Alper Gezeravcı Türkiyənin Milli Kosmos Proqramı çərçivəsində həyata keçirilən “ilk insanlı kosmos missiyasını” uğurla həyata keçirib.
Türkiyə Hərbi Hava Qüvvələrinin polkovniki Alper Gezeravcı Beynəlxalq Kosmik Stansiyaya iki həftəlik missiya ilə kosmosa çıxıb və Türkiyə kosmonavtlarını uğurla kosmosa göndərən ölkələrdən birinə çevrilib. Polkovnik Gezeravcı TRT World-ə eksklüziv müsahibəsində deyib ki, bu, çox simvolik və mühüm bir addımdır: “Bununla belə, bu, böyük ölkəmiz üçün səyahətin yalnız başlanğıcıdır”.
Türkiyəli astronavt müsahibəsində bildirib ki, uşaqlıqda heç vaxt astronavt olmaq arzusunda olmayıb, çünki bu, yalnız digər ölkələrdən olan uşaqlar üçün mümkün görünürdü. Ancaq yanvarın 17-də kosmosa səyahətə başlayan polkovnik Gezeravcı Türkiyənin kosmos xəyalını gerçəkləşdirdi. Videomüsahibəsində türkiyəli astronavt bildirib ki, bundan sonra Türkiyənin güclü iradə və qətiyyət nümayiş etdirərək kosmosa insanlı bir uçuş həyata keçirdiyini anlamaqdan qürur duyacaq. Şübhəsiz, bu, qardaş ölkənin yüz illik tarixində əlamətdar hadisədir gələcək nəsillər üçün kosmosun kəşf edilməsində ilham mənbəyi olacaq”.
Alper Gezeravcıdan başqa daha 3 nəfər kosmosa yollanıb. Bunlar ABŞ və İspaniyanı təmsil edən Maykl Lopes Alegria, İtaliya Hərbi Hava Qüvvələrinin pilotu Valter Villadei və İsveç vətəndaşı Markus Vandtdır. Qeyd edək ki, Alper Gezeravcının Beynəlxalq Kosmik Stansiyada 14 gün qalacağı və 13 fərqli elmi təcrübə həyata keçirəcəyi bildirilir. Biologiya, tibb, materialşünaslıq və genetika kimi sahələrdə aparılacaq təcrübələrdən birinin Muş Elm və Sənət Mərkəzində tələbələr tərəfindən hazırlandığı açıqlanıb. Polkovnik Gezeravcı vurğulayıb ki, türk astronavtının Beynəlxalq Kosmik Stansiyada (BKS) olması türk alimlərinə əhəmiyyətli tədqiqatlar apardıqları elm sahələrində “rəqabət etmək üçün bərabər imkanlar” yaradır.
Xatırladaq ki, Türkiyənin ilk kosmonavtı, hərbi pilot Alper Gez-eravcı 44 yaşındadır və 1979-cu il dekabrın 2-də Mersin şəhərində anadan olub. O, ABŞ Hərbi Hava Qüvvələri Texnologiya İnstitutunda əməliyyat tədqiqatları üzrə magistr dərəcəsi alıb və Türkiyə Hərbi Hava Qüvvələri Akademiyasını elektronika mühəndisliyi ixtisası üzrə bitirib. Türkiyə Hərbi Hava Qüvvələrində xidmət edib.
S.ELAY
XQ