Naxçıvan Muxtar Respublikası İqtisadiyyat Nazirliyinin təşkilatçılığı ilə İqtisadi İslahatların Təhlili və Kommunikasiya Mərkəzinin operatoru olduğu “Azexport” portalının rəhbəri elektron ticarət biliklərinin sahibkarlara çatdırılması məqsədilə Naxçıvan Biznes Mərkəzində görüş olub.
30-a yaxın sahibkarın iştirak etdiyi tədbirdə “Azexport” portalının rəhbəri Ayxan Qədəşov sahibkarlara bu resursun imkanlarına dair məlumat verərək onları əməkdaşlığa dəvət edib. O, portalın funksionallığı, Azərbaycan istehsalçıları barədə vahid məlumat bazasının işləmə prinsipi, eyni zamanda, portalın ixracatçılara təklif etdiyi əlavə imkanlardan bəhs edib, həmçinin Azexport.az-a inteqrasiya olunmuş milli və beynəlxalq ödəniş sistemləri, nəqliyyat və logistika xidmətləri, real rejimdə tərcümə xidməti və Azərbaycan məhsullarının beynəlxalq ticarət platformalarında yerləşdirmə imkanları barədə geniş məlumat verib.
Sonra mövzu ilə bağlı sahibkarlarla müzakirələr aparılıb.
Səbuhi HƏSƏNOV,
XQ-nin bölgə müxbiri
