ABŞ Prezidenti Co Bayden Böyük Britaniyanın Baş naziri Rişi Sunakı cümə axşamı Ağ evdə qəbul edib. R.Sunakın səfəri onun ötən ilin oktyabrında Baş nazir seçilməsindən sonra ABŞ-a ilk səfəridir, lakin o, Baydenlə bu il artıq üç dəfə görüşüb. Məlumatı “Amerikanın səsi” radiosu yayıb. 

Ağ evin mətbuat katibi Karin Jan-Pyer jurnalistlərə bildirib ki, liderlər bir sıra qlobal məsələləri, o cümlədən iqti­sadi tərəfdaşlığı, Rusiyanın işğalçı mü­haribəsinə qarşı özünü müdafiə edən Ukraynaya birgə dəstəyi, həmçinin təmiz enerjiyə keçidin vacibliyi və s. məsələləri müzakirə ediblər. 

Mətbuat katibi həmçinin bildirib ki, Prezident və baş nazir danışıqlar za­manı modern texnologiyalar üzrə qlobal müstəvidə ABŞ-Böyük Britaniya lider­liyinin, eləcə də iqtisadi təhlükəsizliyin gücləndirilməsinin əhəmiyyətini vurğula­yıblar. Onlar, həmçinin strateji tərəfdaşlıq üzrə əldə olunan nailiyyətləri qorumaq üçün birgə öhdəliklərin bir hissəsi kimi Şimali İrlandiyada baş verən hadisələri nəzərdən keçiriblər.

Böyük Britaniyanın Baş naziri ABŞ Prezidenti ilə danışıqlardan əvvəl bildirib ki, rəsmi London iki ölkə arasında müda­fiə və təhlükəsizlik sahəsindəki sıx əmək­daşlığı eyni ruhda iqtisadi əlaqələrə şamil etməyi zəruri sayır. 

“Hərbçilərimiz arasında qarşılıqlı fəa­liyyət bizə düşmənlərimiz üzərində döyüş meydanında üstünlük verdiyi kimi, daha böyük və qarşılıqlı iqtisadi fəaliyyət də qarşıdakı onilliklərdə bizə mühüm üstün­lük verəcək” - deyə R.Sunak bildirib.

Xatırladaq ki, R.Sunak Prezident Baydenlə görüşdən əvvəl ABŞ Konqre­sinin liderləri ilə danışıqlar aparıb və Ar­linqton Milli Qəbiristanlığına əklil qoyul­masında iştirak edib. 

M.HACIXANLI, “Xalq qəzeti”