Builki qəbul imtahanlarında yüksək bal toplayaraq ali məktəblərə daxil olmuş tələbələrlə Astarada keçirilən görüş bütün iştirakçılarda zəngin təəs­sürat yaradıb.

Rayonun ümumtəhsil məktəblərinin direktorları, tələbə adını qazanmış gənclər və valideynlərin qatıldıqları görüşdə icra hakimiyyətinin başçısı Qəzənfər Ağayev qeyd etdi ki, rayondan ali məktəblərə daxil olan gənclərin sıralarının ildən-ilə artması elmə, biliyə olan marağın güclənməsinə dəlalət edir. Prezident İlham Əliyev təhsi­lin inkişafına daim xüsusi diqqət və qayğı göstərir. Təhsil haqqında qanunun və təh­sillə əlaqədar Dövlət proqramlarının icrası gələcək kadr hazırlığında prioritet sayılır. 

Astarada da təhsilin inkişafı ilə bağlı çoxsaylı sanballı işlər görülür. Son illər 40-dan çox yeni məktəb binası tikilmiş və əsaslı təmir olunmuşdur. Hazırda Sərək və Şümrüd kənd tam orta ümumtəhsil mək­təbləri üçün inşa edilən binaların tikintisi başa çatmaq üzrədir. Bu diqqətin nəticə­sidir ki, rayonda təhsil sahəsində uğurları artmaqdadır. Bunu bugünkü tələbə gənclə­rin nailiyyətləri bir daha sübut edir. Bu il rayonun orta məktəblərini bitirən məzun­lardan 40 nəfəri 550-dən yuxarı bal top­layaraq ali məktəblərə daxil olub. 7 nəfər məzunun Polis Akademiyasına daxil ol­ması da yüksək nailiyyətdir. Rayon rəhbəri uğur qazanmış gəncləri, onların yüksək hazırlığında əməyi olan müəllimləri və va­lideynləri təbrik etdi. Gənclərin ali təhsil alaraq bilikli, bacarıqlı gənc kadrlar kimi müstəqil, suveren Azərbaycanımızın inki­şafı, tərəqqisi naminə görülən işlərə layiqli töhfələr verəcəyinə əminliyini bildirdi. 

Astara Təhsil sektorunun müdiri Xə­dicə Əliyeva, Kijəbə qəsəbə tam orta ümumtəhsil məktəbin direktoru Təbrizə Rəsulova, valideyn Kəminə Qədirova çıxış edərək gənclərin təhsil alması üçün ölkə­mizdə yaradılan yüksək şəraitə görə ölkə Prezidenti İlham Əliyevə minnətdarlıq etdilər, tələbələrlə görüşdən razılıqlarını bildirdilər. 697 balla tələbə adını qazan­mış Ərçivan qəsəbə 3 nömrəli tam orta ümumtəhsil məktəbinin məzunu Ələkbər Ağayev, 682 bal toplamış Kakalos kənd tam orta ümumtəhsil məktəbinin məzunu Yusif Əhmədzadə, 577 bal toplamış Astara şəhər 5 nömrəli tam orta ümumtəhsil mək­təbinin məzunu Zinaida Rəhimova çıxışla­rında dövlətin gənclərə göstərdiyi qayğıya mükəmməl təhsilləri və gələcəkdə yüksək vətəndaşlıq mövqeyi ilə cavab verəcəkləri­ni söylədilər.

Sonda ali məktəblərə qəbulda yüksək bal toplamış tələbələrlə xatirə şəkli çəkildi, rayon icra hakimiyyəti başçısının sərənca­mına əsasən onlara pul mükafatları verildi.

XQ