Sübh tezdəndir. İsti bir yay günü yolum doğulub boya-başa çatdığım Biləsuvar rayonunadır. Elə ay olmur ki, göz açdığım torpağa yolum düşməsin. Hər gedişimdə də Azərbaycanın Milli Qəhrəmanı Mübariz İbrahimovun ata ocağını ziyarət edirəm. Budəfəki ziyarətim isə Mübarizin şəhidliyinin 15-ci ilinə təsadüf edirdi.
…Heç bilirsiniz Vətən uğrunda canından keçmiş şəhidlərin ünvanlarına gedib, valideynlərinin, bacı-qardaşlarının, övladlarının dərdlərinə şərik olmaq necə də çətindir? Hətta söhbətini haradan başlayıb, necə bitirəcəyini belə düşünürsən. Ata-ana, bacı-qardaş, ömür-gün yoldaşının ağarmış saçlarını, dərddən bükülmüş qamətlərini, hələ də “atam gələcək” deyə yolunu gözləyən məsum uşaqları gördükcə ürək ağrısı keçirib, təsəlli verməkdən başqa heç bir çarən qalmır.
Doğru deyiblər: Şəhidliyin, qəhrəmanlığın məkanı, zamanı olmur. Şəhidlər xalqın kimliyini, mənliyini qoruyub işıqlı sabahımıza boylanan azadlıq fərdləri, ucalıqları fəth edən zirvə yolçularıdır. Ana Vətən həmişə belə igid oğulları ilə şöhrət tapıb. Şəhid qanı ilə yazılmış qəhrəmanlıq isə əbədi tarixə çevrilib.
Doğmaları danışırlar ki, Mübarizin böyük bir arzusu varmış. Nə vaxtsa, fərqi yoxdur, istər idmançı, istərsə də bir hərbçi kimi başı üzərində dövlət rəmzi olan Azərbaycanın üçrəngli müqəddəs bayrağını yüksəltsin. İgid Vətən oğlu əbədiyyətə qovuşandan sonra, Biləsuvarın Əliabad kəndində doğulub boya-başa çatdığı sadə bir ev müqəddəs ocağa dönüb. Çox da böyük olmayan Əliabad kəndi Ələt-Astara magistral yolunun Biləsuvar rayonu ərazisində birinci kənddir. Vaxtilə o qədər də tanınmayan bu kəndin adı indi dillər əzbəridir.
Mübariz Biləsuvarın ilk Milli Qəhrəmanıdır. 2020-ci ildə Vətən müharibəsində 3 biləsuvarlı gənc də ölümündən sonra Vətən Müharibəsi Qəhrəmanı adına layiq görülüb. Onların göstərdiyi qəhrəmanlıqla bütün ölkəmiz fəxr edir.
Mübariz daim düşünürdü: müqəddəs, bərəkətli, min-bir nemətli torpaqlarımız düşmənə heç vaxt pay ola bilməz. Bunu həmin amal uğrunda öz şirin canınlarından keçmiş minlərlə şəhidimizin, Mübariz kimi ərənlərimizin tökülən qanları, ruhları bizə bağışlamazdı. Bizim doğma torpaqlarımıza qayıdacağımız şübhəsiz idi. Azad Qarabağ torpağı bu gün yenə də çal-çağırlı günlərini yaşayır. O torpaqlar doğma sakinlərini qoynuna alır, onların nəfəsləri ilə qızınır. Bu növraq şəhidlərimizin ruhunu şad edir.
Bir neçə ildir ki, bu ocaqda Milli Qəhrəmanın ev-muzeyi fəaliyyət göstərir. Yüksək zövqlə tərtib olunmuş ev-muzeyi cəmi 22 il ömür yaşamış, misilsiz qəhrəmanlığı ilə milyonlarla ürəklərdə iz qoymuş Mübariz İbrahimovun qısa, lakin mənalı və şərəfli ömür yoluna işıq salır. Muzeydə saxlanılan, Mübarizin əlləri toxunmuş hər bir eksponat sonsuz qürur doğurur.
Ev-muzeyinin Xatirə kitabında yazılmış ürək sözlərinin sayı-hesabı yoxdur. Respublikamızın bütün bölgələrindən, hətta xarici ölkələrdən gəlmiş ziyarətçilər elin qəhrəman oğluna ehtiram əlaməti olaraq duyğularını ifadə etmişlər. Bu qeydlərlə tanış olandan sonra bir daha Mübarizlə qürur duyursan.
