İyunun 6-da Xerson vilayətində Kaxovka Su Elektrik Stansiyasının (SES) bəndi partladılıb. Ukrayna tərəfi partlayışın Rusiya hərbçiləri tərəfindən törədildiyini bildirir. Bu iddiaların isə əsası var. Çünki Rusiya Federasiyası dəfələrlə ukraynalıları Kaxovka Su Anbarının partladılması, Zaporojye Atom Elektrik Stansiyasının suya basılması, nüvə təhlükəsinin yaradılması və s. ilə qorxudub.
Xerson vilayəti hərbi administrasiyasının rəhbəri Aleksandr Prokudin bu barədə deyib: “Rusiya ordusu daha bir terror aktı törədib - Kaxovka SES-i partladıb. Hazırda dağıntıların miqyası, suyun sürəti və həcmi, daşqınların ehtimal olunan əraziləri dəqiqləşdirilir. Bəzi yerlərdə su kritik həddə çatdığından təhlükəli ərazilərdən sakinlərin təxliyəsinə başlanılıb”.
Prokudin sakinlərdən sənədləri, zəruri əşyaları toplamağı və evakuasiya avtobuslarını gözləməyi xahiş edib. İşğal altında olan Novaya Kaxovkanın Rusiya tərəfindən təyin edilmiş meri Vladimir Leontiev isə baş verən hadisədə Ukraynanı günahlandırıb. O, gecə zərbələri nəticəsində Kaxovka Su Elektrik Stansiyasının bəndindəki dağıntını təsdiqləyərək bunu “ciddi terror aktı” adlandırıb.
"Gecə saat 2 radələrində Kaxovka Su Elektrik Stansiyasına çoxsaylı zərbələr endirildi. Strateji əhəmiyyətli obyekt –Kaxovka su elektrik stansiyası qismən dağılıb. Stansiyanın bir hissəsinin uçması mərmi atəşi nəticəsində baş verib. Onun tamamilə dağıdılması ilə bağlı yayılan məlumatlar isə reallıqdan uzaqdır”, - deyə o bildirib.
Bu arada Avropa İttifaqı Şurasının sədri Şarl Mişel də hadisəyə münasibət bildirib: “Kaxovka Su Elektrik Stansiyasında baş verən partlayışın məsuliyyətini Rusiya daşıyır”. O, bu hadisəni “hərbi cinayət” adlandırıb.
Xatırladaq ki, Kaxovka su anbarı hazırda işğal altında olan Xerson vilayətinin Novaya Kaxovka şəhərindən 5 kilometr aralıda yerləşir və Dnepr Su Elektrik Stansiyaları kaskadının son pilləsidir. Obyekt Ukraynanın cənubunun müəyyən hissəsini elektrik və su ilə təmin etmək üçün Dnepr çayında suyun axınını tənzimləyir. 2022-ci ilin fevralında Şimali Krım kanalı ilə birlikdə işğal olunub. Rusiya üçün bu ərazinin strateji əhəmiyyəti var və SES-də partlayış törətməklə ilk növbədə Ukrayna ordusunun Xerson və Zaporojye istiqamətində geniş miqyaslı əks-hücumunun qarşısını almağa, cəbhəni daraltmaqla müdafiəni gücləndirmək istəyir.
Rusiya tərəfi Ukrayna Ordusunun əks-hücumuna isə mane ola bilməyəcək. ABŞ peyk görüntüləri vasitəsilə döyüş mövqelərində Ukrayna hərbçilərinin aktivliyini qeydə alıb. Amerikalı hərbçilərin sözlərinə görə, Kiyev düşmən mövqelərini müəyyən etmək və Rusiya qüvvələrinin sayını öyrənmək üçün “kəşfiyyat döyüşü” aparır. Əsas məqsəd uğurlu əks-hücum üçün Rusiyanın müdafiəsində zəif nöqtə tapmaqdır. Bu barədə Pentaqonun rəhbəri Lloyd Ostin videobrifinqdə deyib :“Rusiyanın işğal etdiyi ərazilər boyunca müdafiə və bir çox hallarda dərindən müdafiə qurduğu hamıya məlumdur. Biz bir neçə sıra istehkam xəttini, xəndəkləri, “əjdaha dişlərini”, hazırlanmış mövqeləri və s. görürük”.
O deyib ki, Rusiya qüvvələri yetərincə uzun ərazidə hücumların qarşısını almağa məcbur qalırlar. “Deməli, ruslar təbii ki, hər yerdə güclü ola bilməzlər. Ona görə də Ukrayna Silahlı Qüvvələrinin əsgərləri istifadə edə biləcəkləri üstünlük nöqtələrini tapmalıdırlar”, – Pentaqonun rəhbəri vurğulayıb.
Hazırda əsas döyüşlər Baxmut istiqamətində gedir. Qərb ölkələri əks-hücum üçün Ukrayna Silahlı Qüvvələrinin 12 briqadasını döyüşə hazır vəziyyətə gətirib və müasir silahlarla təchiz edib. Əks-hücumda da əsas ağırlıq onların üzərinə düşür.
Hadisələrin bu fonunda Kiyev şəhəri iyunun 6-na keçən gecə qanadlı raketlərin növbəti hücumuna məruz qalıb. Hava həyəcanı siqnalından sonra paytaxtda hava hücumundan müdafiə sistemləri işə düşüb və partlayış səsləri eşidilib. Kiyev Regional Hərbi Administrasiyasının yaydığı məlumata görə, Rusiya ordusunun gecə hücumu zamanı Kiyev səmasında 20-dən çox raket vurulub.
Pünhan ƏFƏNDİYEV, “Xalq qəzeti”