Türkiyə Prezidenti Rəcəb Tayyib Ərdoğanın regionda və qlobal müstəvidə artan kəskin ziddiyyət və zorakılıqlar fonunda prinsipial, qətiyyətli siyasət yürütməsi Qərbdə açıq-aşkar qıcıq doğurur. Qardaş ölkənin xarizmatik liderinin praqmatik, müdrik siyasi xətti rəqiblərin məkrli planlarını puç edir.
Görünən budur ki, Türkiyəyə qarşı təhdid və təzyiqlərin artmasına rəğmən, Ankara milli maraqlarını hər şeydən üstün tutur, təzyiqlərlə hesablaşmır və onları dəf etməyi bacarır. “Dünya beşdən böyükdür!” deyən R.T.Ərdoğanın haqqın, ədalətin tərəfində durması onun özünə və dövlətinə yüksək siyasi dividentlər qazandırır.
Kollektiv Qərb Türkiyənin inkişafını ləngitmək üçün bütün yollara əl atır. Onun niyyəti bəllidir. Məqsəd Prezident R.T.Ərdoğanın liderliyilə onilliklər ərzində sürətli inkişaf yolu keçən Türkiyəni zəiflətmək, Rusiya və digər ölkələrlə münaqişəyə cəlb etməkdir. Əlbəttə, rəsmi Ankara bunun fərqindədir və adekvat addımlar atmaqda davam edir.
Qərb mediası imperialist qüvvələrin açıq və gizli maraqlarına canfəşanlıqla xidmət göstərir. Siyasi, iqtisadi, hərbi cəhətdən güclənən, söz və qüdrət sahibinə çevrilən Türkiyəni, onun xarizmatik lideri R.T.Ərdoğanı hədəfə alan Qərb KİV-i qardaş ölkədə bu il mayın 14-də keçiriləcək prezident seçkiləri ərəfəsində xüsusilə fəallaşıb.
Prezident R.T.Ərdoğan dünən “Ana xəbər” telekanalına eksklüziv müsahibəsində vurğulayıb ki, Qərb Ankaranın müstəqil siyasət yürütməsindən əndişələnir və hər vasitə ilə bunun qarşısını almağa cəhd edir. Türkiyə lideri deyib: “Kollektiv Qərb bizi Rusiya ilə qarşıdurmaya sürükləyə bilməz. Biz kimin nə məqsədlərə xidmət etdiyini yaxşı bilirik”.
Prezidentin sözlərinə görə, Türkiyənin geosiyasi münaqişələrə cəlb etmək istəyən qüvvələr öz bədnam niyyətlərini həyata keçirmək üçün hər cür şər və böhtana, digər təxribatlara əl atırlar. R.T.Ərdoğan təəssüf hissilə qeyd edib ki, bu, böhtan kampaniyası hələ uzun müddət davam etdiriləcək.
Türkiyənin dövlət başçısı həmçinin vurğulayıb ki, onun seçkiqabağı platformasının əsas devizlərindən biri məhz qonşu ölkələrlə, xüsusilə Rusiya ilə qarşılıqlı inam və etimad əsasında sıx əməkdaşlığın genişləndirilməsidir. Bunun əksini arzulayanların xam xəyalları gözlərində qalacaq.
Nəzərə alınmalıdır ki, Rusiyanı hərtərəfli tükəndirmək, onu zəif salmaq siyasəti yürüdən Qərbdən fərqli olaraq, Türkiyənin məqsədi vuruşan tərəflər arasında konstruktiv dialoqun başlanmasına və tezliklə sülh sazişinin bağlanmasına nail olmaqdır. R.T.Ərdoğan qeyd edib ki, o, şəxsən İstanbulda ötən ilin yazında olduğu kimi, yenidən Rusiya və Ukrayna nümayəndə heyətləri arasında sülh danışıqlarının davam etdirilməsini arzulayır və bu istiqamətdə bundan sonra da əlindən gələni etməyə hazırdır.
Bu arada Türkiyə mediasında bəzi sensasiyalı xəbərlər yayılıb. Belə ki, Türkiyənin NBR nəşri bu günlərdə Prezident R.T.Ərdoğana istinadən bildirib ki, bu il aprelin 27-də Rusiya lideri Vladimir Putin Türkiyəni ziyarət edəcək. Ehtimal olunur ki, V.Putinin gəlişi mümkün olmazsa, iki ölkə liderləri arasında onlayn-konfrans təşkil ediləcək. Virtual bağlantıda, ilk növbədə Mersindəki “Akkuyu” atom stansiyasına nüvə yanacağının daşınması məsələsi müzakirə ediləcək.
