İntensiv baş verən baş, boyun, diş, oynaq ağrılarından düzgün qidalanma ilə xilas olmaq mümkündür. Bunun üçün qəbul edilən qidaların tərkibində ən önəmli amil təbii ağrıkəsicilərin olmasıdır. Təbii ağrıkəsici dedikdə, söhbət sağlam qarışımlardan gedir.
Bununla bağlı faydalarını saydıqca bitməyən zəncəfildən danışmaq yerinə düşər. Bitkinin ağrıkəsici üstünlüklərindən söhbət açan mütəxəssislər bildirirlər ki, zəncəfilin tərkibində iltihabı və ağrıları azaltmağa kömək edən gingerol adlı bir birləşmə var. Ondan ürəkbulanma və əzələ ağrısını müalicə etmək üçün istifadə edilir.
Təbii ağrıkəsici məlhəm hazırlamaq üçün zəncəfilin kökü yaxşıca təmizlənir. Onun qabığını soymaq da olar, soymamaq da. Sonra nazik dilimlərə ayrılır. Hər litr su üçün 2–3 dilim kifayət edir və məhlul qaynamağa qoyulur. Qarışım 5–10 dəqiqə qaynayandan sonra oddan götürülür və süzülür.
Həkimlər məhlulun üzərinə çox olmamaq şərti ilə, zövqə görə limon və ya bal əlavə edib hər ağrı olanda qəbul etməyi məsləhət görürlər.
Bu mövzuda bir çox elmi araşdırmalar aparılıb və həmin məhlulun, həqiqətən, təbii ağrıkəsici olduğu təsdiqlənib.
Z.HÜSEYNLİ
XQ
