Naxçıvan Muxtar Respublikası Ali Məclisinin yaz sessiyasının növbəti plenar iclası keçirilib.
Deputatlar və ekspertlər “Naxçıvan Muxtar Respublikasının Ali Məclisinə seçkilər haqqında” Naxçıvan Muxtar Respublikasının Qanununda dəyişiklik edilməsi barədə” Naxçıvan Muxtar Respublikası Qanununun layihəsi (birinci oxunuş) və “Naxçıvan Muxtar Respublikasının 2023-cü il büdcəsinin icrası haqqında” Naxçıvan Muxtar Respublikası Qanununun layihəsi (birinci oxunuş) müzakirə ediblər.
Ali Məclisin sədr müavini Anar İbrahimov gündəlikdə duran hər iki məsələ barədə ayrı-ayrılıqda məlumat verib. Ali Məclisin Hüquq siyasəti komitəsinin sədri İsmayıl Qəribli birinci Qanun layihəsi barədə təmsil etdiyi komitənin rəyini bildirib. Naxçıvan Muxtar Respublikası Mərkəzi Seçki Komissiyasının sədri Əjdər Əliyev, deputat Yeganə Məmmədova, Ali Məclis Aparatının Qanunvericilik və hüquq məsələləri şöbəsinin müdiri Cəlil Rüstəmov birinci qanun layihəsi ətrafında çıxış ediblər. Sonra qanun səsə qoyularaq birinci oxunuşda qəbul olunub.
Gündəlikdə duran ikinci məsələ ilə bağlı Ali Məclisin İqtisadi siyasət komitəsinin sədri İsa İsayev qanun layihəsi barədə təmsil etdiyi komitənin rəyini diqqətə çatdırıb. Azərbaycan Respublikası Hesablama Palatasının Naxçıvan Muxtar Respublikası üzrə İdarəsinin rəisi Hafiz İsmayılbəyli, Naxçıvan Muxtar Respublikası maliyyə nazirinin müavini, Həsən İsmayılov, deputatlardan Hüseyn Bağırsoylu, Ehtimad Məmmədov, Elman Cəfərli və Əmir Babayev sual, fikir və təkliflərini səsləndiriblər.
Səbuhi HƏSƏNOV,
XQ-nin bölgə müxbiri