Rusiya Prezidentinin Türkiyəyə ehtimal olunan səfəri dünya mediasında böyük əks-səda verərək geniş yayılıb. Rəsmi Kremlin mətbuat xidmətinin rəhbəri Dmitri Peskov bu məsələ ilə bağlı deyib ki, Rusiya liderinin Türkiyəyə səfəri barədə hələlik dəqiq qərar qəbul edilməyib, bununla bərabər, bütün hallarda “Akkuyu” AES-in aprelin sonunda nəzərdə tutulan açılış mərasimində Rusiya tərəfi layiqincə təmsil olunacaq.
D.Peskov sonra qeyd edib ki, bu layihə Rusiya və Türkiyə arasında uğurlu ikitərəfli əlaqələrin, eləcə də dost və qonşu Türkiyədə enerji sahəsinin inkişafı üçün mühüm əhəmiyyət kəsb edir. Bununla da, iki böyük dövlət arasında münasibətlərdə yeni era başlaya bilər.
Yeri gəlmişkən, bu il martın 25-də Türkiyə və Rusiya prezidentləri arasında telefon danışığı olub. Liderlər, ilk növbədə Ukraynadakı vəziyyəti müzakirə ediblər. R.T. Ərdoğan bildirib ki, onun ölkəsi münaqişənin danışqılar yolu ilə bitməsinə böyük önəm verir. Telefon bağlantısı zamanı Türkiyə Prezidenti Ukraynadan taxılın dünya bazarlarına daşınması ilə bağlı sazişin uzadılmasına müsbət cavab verdiyinə görə rusiyalı həmkarına dərin minnətdarlıq edib. Rusiya Prezidenti, öz növbəsində qeyd edib ki, yaxın gələcəkdə iki ölkə arasında iqtisadi əməkdaşlığın dərinləşməsi üçün yeni addımlar atıla bilər və buna zərurət yaranıb.
Bu məqamda qeyd etməyə dəyər ki, Rusiya mediası bu günlərdə Türkiyədə keçiriləcək prezident seçkilərinə hazırlıq prosesini geniş işıqlandırır. Prezidentliyə namizədlərdən biri Sinan Oğan iki gün əvvəl “RİA Novosti” agentliyinin müxbirinə müsahibəsində bildirib ki, rəsmi Ankara düzgün olaraq Rusiyaya qarşı sanksiyaların tətbiq edilməsi məsləsində Qərbi kor-koranə təkrarlamır.
S.Oğan sonra bildirib ki, “bir vaxtlar Qərb nə deyirdisə, biz onu yerinə yetirirdik”. O dönəmlər artıq arxada qaldı. Bizim prioritetimiz Türkiyənin maraqlarıdır. Biz öz daxili və xarici siyasətimizi özümüz nizamlamalıyıq”. Onun sözlərinə görə, Qərb tərəfindən sanksiyalar tətbiq etməzdən qabaq sülh üçün şans verilməlidir.
S.Oğan həmçinin ümid etdiyini bildirib ki, Ukraynadakı mövcud gərgin vəziyyətlə bağlı çıxış yolu tapmaq mümkün olacaq: “Bunun üçün həm Rusiya Prezidenti Vladimir Putin, həm də Ukrayna lideri Volodimir Zelenski ilə danışıqlar aparmaq zəruridir. Qərbin hazırkı mövqeyi yanlışdır, bu yanaşma münaqişənin qarşısının alınmasından çox, onun daha da alovlanmasına xidmət edir”.
Xatırladaq ki, S.Oqanın prezidentliyə namizədliyi “Ata ittifaqı” seçki bloku tərəfindən irəli sürülüb. Rusiya mediası belə bir faktı diqqətə çatdırır ki, Moskva Dövlət Beynəlxalq Münasibətlər Universitetinin məzunu olan S.Oğan “Valday” klubunun üzvüdür və Rusiya ilə əlaqələrin genişlənməsinin tərəfdarıdır.
M.HACIXANLI, “Xalq qəzeti”