Azərbaycanda ərzaq təhlükəsizliyinin gücləndirilməsi hər zaman respublikada həyata keçirilən sosial-iqtisadi siyasətin prioritet istiqamətlərindən biri olub. Qlobal bazarlarda baş verən son hadisələr isə ölkədə ərzaq təhlükəsizliyinin gücləndirilməsi, bir sıra zəruri məhsullarla özünütəminetmə səviyyəsinin yüksəldilməsi üçün görülən davamlı tədbirlərlə bərabər, yeni yanaşmalardan da istifadəni şərtləndirib.
Baş nazir Əli Əsədov Nazirlər Kabinetinin 2022-ci il üzrə hesabatında bu barədə ətraflı bəhs edib. Ə.Əsədov dövlətimizin başçısının rəhbərliyi ilə həyata keçirilən məqsədyönlü, uğurlu xarici və daxili siyasət nəticəsində respublikamızın beynəlxalq nüfuzunun daha da artdığını, milli iqtisadiyyatın inkişafının davamlı xarakter aldığını, əhalinin sosial rifahının yaxşılaşdığını bildirib.
Hesabatda hökumət tərəfindən ötən il ərzində iqtisadi fəallığın təmin edilməsi, əhalinin sosial müdafiəsinin gücləndirilməsi, işğaldan azad olunan ərazilərin bərpası kimi sahələrində mühüm tədbirlər həyata keçirildiyi əksini tapıb.
Baş nazir çıxışında hesabat ilində respublikada ərzaq təhlükəsizliyinin gerçəkləşdirilməsi ilə bağlı daxili bazarda özünütəminat səviyyəsinin qorunması və əhalinin əsas ərzaq məhsulları ilə təminatının yaxşılaşdırılması istiqamətində vacib işlər görüldüyünü də xatırladıb: “Əsas ərzaq məhsulları üzrə ehtiyatların yaradılması ilə bağlı qərarlar qəbul olunub. Minimum istehlak səbətinin tərkibində əsas ərzaq məhsullarının tədarükü və emalı ilə məşğul olan sahibkarlara güzəştli şərtlərlə kreditlər, faiz subsidiyaları və vergi-gömrük güzəştləri verilib. Ötən il ərzində kənd təsərrüfatı məhsulları istehsalçılarına dövlət tərəfindən maliyyə dəstəyi olaraq ərzaq təhlükəsizliyinin təmin edilməsi ilə bağlı tədbirlərin maliyyələşdirilməsi üçün 540 milyon manat vəsait ödənilib”.
Natiq hesabatda ökə Prezidentinin “Ərzaqlıq buğda ilə özünütəminetmə səviyyəsinin yüksəldilməsinə dair bir sıra tədbirlər haqqında” 2022-ci il 19 iyul tarixli Fərmanına uyğun olaraq, cari il müvafiq tədbirlərin həyata keçirilməsi üçün 180 milyon manat vəsait nəzərdə tutulduğunu, ərzaq təhlükəsizliyi üçün vacib olan su problemlərinin həlli ilə bağlı lazımi addımlar atıldığını, həmçinin su ehtiyatlarından səmərəli və qənaətlə istifadə olunduğunu da diqqətə çatdırıb.
Yeri gəlmişkən, dövlətimizin başçısı qəbul edilən müvafiq qərarlara uyğun olaraq kənd təsərrüfatının inkişafı məqsədilə qurulan çoxşaxəli dövlət dəstəyi sistemi mütəmadi şəkildə təkmilləşdirilir, müxtəlif istiqamətlər üzrə həyata keçirilən genişmiqyaslı tədbirlər mexanizmi vasitəsilə bu sahənin potensialının gücləndirilməsinə yönəldilən resursların həcmi daim artırılır.
Bütün bunların nəticəsində son illər ərzində kənd təsərrüfatı məhsulları istehsalının artımı əksər sahələr üçün xarakterik olub, bitkiçilik sahəsi üzrə artımda həm intensiv, həm də ekstensiv amillər təmin edilib, heyvandarlıq sahəsində artım isə artıq intensiv inkişafa əsaslanmağa başlayıb.
