Otuz il “Gün gələcək növbəti Novruz bayramını Qarabağda keçirəcəyik” arzusunun reallaşacağı günün həsrəti ilə yaşadıq. O gün gəldi. Artıq 3-cü ildir ki, Novruzu Qarabağda keçiririk. Aksiya iştirakçıları da bayramı Laçın–Xankəndi yolunda qarşılayırlar. Onlar etirazlarını bayram əhval-ruhiyyəsi ilə davam etdirirlər.
Yeni könüllü qruplar da aksiyaya dəstək vermək üçün əraziyə gəliblər. Onlar da qanunsuzluğun, ekoloji terrorun dayandırılması ilə bağlı şüarlar səsləndirirlər. Davam edən haqlı etirazlar onu deməyə əsas verir ki, heç bir kənar təzyiq aksiyanı dayandıra bilməz!
Azərbaycanın Qarabağ iqtisadi rayonunda faydalı qazıntı yataqlarının qanunsuz istismarına qarşı Xankəndi–Laçın yolunda keçirilən etiraz aksiyası 98 gündür fasiləsiz olaraq davam edir. Gün ərzində yoldan, ümumilikdə, 100-dən çox nəqliyyat vasitəsinin keçidinə şərait yaradılıb.
* * *
Qərbin nümayiş etdirdiyi ikili standartlar Azərbaycandan daha aydın görünür. Otuz ilə yaxın müddətdə torpaqlarımız erməni vandalizminin işğalı altında qaldı, minlərlə vətəndaşımız öldürüldü, əsir düşdü, olmazın işgəncələrinə məruz qaldı – Qərb susdu. Avropa Ermənistanın işğalına müxtəlif don geyindirməyə çalışdı, BMT Təhlükəsizlik Şurasının qəbul etdiyi 4 qətnaməni heçə saydı. Qərbin “səmimi düşmənçiliyi” barədə uzun siyahı yaratmaq olar. Ən əsası, kimin haqlı, kimin haqsız olduğunu yaxşı bilirik. Biz növbəti qərəzi yenə də erməni lobbisinin alətinə çoxdan çevrilmiş, hayların vəkili rolunu oynayan Avropa Parlamentinin qəbul olunmuş qətnaməsində müşahidə etdik. Biabırçı qətnamə Avropa Parlamentinin əsl sifətini yenidən ortaya qoydu, onların ermənipərəst niyyətini rüsvaycasına ifşa etdi. Avropa Parlamentinin bu davranışları heç bir reallığa söykənmir.
* * *
Qətnamədə yer alan fikirlərdən biri budur ki, Azərbaycan Laçın yolunu “blokada”ya alıb. Bu açıq-aşkara böhtan deyilmi? Aksiya dinc məqsədlidir, Azərbaycan ərazilərində faydalı qazıntı yataqlarının qanunsuz istismarının dayandırılmasını, “Qızılbulaq” və “Dəmirli” yataqlarında monitorinqin keçirilməsinə icazə verilməsini tələbi ilə onu azərbaycanlı könüllü gənclər və ekoloqlar təşkil ediblər. İndi hansı dövrdür ki, həqiqəti görməyəsən? Qərb dövlətləri mediası, süni peyk vasitəsilə ərazini görmürmü? Göz görə-görə humanitar aksiyaya siyasi don geyindirmək ermənilərin havasına oynamaqdan başqa bir şey deyildir. Bu ermənipərəst parlament Azərbaycanın qələbəsini həzm edə bilmir, çünki erməni lobbisinin valyuta dağarcığının əsiridir.
Ölkəmizin qələbəsi ilə yekunlaşan Vətən müharibəsindən sonra 300-dən çox dinc sakinimizin mina terrorunun qurbanına çevrilməsinə gələndə, nədənsə, bu parlamenti təmsil edən deputatlar susurlar. Biz AP-ni daha çox sabiq vitse-prezident Eva Kailinin korrupsiya skandalları ilə də xatırlayırıq. Legitimlikdən uzaq, separatçı, korrupsiya çirkabına bulaşmış, dövlətimizin ərazi bütövlüyünə hörmətsizlik sərgiləyən Avropa Parlamentinin Azərbaycana tövsiyə verməyə belə haqqı yoxdur.
Avropa Parlamenti Ermənistanla danışıqlar ərəfəsində “katalizator” rolunu oynayır. Belə qarayaxma qətnamə Azərbaycan üçün lazımsız kağız parçasından başqa bir şey deyil, onu haqlı mövqeyindən çəkindirə bilməz.
Laçın yolu ilə bağlı Azərbaycanın siyasəti tam aydın və açıqdır. Bu siyasətin xüsusiyyətləri, elementləri müxtəlif vaxtlarda Azərbaycan Prezidenti tərəfindən ölkədaxili və xarici auditoriya üçün aydın ifadə olunub. Laçın yolu barəsində əks mövqe tutanlar qərəzlə Ermənistanın maraqlarından çıxış edirlər.
İstərdik ki, Laçın yolu ilə bağlı üçtərəfli Bəyanatın müddəaları tam şəkildə icra olunsun. Bu yol təyinatı üzrə – humanitar məqsədlər üçün istifadə edilsin, Ermənistanın hakimiyyət orqanlarının təmsilçilərinin sui-istifadə hallarının qarşısı alınsın. Bizə sirr deyil ki, bu yol vasitəsilə Qarabağda separatizmə dəstək verən şəxslər keçirilir. Bu sərbəstliyin belə davamı qəbuledilməzdir.
Rizvan FİKRƏTOĞLU, “Xalq qəzeti”