...Onun haqqında demək olar ki, bütün sosial şəbəkələrdə yazılıb. Yazılıb ki, Zaqatala rayon sakini Rauf Ramazanov 17 ildir ki, məktəbə atla gedib-gəlir. Açığı, iş yoldaşım Əli Nəcəfxanlı mənə bunu deyəndə təəccübləndim və qərara gəldim ki, Zaqatalaya bu səfərimdə Raufla mütləq görüşüb tanış olum, qayğıları ilə maraqlanım.
Odur ki, Şəki–Zaqatala Regional Təhsil İdarəsinin Zaqatala üzrə sektorunun müdiri Kəmalə xanım Əhmədova ilə əlaqə saxlayıb Raufu soruşanda “Elədir ki, var, – dedi, – mən deyərəm, sizinlə əlaqə saxlayar”.
Aradan heç yarım saat keçməmiş Rauf Ramazanov zəng vurur. Vədələşirik. Danışırıq ki, sabah görüşək və məktəbə birlikdə gedək. “Ora axı siz nəylə gedəcəksiniz? Ya gərək at ola, ya da...” Sözünü kəsirəm: “Bəlkə bir at da mənə tapasan”. Cavabı qısa olur: “Olar”.
Səhərin açılmasını səbirsizliklə gözləyirəm. Qışın bu oğlan çağında Zaqatalanın havasının necə şaxtalı olmasını bir anlığa təsəvvür edin. Soyuq iliyə işləyir. Düşünürəm ki, mən vədələşdiyimiz yerə Raufdan tez gəlmişəm. Elə bu vaxt şəkillərdən tanıdığım Rauf və bir dostu at belində uzaqdan görünürlər. Atlardan düşürlər. Tanış oluruq.
– Dostumdur, – deyir, – Səfər Baharov da bizim kənddəndir, Yuxarı Çardaxlardan. Təsərrüfat adamıdır. Xahiş elədim ki, atını bizə müvəqqəti kirayəyə versin.
Üzümüzə təbəssüm qonur. Sonra Rauf müəllim uzaqdan boy göstərən qülləni göstərir:
– Bax, o qüllənin yanına gedəcəyik. Ora Sabunçu kəndidir. Əvvəllər köhnə məktəbi vardı. 2012-ci ildə yenisini tikiblər. Hər cür şəraiti var. Özünüz görəcəksiniz.
...Bax, beləcə, mən də Səfərin atına minirəm. Birlikdə gah Sabunçu çayının qırağı ilə, gah da içi ilə kəndə doğru gedirik. Yol boyu söhbət edirik. Daha yaxından tanış oluruq.
Rauf müəllim deyir ki, 2007-ci ildə Şəki Pedaqoji məktəbini bitirib. Təyinatla bu məktəbə idman müəllimi göndərilib. O vaxtdan burada işləyir. Hər həftənin 2 günü dərsi olur. O, 2 uşaq atasıdır. Qızı 6-cı, oğlu isə 3-cü sinifdə oxuyur.
– Mən özüm Yuxarı Çardaxlar kəndindənəm, – deyir. – İnanın ki, bu yolu gedib-gəlmək mənə xüsusi ləzzət verir. Görürsünüz də, nə gözəl hava var. Tez-tez dərindən nəfəs alın. Adam yüngülləşir. Düzdür, dəfələrlə təhlükə ilə üzləşmişəm. Sürətlə axan çay hətta atı yıxıb da... Qarşıma canavar da çıxıb. Amma yenə də çəkinməmişəm. Gəlib məndən müsahibə alanlara da belə demişəm və bir də xahişim o olub ki, heç nəyi şişirtməsinlər, nə var, onu yazsınlar. Hələ eləsi olub ki, nəinki kəndin, hətta mənim öz adımı belə səhv yazıb.
Nəhayət, gəlib məktəbə çatdıq. Şagirdlər müəllimlərini sevinclə qarşıladılar. Mən bir daha müəllim-şagird mehribanlığının və səmimiyyətinin şahidi oldum.
Dərs qurtarandan sonra geri qayıdırıq. Rauf Ramazanov dillənir:
– Sizdən nə gizlədim. Bəzən axşam oturub fikirləşmişəm ki, səhər gedib müraciət edəcəyəm, deyəcəyəm ki, yorulmuşam. Bəlkə, mənim yerimi öz kəndimizə dəyişəsiniz? Amma səhər fikrimdən çəkinmişəm. Dərs dediyim uşaqların mehriban çöhrəsi gəlib durub gözümün qarşısında. Getməmişəm. Elə bilmişəm ki, o uşaqlara xəyanət etmiş olaram.
İlqar HƏSƏNOV,
“XQ”nin bölgə müxbiri
Zaqatala