Fermerlərin gübrə, pestisid və kənd təsərrüfatı texnikaları ilə təminatının yaxşılaşdırılması üçün göstərilən dövlət dəstəyi tədbirləri də öz müsbət nəticələrini verib. Kənd təsərrüfatı üzrə texnika parkının genişləndirilməsi hesabına artıq bir traktora düşən əkin sahəsi 45 hektar, bir taxılyığan kombayna düşən əkin sahəsi 269 hektar, bir pambıqyığan kombayna düşən əkin sahəsi 203 hektar təşkil edib. Bu isə ölkədə kənd təsərrüfatı texnikası ilə təminatın kifayət qədər yüksək olmasını xarakterizə edən göstərici kimi diqqət çəkib.
Son illər ölkəyə gübrə və pestisid idxalının həcmi dəfələrlə artıb. Həmçinin 2019-cu ildən etibarən yerli sənaye müəssisəsi tərəfindən daxili bazara azot tərkibli gübrə təklifinin həyata keçirilməsinə başlanıb.
Ölkədə meliorasiya-irriqasiya sisteminin yenidən qurulması və təkmilləşdirilməsi məqsədilə dövlət büdcəsi vəsaitləri hesabına həyata keçirilən böyük miqyaslı layihələr hesabına son 10 il ərzində 390 min hektardan çox sahədə torpaqların su təminatı yaxşılaşdırılıb, 188 min hektar sahə yeni suvarılan torpaqlar qrupuna əlavə edilib. Həmçinin suvarılan sahələrdə müvafiq dövlət dəstəyi hesabına tətbiq olunan müasir suvarma sistemlərinin payı hazırda 5 faizdən çox artıb.
Kənd təsərrüfatı məhsulları istehsalçılarının dövlət qayğısı ilə əhatə olunması bütün əsas istiqamətlərdə irəliləyişlərə yol açıb. Son 10 il ərzində ölkədə real ifadədə kənd təsərrüfatı məhsulları istehsalı 4,8 faiz (o cümlədən, bitkiçilik məhsulları istehsalı 53 faiz, heyvandarlıq məhsulları istehsalı 42,5 faiz) artıb. Bu dövr ərzində kənd təsərrüfatı və ərzaq məhsullarının ixrac həcmi təqribən 26,9 faiz artıb ki, bu da xüsusilə ilkin kənd təsərrüfatı məhsullarının ixrac həcminin bir neçə dəfə çoxalması hesabına baş verib.
Hazırda özünütəminetmə səviyyəsi meyvə-tərəvəz, bostan məhsulları və yumurta üzrə 100 faiz, ət və süd məhsulları üzrə ümumən 85-86 faiz, kartof üzrə təqribən 90 faiz təşkil edir.
Taxılçılıqla bağlı isə onu qeyd edək ki, Azərbaycanda 2022/2023-cü təsərrüfat ilində 1 milyon 44 min 700 hektar sahədə payızlıq taxıl əkini aparılıb. Dən üçün payızlıq əkinlərin sahəsi 2021/2022-ci təsərrüfat ili ilə müqayisədə 2,8 faiz çox olub. Payızlıq taxıl əkinlərinin 649,2 min hektarını buğda, 395,3 min hektarını arpa əkinləri, 160 hektarını çovdar əkinləri təşkil edib. Bundan əlavə ölkədə 14 min hektar sahədə xəsil və yaşıl yem üçün əkinlər aparılıb.
Ötən təsərrüfat ili ilə müqayisədə ölkədə buğda əkinlərinin sahəsi 7,8 faiz artıb. Payızlıq taxıl əkinləri Azərbaycanın əkin balansının 60 faizə yaxınını təşkil edib.
