Görüş qlobal medianın diqqət mərkəzindədir

Dünən Soçidə Rusiya və Türkiyə prezidentləri Vladimir Putin və Rəcəb Tayyib Ərdoğan arasında işgüzar görüş keçirilib. Bu, bütün dünyanın böyük maraqla gözlədiyi sammit idi. Şəhərin “Rusiya” sanatoriyasında aparılan müzakirələr bir saat yarım davam edib.

Görüşdən əvvəl “ev sahibi” – Rusiya Prezidenti tədbirin jurnalistlər üçün açıq hissəsində media mənsublarına deyib ki, iki ölkə arasında əlaqələr heç kimin göz­ləmədiyi şəkildə inkişaf edir və bu, təq­dirəlayiq haldır. 

Rusiya lideri həmçinin söyləyib ki, R.T.Ərdoğanla təhlükəsizlik kimi çox əhəmiyyətli məsələləri müzakirə edəcək­lər: “Ukraynadakı vəziyyəti, “Taxıl sazişi”, Suriya məsələsindən danışacağıq. Bir çox başqa istiqamətlərdə də məsələlər var ki, onları da müzakirə edəcəyik”.

Prezident V.Putin Türkiyə ilə Rusiya arasında mövcud layihələrin icrasından da bəhs edib. O, Türkiyənin tezliklə “qaz xab”ına çevrilməsi ilə bağlı müzakirələrin uğurla başa çatacağına əminliyini bildirib.

Türkiyə Prezidenti R.T.Ərdoğan əv­vəlcə Rusiyanın Türkiyədə meşə yan­ğınları ilə mübarizə sahəsində ölkəsinə göstərdiyi yardıma görə V.Putinə təşək­kür edib.

R.T.Ərdoğan sonra deyib ki, dünya, xüsusilə Afrikanın az inkişaf etmiş ölkələ­ri bu görüşdən “Taxıl sazişi” ilə bağlı mü­zakirənin nəticələrini gözləyir. Qeyd edək ki, 2022-ci il iyul ayında Türkiyə, Rusiya, Ukrayna və BMT-nin iştirakı ilə “Taxıl sa­zişi” imzalanıb. Sənədin müddəti bu il iyulun 17-də başa çatıb və Moskva sa­zişdə iştirakını dayandırıb.

Yeri gəlmişkən, BMT Təhlükəsizlik Şurasının bu il iyulun 21-də keçirilən ic­lasında çox sayda ölkələr Rusiyanı “Taxıl sazişi”nin müddətini uzatmağa çağırıb. Avqustun 31-də Moskvada Rusiya xari­ci işlər naziri Sergey Lavrov ilə türkiyəli həmkarı Hakan Fidan arasında “Taxıl sa­zişi” ilə bağlı fikir mübadiləsi aparılıb. 

H.Fidan həmin görüşdən sonra BMT-nin “Taxıl saizişi” ilə bağlı yeni təkliflər hazırladığını bildirmişdi. Analitiklərin fik­rincə, məhz “Taxıl sazişi” sammitin gün­dəliyinin əsas məsələsi olub.

Rusiya-Türkiyə iqtisadi əlaqələri da­vamlı olaraq inkişaf edir. Qeyd edək ki, hazırda iki ölkə arasında ticarət dövriyyə­sinin həcmi 62 milyard dollar təşkil edir. Türkiyə lideri qeyd edib ki, tərəflər bu göstəricini 100 milyard dollara çatdırmaq əzmindədirlər. R.T.Ərdoğan həmçinin bil­dirib ki, ölkələr ticarət üzrə qarşılıqlı he­sablaşmaları özlərinin milli valyutaları ilə həyata keçirməyi planlaşdırırlar. 

R.T.Ərdoğan Rusiya şirkətləri tərəfin­dən inşa edilən “Akkuyu” atom elektrik stansiyasının tikintisinin uğurla davam etdirildiyini və mühüm obyektin təhvil ve­rilməsindən sonra burada 25 min insanın çalışacağını vurğulayıb. Məlumat üçün bildirək ki, son illər iki ölkə arsında müda­fiə sənayesi, eləcə də turizm sahəsində sıx əməkdaşlıq yaranıb. 

Sonra danışıqlar qapalı rejimdə da­vam edib. Rusiya və Türkiyə liderləri bir çox aktual ikitərəfli əlaqələri, qlobal və regional məsələlərə dair fikir mübadiləsi aparıblar.

Türkiyə Prezidentini səfərdə bu ölkə­nin xarici işlər naziri Hakan Fidan, tex­nologiya naziri Mehmet Fatih Kaçır və başqa rəsmilər müşayiət ediblər.

Soçidə Rusiya və Türkiyə liderlərinin iştirakı ilə keçirilən sammit qlobal medi­anın gündəmində olub. Siyasi təhlilçilər Soçidə görüşün pozitiv ruhda keçdiyini, dünya üçün mühüm mesajlar verildiyini vurğulayırlar. 

M.HACIXANLI, XQ