Naxçıvanda bu ildən gerçəkləşdirilən ənənəyə uyğun olaraq, növbəti dəfə may ayında doğulmuş şəhidlərin xatirəsi ehtiramla anılıb.
“Naxçıvan Şəhid Ailələri” İctimai Birliyinin təşkilatçılığı və Naxçıvan Muxtar Respublikasında Azərbaycan Respublikası Prezidentinin Səlahiyyətli Nümayəndəliyinin dəstəyi ilə keçirilən tədbirdə dövlət və hökumət rəsmiləri, şəhid ailələri, qazilər, ictimaiyyət nümayəndələri və tələbə-gənclər iştirak ediblər.
Naxçıvan televiziyasının doğum günü may ayında olan şəhidlərlə bağlı hazırladığı videoçarx nümayiş etdirilib. Naxçıvan Dövlət Texniki Kollecinin tələbələri videoçarxda adları çəkilən 39 Birinci və İkinci Qarabağ müharibəsi şəhidinin portretləri ilə səhnəyə çıxıblar.
Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Fuad Nəcəfli şəhidlərimizin doğum günlərini xalqımızın daim xatırlayacağı önəmli tarix kimi dəyərləndirib.
Mərasimdə şəhid mayor Elbrus Əhmədovun atası Səmrəddin Əhmədov və şəhid baş leytenant Zülfü Rzayevin anası Mehparə Rzayeva çıxış edərək Azərbaycanı yenidən bütövləşdirib dünyaya tanıdan övladlarının xatirəsininə göstərilən ehtirama görə razılıqlarını bildiriblər.
Sonda Naxçıvan Dövlət Universitetinin tələbə teatr studiyası və “Belkanto” vokal qrupunun şəhidlərin xatirəsinə həsr etdikləri bədii kompozisiya təqdim olunub.
Səbuhi HƏSƏNOV,
XQ-nin bölgə müxbiri
.jpg)
