Bakının simasını daha da gözəlləşdirən istirahət guşələrindən biri də Nəri­manov adına parkdır. Göz oxşayan dizaynda yenidən qurulmuş park artıq sakinlərin sevimli məkanlarından birinə çevrilib.

Burada insanların asudə vaxtlarını səmərəli keçirmələri üçün müxtəlif isti­rahət guşələri, uşaqların doyunca əylənə bilmələri üçün atraksionlar quraşdırılıb, həmçinin uzun müddət yararsız vəziyyət­də olan fəvvarə meydanı yenidən qurula­raq istifadəyə verilib.

Sakinlərin park haqqında fikirlərini öy­rənmək üçün bura üz tutduq. Ətraf insan­larla dolu idi. Yaşlı insanlar skamyalarda əyləşib söhbət edir, uşaqlar və gənclər isə əylənirdilər. 

Nəvələrini parka gəzməyə gətirən nurani bir kişi diqqətimizi cəlb etdi. Yaxınlaşdıq. Parkla bağlı fikirlərini öy­rəndik. 67 yaşlı Rafiq baba hələ institut­da oxuduğu illərdə bu parka dincəlməyə gəldiyini dedi: 

– Tələbə vaxtı həftə sonu bir-iki saat dincəlmək üçün bu parka gələrdim. Bu gün isə nəvələrimin əlindən tutub onları gəzdir­məyə gətirmişəm. Təmirdən sonra, ilk dəfə bura gəlirik. Buranı çox bəyənirik.

Başqa bir müsahibim - Arzuman dayı buranın dincəlmək üçün daha sa­kit bir məkan olduğunu dedi:

– Əvvəllər parkda o qədər səs-küy olurdu ki, rahat oturub dincələ bilmirdik. İndi isə belə deyil. Sakitlikdir. Mərkəzdə qurulmuş fontanı seyr etmək, saatlarla suyun səsini dinləmək insana böyük zövq verir. 

Parkı başdan-başa gəzdikdən sonra, uşaqların və valideynlərin bir yerə yığış­dığı məkana getdik. Buradakı atraksionlar, idman qurğuları elə gözəl və cəlbedici idi ki, lap uşaq olmaq istədim... 

Balacaların üzündəki təbəssüm, ya­şadıqları sevinc hissi nəyə desən dəyər­di. Dostları ilə bolluca əylənən balaca qızcığaz qaça-qaça yanıma gələrək ingi­lis dilində dedi: 

– Adım Nasdır. Amerikada yaşayıram. Hər il bura baba və nənəmi görməyə gə­lirəm. Bu gün nənəm məni parka gətirdi. Bura çox gözəldir.

Nas sonra dedi ki, onun artıq burada çoxlu dostları var. Sonra rəfiqələri Mə­dinə və Reyhanı təqdim etdi:

– Biz birlikdə oyun qurğularında əylə­nirik. Birinci dəfədir gəlirəm. Çox xoşuma gəldi. 

Sonda onu da qeyd edək ki, ərazisi 4,1 hektar olan park ötən əsrin 50-ci illərində salınıb. 1960-cı illərdə parkın yaxınlığında N. Nərimanov adına metro stansiyası inşa edilib. 

...Düşünürük ki, COP29-a evsahibliyi edəcək ölkəmizin paytaxtına təşrif buyura­caq çoxsaylı qonaqlar da bu parkı görəndə məmnun qalacaqlar. 

Fidan SALMANOVA,
Elşən AĞALAR (fotolar)
XQ