Azərbaycan Respublikasının Prezidenti İlham Əliyevin 25 iyun 2024-cü il tarixli sərəncamı ilə Natiq Səlim oğlu Qasımova Azərbaycanın Milli Qəhrəmanı adı ve­rilməsini mingəçevirlilər böyük sevinclə qarşılayıblar. Şəhər icra hakimiyyətinin təşkilatçılığı ilə Mingəçevir Şəhidlər xiyabanında qəhrəmanın xatirəsi ehtiramla yad edilib. 

Şəhər rəsmiləri, hüquq-mühafizə orqanlarının rəhbərləri, YAP fəalları, icti­maiyyət nümayəndələri, şəhid ailələrinin üzvləri, qazilər, əmək və müharibə ve­teranlarının iştirak etdiyi tədbirdə əvvəl­cə Azərbaycanın Milli Qəhrəmanı Natiq Səlim oğlu Qasımovun rəmzi məzarı ziyarət olunub. 

Mingəçevir Şəhər İcra Hakimiyyətinin başçısı İlham İsmayılov Prezident İlham Əliyevin sözügedən sərəncamı haqqında məlumat verərək, bunun qəhrəmanlığa əsl qədir-qiymət ifadəsi olduğunu söylə­di. Sonra o, Birinci Qarabağ müharibəsi dövründə könüllü olaraq cəbhəyə getmiş Natiq Qasımovun döyüşlərdə böyük şü­caət göstərdiyini xatırladıb. Qeyd edib ki, onun qəhrəmanlağı bütün azərbaycanlı­ların dillər əzbəri olmuşdur. 

Bildirildi ki, Rusiyada çıxan “Oqon­yok” jurnalının Natiqdən bəhs edən məqaləsi Azərbaycan oğlunun vətənpər­vərliyini dünyaya tanıtmışdır. Böyük Britaniyanın “Broken Pot Media” şirkəti tərəfindən çəkilmiş, rejissoru və ssenari müəllifi Karan Sınqh olan “Oğul” sənəd­li filmində erməni səhra komandiri Vitali Balasanyan əsir düşmüş Natiqin tanış gəldiyini, lakin xatırlaya bilmədiyini söy­ləsə də, sonra məlum olub ki, onun din­dirilməsində iştirak edibmiş. İtalyan hərbi fotoqrafı Enriko Sarsin də orada olub və sonradan verdiyi müsahibədə Balasan­yanın yalanını ifşa edib. Əsl həqiqət isə belə olub ki, Əsgəranda strateji mövqedə yerləşən alban kilsəsində mübarizəni da­vam etdirən Natiq təkbaşına 5 gün ac-su­suz, gecə-gündüz vuruşaraq düşmənləri bu posta yaxın buraxmayıb. Ermənilər fitnə işlədərək ona çatdırıblar ki, əgər təslim olmasa, girov götürdükləri 22 Xo­calı sakinini öldürəcəklər. O razı olmayıb ki, günahsız xocalılıları güllələsinlər və Azərbaycan bayrağını sinəsinə sıxıb er­mənilərin üzərinə gedib...

Natiq Qasımov “Qarabağ şahinləri” dəstəsinin tərkibində Əsgəranın, Xana­badın, Xramortun düşmən işğalından qorunması uğrunda gedən döyüşlərdə iştirak edib, rəşadət göstərib, erməni vandallarına qarşı mərdliklə vuruşub. Mərasimdə xüsusi qeyd edilib ki, Na­tiq kimi oğulların qanı yerdə qalmayıb. 2020-ci ilin payızında 44 günlük Vətən müharibəsində və 2023-cü ilin sentyabr ayında antiterror əməliyyatları zamanı Azərbaycanın ərazi bütövlüyü tam təmin olunub, şəhidlərimizin ruhu şad olub. 

Mərasimdə Natiqin müəllimi Sahibə Rəsulova, Birinci Qarabağ müharibə­si qazisi Əbülfət Babayev, Azərbaycan İES-in təmsilçisi Adil İsmayılov, şəhid anası İranə Həsənova, ictimaiyyət nü­mayəndəsi İnqilab Şirinli çıxış edərək Natiq Qasımovla bağlı xatirələrindən danışıb, şəhidlərimizə Allahdan rəhmət diləyiblər. 

Azərbaycanın Milli Qəhrəmanı Natiq Qasımovun qardaşı Nofəl Qasımov ölkə Prezidentin göstərdiyi bu diqqətə görə ailəsi adından minnətdarlığını ifadə edib.

İlqar HƏSƏNOV,
XQ-nin bölgə müxbiri

Mingəçevir