Martın 11-də 11 ayın sultanı yurdumuza qədəm qoyur

Dünya müsəlmanlarının müqəddəs ayı Ramazanın gəlişi bu il xalqımız üçün xüsusilə əlamətdardır. Qurani-Kərimin ilk ayələrinin nazil olduğu bu mübarək ay özünün ali xilqətində Allaha təmənnasız ibadət, sosial ədalət və bərabərlik, bütün umu-küsülərin unudulması, imkansızlara əl tutulması kimi inanca və bəşəri dəyərlərə söykənir. 

İslamın beş əsas prinsipindən biri sayılan oruc bəndəni təkəbbür və şöhrətpərəstlikdən uzaqlaşdıran, birliyi, qardaşlığı təbliğ edən, onu iman və təqvaya yaxınlaşdıran iba­dətdir.

Peyğəmbərimiz hədislərin bi­rində deyir: “Oruc ibadəti insanın haramdan qorunması üçün bir im­tahandır, Allahın yaratdığına bəxş etdiyi iradəni gücləndirən, səbri və dəyanəti bütünləşdirən, arzu, ehtiras və nəfsin önünə qalxan kimi sədd çəkən vasitədir”.

Biz 2024-cü ildə Ramazanı əv­vəlki illərdən daha böyük qürur hissi ilə qarşılayırıq. Bu, Vətən müharibə­sində qazandığımız şanlı Zəfərin se­vinci, separatçı rejimin süqutundan, üçrəngli bayrağımızın otuz ildən bəri işğal altında olan torpaqlarımızda dalğalanmasından, kafir qonşuları­mız tərəfindən dağıdılmış və təhqir edilmiş məscidlərimizin bərpasından sonra oradan ucalan azan səsindən yaşadığımız hissdir. Bu Ramazan ayında məhz həmin qürurdan yoğ­rulmuş Qələbə sevincimizi xeyir-du­alarla yad edəcəyik.

Ramazanda oruc tutub, namaz qılmaq, Quran oxumaq, iftar süfrələ­ri açmaq, kimsəsizlərə, ahıl və qoca­lara əl tutmaq İlahi məqamda bəyə­nilən savab əməllərdəndir. 

Sabah Azərbaycanda Ramazan ayı başlanır. Martın 28-i və 30-u, ap­relin 1-i və 5-i Qədr gecələri, 10-11-i isə Ramazan bayramıdır. 

Allah dualarımızı, nəzir-niyazımı­zı qəbul eləsin.

XQ