Birinci nəğmə

Mən ölkənin ikinci ən böyük şəhə­ri olan Gəncədə doğulub böyümüşəm. Orta təhsili də orada almışam. O vaxtlar tay-tuşlarım, dostlarım Bakını – paytaxtı görməyə tələsəndə, mənim ürəyim Min­gəçevirlə döyünürdü. Yaşayış yeri kimi üç-dörd min illik tarixi olsa da, xəritəmiz­də nisbətən yeni olan bu şəhəri mənə Səməd Vurğunun “Muğan” poeması sevdirmişdi. Poemanı nəğmə-nəğmə, sətir-sətir əzbər bilirdim. Mən Mingəçeviri görməyi necə arzuladığını, indi deyə bil­mirəm. 

Deyə bildiyim isə odur ki, uzun illər sonra bölgə müxbiri kimi ən çox söz aç­dığım şəhər məhz Mingəçevir olub. Mən bu şəhərin işıqlarını da sevmişəm, adam­larını da. Gecəsini də vəsf eləmişəm, gündüzünü də. Alimini, ziyalısını da yazı qəhrəmanına çevirmişəm, küçələrdə tə­mizlik işlərinə baxan sadə insanını da. Şəhər rəhbərliyi ilə görüşlərimi də səmi­miyyətlə qələmə almışam, xiyabandakı yaşıllıqları sulayan bağbanla söhbətimi də. Ona görə işıqları və adamları yada salıram ki, Mingəçevir mənim “Gecə re­portajı” hazırladığım ilk və hələlik yeganə şəhər olub. Üstəlik, həmin yazıya görə həmkarlarımın çoxsaylı xoş sözlərini də eşitmişəm. 

Yaxşı bilirik ki, Kür şayı ölkəmizə Qa­zax rayonunun ərazisindən daxil olur, Salyanda Xəzərlə qovuşanadək çox əra­zilərimizdən keçir. Həmin ərazilərin ha­mısında Kürlə salamlaşmışam – desəm, ifrata varmaram. Amma, nədənsə, mən bu çayın səsinə Mingəçevirdə daha çox vuruluram. Səməd Vurğun demiş: 

Kiçicik bir sudur yer üzündə Kür,

Baxsan bu dünyanın xəritəsinə.

Bəs niyə qəlbimdə ümman döyünür,

Mən qulaq asdıqca Kürün səsinə?

İkinci nəğmə

Bəli, Mingəçevirdə belə bir park var. Bu şəhərə hər gələndə tez-tez həmin ün­vana baş çəkməyi özümə borc bilirəm. Belə parkın yaradılması qədirbilənlik əlamətidir və hamıda məmnunluq yara­dır. Mən isə ona da məmnunam ki, ya­radılmasının 65 və 70 illik yubileylərində yazı hazırladığım Mingəçevirin 75 illiyini də bu şəhərin sakinləri və qurucularının bəziləri ilə birlikdə qeyd edirik. 

Ulu öndər Heydər Əliyevin “Halal in­sanlar şəhəri” adlandırdığı Mingəçevirin qurucuları bu şəhərdə daim hörmət və ehtiramla yad edilirlər. Vaxtilə bir yazıda qeyd etmişdim ki, 1948-1955-ci illərdə Mingəçevirdə aparılan inşaat – qurucu­luq işlərinə rəhbərlik etmiş İslam İslam­zadənin, eləcə də şəhərin salınmasında onunla çiyin-çiyinə çalışaraq Mingəçe­virin şərəfli tarixini yazmış əmək qəhrə­manları Qafar Xəlilov, Bəhlul Bayramov, Sarvan Salmanov, İsa Salahov, Qəşəm İsmayılov, Rəsul Balakişiyev, Məhərrəm Dadaşov, Qriqori Kuzmin, İvan Kiyasko, Əhmədfərid Əfəndiyev kimi insanların — şəhərin ilk qurucularının əziz xatirəsini əbədiləşdirmək, eyni zamanda, sıraları ildən-ilə seyrəlməkdə olan veteranlara diqqət və qayğı göstərmək məqsədilə şəhər icra hakimiyyətinin təşəbbüsü ilə “İlk qurucular parkı” yaradılıb. 