Təbii resursların məhdudluğu səbəbindən yerli fermerlər tərəfindən zəruri həcmdə və ya keyfiyyətdə, həmçinin sərfəli qiymət şərtlərinə uyğun səviyyədə istehsal oluna bilməyən ərzaq məhsullarının daha əlverişli şərtlərlə idxal yolu ilə ehtiyatlarının yaradılması diqqətdə saxlanılıb, həmin məhsulların emal olunması üçün isə müvafiq saxlama infrastrukturu və istehsal bazası yaradılıb. Məsələn, kənd təsərrüfatı məhsulları üzrə bazar infrastrukturunun təkmilləşdirilməsi məqsədilə son illər ərzində dövlət dəstəyi hesabına regionlarda 400 min ton tutumu olan soyuducu anbarlar, 1,9 milyon ton tutumu olan müasir taxıl elevatorları və digər logistika obyektləri qurulub.
Burada onu da qeyd edək ki, reallaşdırılan tədbirlərin nəticəsidir ki, son dövrlər qlobal ərzaq bazarında yaşanan böhranın daha da dərinləşməsinə baxmayaraq Azərbaycanın idxaldan asılı olduğu məhsullar üzrə təminatında heç bir problem yaranmadı. Eyni zamanda sözügedən narahatlığın, o cümlədən ərzaq qiymətlərində baş verən bahalaşmanın mənfi təsirlərinin kompensasiyası məqsədilə ölkəyə gətirilən bir sıra ərzaq məhsullarının, habelə xammalların gömrük rüsumlarından və ƏDV-dən azad olunması ilə bağlı əhəmiyyətli qərarlar qəbul edildi.
Ərzaq təhlükəsizliyinin güclənməsinə yönələn kompleks tədbirlərdən biri kimi, 2021-ci ildə daxili bazarda strateji mallar üzrə qısamüddətli kəskin qiymət dəyişmələrinin qarşısını almaq istiqamətində tədbirlər görmək üçün Dövlət Ehtiyatları Agentliyi yaradılıb. Dövlət Taxıl Fondu isə bu Agentliyin sərəncamına verilib.
Prezident, Ali Baş Komandan İlham Əliyevin rəhbərliyi ilə müzəffər ordumuz tərəfindən 30 il ərzində işğala məruz qalmış torpaqlarımızın azad olunması da ölkəmizdə kənd təsərrüfatının inkişafı baxımından yeni imkanlar yaradıb.
“Azərbaycan Respublikasının işğaldan azad edilmiş ərazilərində kənd təsərrüfatı təyinatlı torpaqların idarə edilməsi ilə bağlı bəzi məsələlər haqqında” Azərbaycan Prezidentinin 2021-ci il 27 aprel tarixli Fərmanının icrası çərçivəsində ərazilərin minalardan təmizlənməsi prosesinə paralel olaraq kənd təsərrüfatı əkinlərinin həyata keçirilməsi işləri aparılır, bitkiçilik və heyvandarlıq sahələri ən müasir texnologiyaların tətbiqi yolu ilə inkişaf etdirilir, bu ərazilərin bərpası və yenidən qurulması “Yaşıl enerji” zonası, “Ağıllı kənd” konsepsiyası əsasında gerçəkləşdirilir.
Aparılan hesablamalara əsasən, düşməndən təmizlənən ərazilərdə mövcud resurslar tam dövriyyəyə cəlb edilməklə kənd təsərrüfatı məhsulları istehsalının bərpası hesabına ölkə üzrə ümumi kənd təsərrüfatı məhsulları istehsalı həcminin indikinə nəzərən təqribən 8 faizdən çox artacağı gözlənilir.
Azad olunmuş torpaqlarda kənd təsərrüfatının bərpası hesabına xüsusilə taxıl və yem bitkiləri və heyvandarlıq məhsulları istehsalında artım təmin ediləcək. Belə ki, bu ərazilər hesabına ümumi taxıl məhsulları istehsalının təqribən 400 min ton, ət istehsalının 45 min ton və süd istehsalının 240 min ton artırılması imkanları mövcuddur. Təbii-iqlim və relyef xüsusiyyətlərinə əsasən işğaldan azad olunmuş ərazilərdə ənənəvi hesab edilən heyvandarlıq və taxılçılıq sektorları ilə yanaşı, meyvəçilik və tərəvəzçiliyin inkişafı baxımından da geniş imkanlar var.
Vaqif BAYRAMOV, “Xalq qəzeti”