“2002-ci ildə hakimiyyətə gələn Rəcəb Tayyib Ərdoğan Türkiyə xalqının öz liderinə inamı, etimadı nəticəsində 21 ildir ki, ölkəsini uğurla idarə edir”. Bunu Türkiyənin Polis Akademiyaları Məktəbinin müəllimi, Dr. Rasim Koç “Xalq qəzeti”nə açıqlamasında bildirib.
Rasim Koç deyib ki, Türkiyə Cümhuriyyəti yüzilliyinin son rübünü tək partiya və tək liderlə başa vurması demokratik rejimlərdə nadir haldır və böyük nailiyyət hesab edilməlidir: “Daxili və xarici siyasətdə millətin inamını və etimadını qazanmış bir hökumət bu etimadı taclandırdı”.
Siyasətçi, Türkiyənin COVİD-19 pandemiyası dönəmində də böyük çətinliklərə baxmayaraq iqtisadi baxımdan böyüyə bildiyini deyib: “Dünya ölkələri pandemiyanın yaratdığı iqtisadi problemlərlə məşğul olduğu bir vaxtda Rusiya-Ukrayna müharibəsinin başlaması dünya enerji və taxıl qiymətlərində böhrana səbəb oldu. Son 3 ildə dünyada makroiqtisadi tarazlıqların pisləşməsi nəticəsində yaranan problemlərin Türkiyə iqtisadiyyatına da mənfi təsir göstərməsi qaçılmaz idi. Türk xalqı bu gün bu böhranın yaratdığı iqtisadi problemlərin çətinliklərini yaşayır. Bu problemin həllinə olan inam böhranlardan əvvəlki 18 ildə qazanılan uğurlara baxaraq bir qiymətləndirmə edir. Əslində bu dövrdə xalqın rifahı nəzərəçarpacaq dərəcədə yüksəldi. 15 iyul çevriliş cəhdindən əvvəl adambaşına düşən gəlir 12 min dollara çatmışdı. Bu rəqəm respublika tarixində ən yüksək göstəricidir. Bu sərvət payı ilə Türkiyə inkişaf etmiş ölkələr sırasına daxil olub. Belə bir tarixi qırılma anından dərhal sonra dövlət çevrilişinə cəhd oldu və Türkiyə bu hadisənin mənfi nəticələri ilə mübarizə apararkən dünya miqyasında epidemiya, müharibə və qlobal böhran içində olan bir ölkəyə çevrildi. Təbii ki, hər bir iqtidar belə böyük problemlərlə məşğul olarkən yıpranır. Bu gün Türkiyə bunu yaşayan bir prosesdən keçir”.
Siyasətçilərin seçkilərə bir yarış kimi baxdığını vurğulayan Rasim Koç, türk xalqının bu prosesləri çox fərqli və daha geniş prizmadan qiymətləndirdiyini bildirib: “Xalqımızın dəyər mühakiməsi təkcə gündəlik qayğılardan ibarət deyil, insan həyatına təsir edən bütün amilləri nəzərə alaraq, mövzuya bütünlüklə baxır. Ona görə də millətimizin siyasi uzaqgörənliyi həmişə siyasətçilərin qarşısında olub. İnsan həyatında çörək qədər, iş qədər vacib olan bir duyğu, şübhəsiz ki, təhlükəsizlik məsələsidir. Bu qayğı bəşəriyyətin məskunlaşdığı gündən bəri həmişə mövcud olmuşdur. Xüsusilə Anadolu coğrafiyası kimi bir çox sivilizasiya və millətin yoxa çıxdığı bir bölgədə yaşayanların təhlükəsizlik qayğıları ən yüksək nöqtədədir. Bu narahatlıqlar paranoyanın məhsulu deyil. Konkret və acı faktlara əsaslanır. Separatçı terror, xarici təhlükə bəzən gizli, bəzən də açıq şəkildə özünü həmişə hiss etdirib. Bu səbəbdən türk millətinin təhlükəsizlik qayğısı Skandinaviya ölkəsi və ya Avropa ölkəsi kimi ola bilməz. O, hər an ayıq-sayıq olmalıdır. Xüsusən də son beş ildə bu torpaqların sahibləri bəlkə də ilk dəfə olaraq daxili və xarici təhlükələrə qarşı özlərini təhlükəsiz hiss edirlər. Müdafiə sənayesindəki uğurlu inkişaflar bu vəziyyətə təsir edən ən mühüm amillərdən biri olmuşdur. Türkiyənin müdafiə sənayesi indi xarici mənbələrdən daha az asılıdır və öz milli layihələrini həyata keçirir. Uğurla həyata keçirilən layihələrin başında “İHA”, “SİHA” və hava hücumundan müdafiə və hücum təyyarələri, milli tank “Altay” və güclü döyüş gəmiləri dayanır. Bundan başqa, Türkiyə nüvə enerjisinə keçən ölkəyə çevrilib. Bütün bunlar qısa və uzunmüddətli perspektivdə Türkiyənin təhlükəsizlik qayğılarını aradan qaldırmaqla yanaşı, dost və qardaş ölkələrin müdafiə siyasətlərinə də böyük töhfə verəcək”.
Bu kontekstdə Türkiyənin Azərbaycan başda olmaqla digər türk dövlətləri ilə həm müdafiə, həm də iqtisadi sahədə tam əməkdaşlığa başladığını qeyd edən həmsöhbətim iki qardaş ölkənin Orta Asiyaya da müsbət təsir edə biləcək bir nüfuza sahib olduğunu vurğulayıb: “Həm türk, həm də İslam dünyası ilə bu balanslı və qardaşlıq münasibətləri rasional və sabitliyə töhfə vermək çərçivəsində davam edərsə, Türkiyə Cümhuriyyəti iki yüzillik ilini Asiya və Avropanın ən parlaq ölkəsi olaraq davam etdirəcək”.
M.SULTANOVA,
Ankara