“İlk qurucular parkı”nda görüşüb söh­bət etdiyim Ağagül dayı da həmin qəh­rəmanlardandır. Maraqlı həmsöhbətdir. Şəhərin təməlinin qoyulduğu illərdə fəh­lə və mühəndislərin yaşadığı müvəqqəti baraklardan, ölkənin hər yerindən gəl­miş mütəxəssislərin vahid amala xidmət edərək “çəkici eyni zindana vurmasın­dan”, nəhayət, Kürün ram edilməsindən, xəritəmizə yeni şəhərin düşməsindən həvəslə danışır. 

1948-ci ildə Qərbi Azərbaycandan deportasiya olunublar. Xaldana köçüblər. 1948-ci ildə Mingəçevirdə quruculuq iş­ləri başlayanda əvvəlcə iki qardaşı bura gəlib. Beton zavodunda işləyib. Ağagül Əliyev armatur istehsal edən sexdə ça­lışıb. Söhbət düşəndə həmişə iftixarla danışır. Deyir ki, hər dəfə gözümüzün qarşısında tikilən bu evlərin yanından keçəndə bəzən divarlara əlimi sürtürəm. Oğul, qəribə hissdir, – deyir. – Elə bilirəm bu evlərin hamısında mənim barmaq iz­lərim var.

Adil İsmayılov isə energetikdir. Şə­kinin Qaradağlı kəndində doğulub. Neft və Kimya İnstitutunu bitirib. 1981-ci ildə təyinatla Mingəçevirə gəlib. İstilik Elektrik Stansiyasında mühəndis kimi fəaliyyətə başlayıb.

Mingəçevirdə – energetiklər şəhərin­də görülən işlərdən danışanda qulaq as­maqdan doymaq bilmirsən ki, bilmirsən:

– Düzdür, Mingəçevirin qurucuları həmişə hörmətlə xatırlanmalı, yad edil­məlidir, – deyir. – Allah hamısına rəhmət eləsin. Şəhərin ayrı-ayrı vaxtlarında rəh­bərlik edənlərin də əməyini qiymətləndir­mək lazımdır. Amma, mənim səmimiy­yətimə inanın. Mingəçevirin ən böyük qurucusu ulu öndər Heydər Əliyevdir, desək –yanılmarıq.

Adil İsmayılov o qədər maraqlı faktlar danışır ki, söhbətdən doymursan. 

Əziz oxucu, sənə söz verirəm ki, bir gün Adil müəllimin danışdıqlarını kağıza köçürüb, olduğu kimi sizə təqdim edə­cəm. Necə möhtəşəm işlərin görüldüyü­nün şahidi olacaqsınız.

Üçüncü nəğmə

Elə buradaca, Mingəçevirin indiki sə­viyyəyə çatmasında ulu öndər Heydər Əliyevin göstərdiyi müstəsna xidmətlərini əks etdirən bəzi faktları biz də sadalayaq. 

Sirr deyildir ki, “1969-cu ildə – Ulu öndər Heydər Əliyevin ölkəmizdə siyasi rəhbərliyə gəldiyi dövrdə Mingəçevir ki­çik bir qəsəbəni xatırladırdı. Məhz onun rəhbərliyi illərində şəhər sürətlə inkişaf edərək ölkənin ən iri sənaye və energeti­ka mərkəzlərindən birinə çevrilib. 