İmişli rayonunun Muradxanlı kəndindən olan bir qrup gənc yazır: “Əziz qardaşımız, sən doğrudan da, bu qəhrəmanlıqla cənnətə qovuşdun. Sən bu hünərinlə, cəsarətinlə nəinki bir elin, bir rayonun, bir respublikanın, hətta bütün Türk dünyasının müqəddəs, qəhrəman oğluna çevrildin”.
F.Quliyev və D.Ağayevin imzaladığı və qısa cümlədən ibarət olub böyük məna daşıyan qeydləri də diqqətimizi çəkir: “Millətin ruhunu özünə qaytaran qəhrəman. Allah sənə rəhmət eləsin”.
Nəhayət, ev-muzeyinə baş çəkəndən sonra qısa bir məsafədə yerləşən qəhrəmanımızın doğulduğu evə üz tuturuq. Evin qarşısında onlarla avtomobilin durmağından aydın olur ki, bu gün də ziyarətçilərin sayı çoxdur. Bu müqəddəs ocağa ziyarətə gələnlər üçün yaxın-uzaq söhbəti yoxdur. Kənd sakinləri 15 ildir ki, bu ocağı, bu ailəni bir gün belə tək qoymurlar. Hər bir ziyarətçi adını xalqımızın qəhrəmanlıq səhifəsinə əbədi yazdırmış Mübariz İbrahimovla bağlı hər şeyi öz gözləri ilə görmək istəyir. Çünki bu müqəddəs ocaqda hər guşə Mübarizi xatırladır...
Səliqəli, gül-çiçəyə bürünmüş həyətin o biri başından eşidilən səs bizi diksindirir.
– Mübariz!..
Şamama anadır. 7 yaşlı nəvəsi Mübarizi səsləyir. Dünyaya Mübariz İbrahimov kimi, qəhrəman oğul bəxş etmiş Şamama ana mehrini oğlunun adını daşıyan nəvəsinə salıb. Nəvə Mübariz sanki əmisinin şəkillərdə gördüyümüz uşaqlığını xatırladır. Əmisinin təkrarsız qəhrəmanlıq yolu xalqımızın hər bir övladı kimi, balaca Mübariz üçün də müqəddəsdir. Hələ əmisinin adını nəyə görə daşıdığını illər sonra biləcək. Hər gün dünyaya yeni Mübarizlər gəlir. Vətəni, torpağı, yurdu qorumaq üçün. Onların hər biri bu günümüzün və sabahımızın mübarizləridir.
Şamama ana deyir:
– 15 il bir göz qırpımında keçdi. Sanki dünən idi... Xalqımız var olsun. Bu ötən müddətdə bir an belə ailəmizi tək buraxmadılar. Elə bizi də yaşadan bu oldu. Xalqımıza, dövlətimizə, el-obamıza minnətdaram”.
Bir neçə il öncə Milli Qəhrəmana həsr etdiyim “Elin Mübariz oğlu” adlı kitabı çapa hazırlayarkən söhbət zamanı atası Ağakərim kişi (artıq dünyasını dəyişib) həmin günü belə xatırlayırdı: “Mənə dedilər ki, başını dik tut, oğlun Vətən yolunda fəda olub. Göz yaşlarımı bircə anlığa boğa bilməsəm də, nə özümü itirdim, nə də sındım! Başımı dik tutub, “Vətən sağ olsun”, – dedim. Mən onu saxlaya bilmədim seçdiyi yoldan! Kimsə də saxlaya bilməzdi, hər kəlməsi Vətən idi. Dilindən düşmürdü Vətən sözü. Mən oğlumu Vətənə fəda etmişəm.Vətən hər şeydən ucadır və Vətənin şərəfindən söhbət gedən yerdə atanın da qarışmağa haqqı yoxdur”.
2020-ci il dekabrın 10-da Bakının Azadlıq meydanında Vətən müharibəsində Qələbəyə həsr olunmuş Zəfər paradında Türkiyə Respublikasının Prezidenti Rəcəb Tayyib Ərdoğan çıxışında demişdir: “Bu gün Azərbaycanın milli şairi, böyük mücahid Əhməd Cavad bəyin ruhunun şad olduğu gündür. Bu gün Nuru Paşanın, Ənvər Paşanın, Qafqaz İslam Ordusunun igidlərinin ruhunun şad olduğu gündür. Bu gün Azərbaycan şəhidlərinin sərdarı Mübariz İbrahimovun ruhunun şad olduğu gündür. Bu gün hamımız üçün, bütün türk dünyası üçün zəfər və qürur günüdür”.
Bəli, əbədi olaraq ürəklərdə yaşayan Qəhrəman Vətən oğlunun ruhu şaddır!
Müşfiq MIRZƏ
XQ
.jpg)