom Neft” və “Surqutnefteqaz”, “Qazprom LNG Portovaya” və “Novatek”in “Cryogaz-Vysotsk” şirkətlərinə qarşı tətbiq edilib. 183 tanker, treyder, neft-servis şirkətləri, bir sıra neft şirkətlərinin rəhbərləri, Rusiya Energetika Nazirliyinin rəhbərliyinin nümayəndələri də sanksiyalara məruz qalıb. Sanksiya siyahısına Cənub-Şərqi Avropanın ən böyük şaquli inteqrasiya olunmuş enerji sistemlərindən biri olan NIS (“Serbiyanın Neft Sənayesi”) də daxil edilib. Onun istehsal müəssisələri Serbiya, Bosniya və Herseqovina, Bolqarıstan, Rumıniya və Macarıstanda yerləşir. Əsas səhmdarlar "Qazprom Neft" (səhmlərin 50%-i), "Qazprom" (6,15%) və "Serbiyadır" (29,87%).

S.ELAY

XQ