1969-1982-ci illərdə Mingəçevirdə Azərbaycan İstilik Elektrik Stansiyası, Texniki-rezin məmulatları, Yol-tikinti ma­şınları təmiri, Aqrar-sənaye, dəmir-beton məmulatları və Çörək zavodları, Poliq­rafiya müəssisəsi, evtikmə kombinatla­rı inşa olunub. Bu illərdə şəhərdə 8130 şagird yerlik 8 orta ümumtəhsil məktəbi, 2240 yerlik 8 məktəbəqədər uşaq müəs­sisəsi, 1848 çarpayılıq xəstəxana, Polik­linika, Şahmat məktəbi, Gənc texniklər stansiyası və digər obyektlər tikilib istifa­dəyə verilib...

Şəhər icra hakimiyyətinin başçısı İlham İsmayılov bütün bunlar barədə həvəslə danışır. Bildirir ki, həmin dövrdə Energetiklər qəsəbəsində 20 minə yaxın əhalinin məskunlaşması üçün çoxmərtə­bəli yaşayış binaları, 3 ümumtəhsil mək­təbi, doğum evi, poliklinika, Tibb Məktəbi, Musiqi Məktəbi, uşaq bağçaları və digər sosial obyektlər tikilib. Yaradılan sənaye potensialı nəticəsində Mingəçevir res­publikanın dördüncü sənaye şəhərinə çevrilib. İndi fərəhlə qeyd edə bilərik ki, ümummilli liderimizin başladığı işlər bu gün də onun siyasi kursunun layiqli davamçısı, cənab Prezidentimiz İlham Əliyev tərəfindən çox böyük peşəkarlıq və uğurla davam etdirilir.

Dördüncü nəğmə

Nə xoşdur ki, bu şəhərin yubile­yi Azərbaycanda böyük məmnunluqla qeyd edilən “Heydər Əliyev ili”nə dü­şür. Biz məmnunuq ki, bu 75 illik cənab İlham Əliyevin ölkədə ilk dəfə prezident seçilməsinin 20 illiyinə təsadüf edir. Bu yubileyin qeyd olunduğu 2023-cü il Azər­baycan tarixinə ölkəmizin suverenliyinin tam təmin edilməsi ilə yazılıb. Bu il Azər­baycan Prezidenti otuz il əlimiz çatmayan şəhər və rayonlarımızda da bayrağımızı ucaltdı, “Xalq qəzeti”nin yazdığı kimi, “bayraqların paradı”nın şahidi olduq. Bu il Azərbaycan beynəlxalq aləmdəki bütün bədxahlarının məkrli planlarını pozaraq, öz qətiyyətini və siyasi iradəsini diktə elə­di. Bəli, bu il Azərbaycanın dördüncü bö­yük şəhəri olan Mingəçevirin 75 yaşı ta­mam olur. Mən də məmnunam ki, doğma Mingəçevirin 70 illiyi münasibətiylə də bir neçə yazı qələmə almışam və həmin yu­biley tədbirlərində iştirak etmişəm. 

Beşinci nəğmə

Prezident İlham Əliyevin imzaladığı Regionların sosial-iqtisadi inkişafına dair dövlət proqramlarında nəzərdə tutulan müddəalar ölkəmizin hər yerində olduğu kimi, Mingəçevirdə də müvəffəqiyyətlə həyata keçirilib. Bütün bunların nəticə­sində “Nur şəhəri” sürətlə inkişaf edərək, günü-gündən öz gözəlliyini, füsunkarlı­ğını artırmaqdadır. Bu gün Mingəçevirdə iri istehsal müəssisələri, yeni mədəniy­yət, ictimai və sosial obyektlər, park və istirahət mərkəzləri, məcburi köçkünlər üçün qəsəbələr, şəhid ailələri və Qarabağ əlilləri üçün yaşayış binaları, nümunəvi xidmət və ticarət obyektləri tikilib istifa­dəyə verilib. Ötən müddət ərzində ölkə Prezidentinin diqqət və qayğısı sayəsin­də 9 məktəb, 4 uşaq bağçası əsaslı şə­kildə təmir edilib, 14 nömrəli orta mək­təbin əsaslı təmiri başa çatmaq üzrədir. H.Əliyev Fondu tərəfindən 120 yerlik uşaq bağçası tikilib istifadəyə verilib. Bundan əlavə bir özəl uşaq bağçası tikilib. 

