Yaxud qazi Şəhriyarın Xocalıda başa çatan döyüş yolu

2023-cü ilin 19–20 sentyabrı müzəf­fər Ali Baş Komandan İlham Əliyevin rəhbərliyi altında şanlı Azərbaycan Ordusunun Zəfər yürüşünün parlaq təcəssümü, qızıl hərflərlə yazılan yeni qəhrəmanlıq dastanımızın növbəti sə­hifəsi kimi tarixə düşdü. Məhz həmin gün erməni separatçılarının Qarabağ­da törətdikləri genişmiqyaslı təxribat­ların qarşısının alınması, Ermənistan silahlı qüvvələri birləşmələrinin tərk­silah edilərək ərazilərimizdən çıxarıl­ması, onların hərbi infrastrukturunun zərərsizləşdirilməsi məqsədilə bölgədə lokal xarakterli antiterror tədbirlə­rinə başlanıldı. 

Hərbi əməliyyatlar, həmçinin Qarabağ­da Azərbaycanın Konstitusiya quruluşu­nun bərpa edilməsi, işğaldan azad olunmuş ərazilərdəki öz ata-baba yurdlarına qayı­dan keçmiş məcburi köçkünlərin, habelə bərpa-quruculuq işlərində çalışan mülki insanların və hərbi qulluqçularımızın təh­lükəsizliyini təmin etmək məqsədi daşıyır­dı. İyirmi üç saat davam edən lokal əməliy­yat zamanı xarici havadarlarının dəstəyi ilə “təpədən-dırnağa” silahlanmış ermənilər müqavimət göstərə bilməyəcəklərini, məğ­lubiyyətin labüd olduğunu anlayaraq ağ bayraq qaldırdılar.

44 günlük İkinci Qarabağ müharibə­sində olduğu kimi, 19–20 sentyabr lokal antiterror tədbirləri də beynəlxalq hərbi ekspertlərin diqqətini cəlb etdi. Bu əmə­liyyatın yüksək peşəkarlıqla hazırlandığını və dəqiqliklə icra edildiyini bütün dünya izlədi. 3 il əvvəl “dəmir yumruğ”un zərbi­ni görmüş yağı bu dəfə də şirürəkli Azər­baycan əsgərinin qarşısında duruş gətirə bilmədi. 

Vətənimizin ərazi bütövlüyünün və suverenliyinin bərpası uğrunda gedən döyüşlərin iştirakçılarından biri də Xo­calı sakini Şəhriyar Zamanovdur. O, həm Vətən müharibəsinin, həm də 19–20 sent­yabr antiterror əməliyyatlarının iştirakçı­sıdır. İki dəfə yaralansa da yenidən döyüş meydanına qayıtmış Şəhriyar XQ-nin Qarabağ bürosuna bu barədə xatirələrini danışdı:

– Ailəmiz Xocalı rayonundan məcbu­ri köçkün kimi müvəqqəti olaraq Yevlax rayonunun Xaldan qəsəbəsində məskun­laşıb. Mən də 1990-cı ildə burada anadan olmuşam. 2009-cu ildə həqiqi hərbi xid­mətə çağırılmışam. Xidmətimi Azərbay­can Respublikası Daxili İşlər Nazirliyi­nin Daxili Qoşunlarında keçdikdən sonra 2014-cü ilə qədər müddətdən artıq xidmət edən (MAXE – M.R.) hərbi qulluqçu kimi orada qalmışam. Daha sonra tərxis olun­dum. Ancaq 2020-ci ildə Tovuz hadisələri zamanı mərhum generalımız Polad Həşi­movun şəhid olması xəbərini eşitdikdə bir an belə fikirləşmədən yenidən hərbi xid­mətə qayıtmaq qərarına gəldim və ordu sıralarına daxil oldum.

Elə həmin il Vətən müharibəsinin baş­lanması şəxsən mənim üçün ən böyük ar­zumun reallaşması demək idi. Çünki atam, yaxın qohumlarımızın çoxu Birinci Qara­bağ müharibəsinin iştirakçıları olmuşdu­lar. Atamın əmisi Namazov Novruz Qulu oğlu Xocalıda şəhid olmuşdu. Mən də bu söhbətləri dinləyə-dinləyə böyümüşəm və hər zaman arzulayırdım ki, müharibə baş­layaydı, şəhidlərimizin qisasını alaydım. Allaha şükür edirəm ki, Ali Baş Koman­danımızın rəhbərliyi altında bu arzumuz reallaşdı...

Vətən müharibəsi zamanı ilkin olaraq Murovdağ istiqamətində döyüşlərə atılan Şəhriyar daha sonra Ağdərə rayonunun Talış kəndinin və Suqovuşan qəsəbəsi­nin düşməndən təmizlənməsində iştirak edib. Suqovuşanda yaralanıb. Ayağından və belindən qəlpə yaraları alıb. Ancaq Vətən sevgisi kimi, hərbi sahəyə həvəsi də azalmayıb. Müharibədən sonra da hər­bi xidmətini davam etdirən cəsur xocalılı döyüşçü 2021-ci ildə qardaş Türkiyədə dağ-komando kurslarını müvəffəqiyyətlə bitirərək peşəkarlığını daha da artırıb, ko­mando kimi Azərbaycana qayıdıb. Əslən Xocalıdan olan Şəhriyar Zamanov Zəfərlə bitən şərəfli döyüş yolunu belə xatırlayır:

– Vətən müharibəsində qazandığımız şanlı Qələbə nəticəsində uzun illər boyu torpağımıza göz dikmiş mənfur düşmən layiqli cəzasını aldı. Ancaq Qarabağda, o cümlədən, ata-babalarımın doğma yurdu Xocalıda separatçıların mövcudluğunun davam etməsi, necə deyərlər, mənə rahat­lıq vermirdi. Ona görə də separatçılara qarşı antiterror tədbirlərinin keçirilməsi hər bir azərbaycanlının ürəyincə idi. Hə­min döyüşlərin də iştirakçısı olmuşam və sentyabrın 19-da sol əlimdən yaralanmış, həmçinin qapalı kəllə-beyin travması al­mışam. Ancaq antiterror əməliyyatlarının, ümumilikdə, doğma Vətənimin azadlığı uğrunda gedən döyüşlərin iştirakçısı oldu­ğum üçün özümü xoşbəxt sayıram. Heç bir yara, heç bir xəsarət bu xoşbəxtlik duyğu­suna təsir edə bilməz. Əksinə...

Onu da qeyd edək ki, Şəhriyar Zama­novun xidmətləri dövlətimiz tərəfindən layiqincə qiymətləndirilib. O, Azərbay­can Prezidentinin müvafiq sərəncamları ilə “Suqovuşanın azad olunmasına görə”, “Vətən müharibəsi iştirakçısı” və “Sücaətə görə” medalları ilə təltif edilmişdir. 

Mahir RƏSULOĞLU,
XQ-nin Qarabağ müxbiri