Naxçıvan Muxtar Respublikasının Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi Naxçıvan şəhəri və Babək rayonu üzrə 40-dan çox işəgötürənin iştirakı ilə əmək yarmarkası təşkil edib.
Məşğulluq aksiyasında işsiz və işaxtaran şəxslərə Naxçıvan şəhəri və Babək rayonu üzrə 16 dövlət müəssisəsindən 190-dan artıq, 25-i özəl müəssisədən 90-dan çox olmaqla 41 işəgötürən tərəfindən, 280-dən çox vakansiya yarmarkada işaxtaran və işsiz vətəndaşlara təqdim olunub. Vakansiyalar üzrə müraciət edən işsiz və işaxtaran şəxslərdən CV-lər qəbul edilərək nəzərdən keçirilib. Onların həmin vakansiyalar üzrə məşğulluqlarının təmin edilməsi üçün işlərə başlanıb.
Yarmarkada işsiz və işaxtaran şəxslərə agentliyin fəal məşğulluq tədbirləri barədə də məlumat verilib, müraciət edən şəxslərlə ilkin sorğular aparılıb.
Səbuhi HƏSƏNOV,
XQ-nin bölgə müxbiri