Ana Torpaq! Sənin qüdrətin ölçüyəgəlməzdir. Hər qarışın o qədər qiymətlidir ki, övladların sənin uğrunda canını, qanını belə əsirgəmirlər: ”Canımız bu Vətənə fəda” deyib, əbədiyyətə-sənin varlığına qovuşurlar.
Bu gün Aprel döyüşlərinin qəhrəmanlarından biri Raquf Orucovun anım günüdür. Azərbaycan Ordusunun polkovnik-leytenantı,”Murov Qartalı” ləqəbli Raquf Orucovun ömür yoluna nəzər salanda görürsən ki, bu insan həyatı anlayandan torpaq nisgili ilə yaşayıb. Hayların xalqımıza vurduğu ən böyük zərbələrdən bəlkə də birincisi onların ürəklərdə sağalmaz dərdlərin izini açmasıdır. Çünki, harada işğalçılıq, müharibə varsa, orada dərd-bəla, hüzn var. Raquf da belə bir tale ilə qarşılaşmışdı. O, 1972-ci ildə Ağdam rayonunun Cinli kəndində doğulmuşdu. Bütün uşaqlar kimi onun da sonsuz arzuları var idi… Çox təəssüf ki, erməni işğalçıları qanlı əllərini Qarabağ torpaqlarımıza uzadandan sonra bütün Azərbaycan xalqının başı üzərini fəlakət dalğası bürümüşdü, aydın səmamızın rahatlığı pozulmuşdu. Raqufun doğulduğu Cinli kəndini də işğalçılar qana boyamış, tar-mar etmişdilər. Raqufun anası həmin işğal günlərində -1993-cü ilin 12 iyun tarixində şəhid oldu. Bundan əvvəl isə dayısı Azər Rəhimov şəhidlik məqamına qovuşmuşdu. Raquf özü könüllü olaraq özünümüdafiə batalyonlarında qəhrəmanlıqla döyüşürdü. Amma, çox təəssüf ki, Azərbaycan Ordusu o illər pərakəndə vəziyyətdə idi. Silah-sursat belə yox dərəcəsində idi. Fəqət, Vətəni qibləgah bilən və ölümdən qorxmayan Raquf kimi minlərlə oğullar arxalı köpəklərlə - haylarla qorxmadan döyüşürdülər. Raquf əfsanəvi kəşfiyyatçılardan biri idi. O, tez-tez düşmən caynağında olan kəndlərinə gedir, anasının məzarı başında onunla dərdləşirdi: ”Ana, səni tək qoymayacağam, biz qayıdacağıq. Bu torpaqlar bizimdir, bizim də olacaq. Hər gecənin bir şəfəq saçan gündüzü var.”
Birinci Qarabağ döyüşlərindən sonra Raquf ayaqlarında qəlpə yaraları gəzdirsə də, çəkdiyi ağrıları kimsəyə bildirmirdi. Düşmənə nifrət, qisas hissi onu peşəkar hərbçi kimi formalaşdırdı. Bakı Ali Hərbi Ümumqoşun Komandirləri Məktəbinə daxil olan Raquf peşəkar zabit kimi təhsilini başa vurduqdan sonra, Azərbaycan Ordusunun sıralarında xidmət etməyə başladı. 1996-cı ildən təyinatını ön xəttə - Murovdağa alan Raquf Orucov kəşfiyyat bölüyünün komandiri kimi Vətənə borcunu yerinə yetirirdi. Özü kimi “Qartallar” yetişdirirdi. Onun Murovdağda keçirdiyi kəşfiyyat əməliyyatları dillər əzbəri olmuşdu. Elə buna görə də, Raqufa “Murov Qartalı” ləqəbi verilmişdi. Raquf döyüş qabiliyyətinə və cəsarətinə görə əfsanəvi hərbçi idi.
Bəli, belə zabitləri ilə Azərbaycan Ordusu yenilməz, basılmaz oldu.
2016-cı ilin Aprel döyüşlərində Xüsusi Təyinatlı Qüvvələrin tərkibində vuruşan Raquf Ağdərənin Talış kəndinin erməni işğalçılarından azad edilməsi uğrunda qəhrəmanlıqla döyüşdü və şəhidlik zirvəsinə ucaldı. Raquf Orucovun xidmətləri heç vaxt unudulmayacaq, onun xatirəsi xalqımızın qəlbində əbədi yaşayacaq. İnanırıq ki, Raquf Orucovun 2 oğul övladı - Aqşin və Nihad qəhrəman atalarının adına layiq övladlar kimi bu Vətənə layiqli vətəndaş olacaqlar.
Raquf Orucov ölümündən sonra “İgidliyə görə” medalı ilə təltif edilib. Vətən cəngavər oğulları ilə gözəldir, laləzardır. Onların hər birinin dəfn mərasimi ümumxalq birliyinin canlı mücəssiməsidir. Həmin gün - 2016-cı il aprelin 5-də insan seli Sumqayıt Şəhidlər Xiyabanını ağuşuna almışdı. Xalq qəhrəman oğullarını son mənzilə yoia salırdı. Raquf Orucov Sumqayıtda Şəhidlər Xiyabanında dəfn olunub. Sağında da, solunda da əsgərləri, komandirləri ilə birgə əbədiyyət işığına qovuşublar. Heyf ki, Raquf kimi qəhrəmanlarımız 2020-ci il Vətən Müharibəsindəki Zəfərimizi görmədilər. Amma onların ruhu rahatdır, “Xarı Bülbüllü” Qarabağımızın səmasında şəhidlərimizin ruhu qarış-qarış dolaşır… Ruhunuz qarşısında baş əyirik, əziz oğullar!
Kəmalə Abdinova
XQ
