Mübaliğəsiz deyə bilərik ki, Azərbaycanda müəllimə həmişə böyük hörmət olub və indi də var. Hər kəs onun şəxsiyyətinə ehtiramla yanaşır. Ümummilli Lider Heydər Əliyev bu barədə deyib: “Hər birimizdə müəllimin hərarətli qəlbinin bir zərrəciyi var. Mən dünyada müəllimdən şərəfli ad tanımıram”.
Ölkəmizdə, xüsusilə də işğaldan azad edilmiş rayonlarda məktəb tikintisinə ciddi diqqət yetitilir. Yeni təhsil ocaqlaırından biri də Füzulidə qardaş Özbəkistan Respublikasının inşa etdiyi 960 şagird yerlik tam orta məktəbdir. Prezident İlham Əliyevin vurğuladığı kimi, bu təhsil ocağı Azərbaycan və Özbəkistan xalqlarının qardaşlığının rəmzidir. Şəhərə qayıdan ilk şagirdlər məhz bu məktəbdə təhsil alırlar. Hazırda onların sayı 160-dır, amma tezliklə 400-ə çatacaq. Şagirdlərin təlim-tərbiyəsi ilə 15 müəllim məşğul olur.
Böyük alim və hökmdar, riyyaziyyatçı, astronom Mirzə Uluqbəyin adını daşıyan 1 nömrəli tam orta məktəbin direktoru Həcər Mahmudova bildirib ki, 30 il öncə, 26 yaşında bu şəhəri tərk edən sakin kimi yenidən doğma ocağa qayıtmasını böyük xoşbəxtlik sayır:
– Bu unudulmaz anları bizə yaşatdığınıza görə Azərbaycan Prezidenti İlham Əliyevə, qalib Ordumuza minnətdaram. Bu gözəl məktəbi tikib bizə bəxş edən özbək qardaşlarımız da var olsunlar. Biz, pedaqoji kollektivin üzvləri burada təhsil alan şagirdlərin gələcəkdə yüksək bilik və bacarığa, eyni zamanda, milli-mənəvi dəyərlərə sahib vətəndaşlar kimi yetişməsi üçün var qüvvəmizlə çalışırıq. Bu da ölkəmizin gələcəyi, onun dünyada layiqli yer tutması baxımından çox vacibdir.
Direktor daha sonra dedi:
– 2023/2024-cü tədris ilində məktəbdə 11 sinif təşkil edilib. “Şagirdlərin və buna uyğun da siniflərin sayı getdikcə artacaq. Çünki Prezident İlham Əliyevin tapşırığına uyğun olaraq, yenidən qurulan Füzuli şəhərinə keçmiş məcburi köçkünlərin qayıdışı davam edir. Artıq Füzuli şəhərində 144 ailənin, yəni 514 nəfərin daimi məskunlaşması təmin edilib. Deməli, köç karvanları gəldikcə şagirdlərin sayı da artacaq.
Mirzə Uluqbəy adına 1 nömrəli tam orta məktəbin daha həyəcanlı olanları isə 1-ci sinif şagirdləridir. İlk dəfə müəllimlərinə deyirlər: “Müəllim, bayramınız mübarək! Uşaqlar hər şeyi öyrənməyə çalışırlar. Müəllimlərinə tez-tez suallar verir, biliklərini artırır və Füzulinin tarixi ilə də yaxından maraqlanırlar. Onlar məktəbdə öyrəndiklərini heç vaxt unutmayacaqlar. Müəllimlərimiz onlara parta arxasında oturmağı, düzgün yazıb, oxumağı, özünə inamlı olmağı öyrədirlər”.
Bu məktəbin müəllimləri barədə də xoş sözlər söylənilir. Onların sevib-seçdikləri bu peşənin böyük məsuliyyət tələb etdiyi qeyd edilir. Bu barədə məktəb direktoru deib: “Xüsusilə gənc müəllimlər daha diqqətli olmalıdırlar. Çünki cəmiyyətimizin sabahı olan nəsillə işləyirlər, heç bir yanlışlığa, səhvə yol verməməlidirlər. Unutmayaq ki, cəmiyyət məhz müəllim əməyinin nəticəsində formalaşır, savadlı, bilikli, geniş dünyagörüşlü, nümunəvi əxlaqlı insanlar yetişir. Müəllimlərimizin hamısı peşələrini sevirlər. Buna görə də tezliklə bizim məktəbin adı qabaqcıl təhsil ocaqları sırasında çəkiləcək”.
Pünhan ƏFƏNDİYEV
XQ
.jpeg)
.jpg)