Mingəçevirin tərəqqisini göstərən başqa faktlara da nəzər salaq. Şəhə­rin ən gözəl məkanlarından birində Ulu öndərin möhtəşəm abidəsi ucal­dılıb və ən yüksək standartlara uyğun əzəmətli Heydər Əliyev Mərkəzi, Gənclər evi tikilib istifadəyə verilib. Şəhərin bütün küçələrində, Mingəçevir kəndi, Tərəvəz­çilik sovxozu və Günəşli yaşayış mas­sivlərində abadlaşdırma, yaşıllaşdırma işləri görülüb, səliqə-sahman bərpa olu­nub, yüzlərlə binanın fasadı, dam örtüyü, ümumi istifadə yerləri tam müasir forma­da əsaslı surətdə təmir edilib. Əhalinin is­tirahəti üçün 10-a yaxın park və istirahət mərkəzləri salınıb, “1941-1945” Abidə kompleksinə yeni görkəm verilib. Min­gəçevir Dövlət Dram Teatrı, şəhər stadi­onu əsaslı təmir edilib şəhər sakinlərinin ixtiyarına verilib, Heydər Əliyev parkı, Heydər Əliyev prospekti boyu xiyaban­lar və Teatr meydanı yenidən qurulub. Hazırda şəhərin su-kanalizasiya və istilik sistemi dövlət proqramına uyğun olaraq, yenidən qurulur. 

Prezidentliyi dövründə yeddi dəfə Mingəçevirin qonağı olan cənab İlham Əliyev burada bir sıra müəssisələrin – “Kür elektron avadanlıqları zavodu”, “İnterenerji beton dayaqları”, “İzolit” ASC-lərin ,”Kür” Olimpiya Tədris İdman Mərkəzinin, Şahmat məktəbinin, YAP şəhər təşkilatının inzibati binasının, Heydər Əliyev Mərkəzinin, Gənclər Evi­nin, Dövlət Bayrağı meydanının, “Günəş­li” bağ massivinə çəkilən qaz xəttinin, Xaldan – Mingəçevir yolunun, Mingə­çevir Sənaye Parkının, “Asan Həyat” kompleksinin, Sutəmizləyici qurğunun, Mingəçevir Avtomatik İdarəetmə və Nə­zarət Mərkəzinin açılışlarını edib. Dövlər başçısının hər gəlişi ilə bağlı şəhərdə so­sial-iqtisadi inkişaf, yeni iş yerlərinin açıl­ması, abadlıq-quruculuq işləri vüsət alıb. Prezident İlham Əliyev Mingəçevir barə­də 9 sərəncam imzalayıb, 36 milyon ma­nat vəsait ayırıb. Ayrılan bütün vəsaitlər şəhərin inkişaf etdirilməsinə yönəldilib.

Bu məqamda cənab Prezidentin Min­gəçevir haqqında söylədiyi fikirləri də yada salmaq yerinə düşərdi: “Mingəçevir çox müasir, gözəl şəhərə çevrilibdir. Ar­tıq Mingəçevir təkcə energetiklər şəhə­ri deyil, sənaye şəhəridir, mədəniyyət mərkəzidir… Şəhər tamamilə müasirlə­şib, gözəlləşib, böyük abadlıq-quruculuq işləri aparılır, xiyabanlar, parklar salınır, binalar təmir olunur”.

Altıncı nəğmə

Bu il fevralın 13-də Mingəçevirdə müstəqillik dövrümüzün ən böyük İstilik Elektrik Stansiyasının təməlqoyma mə­rasimi keçirilib. Tədbirdə geniş nitq söy­ləyən Prezident İlham Əliyev xatırladıb ki, Mingəçevir şəhərində təməli qoyulan yeni 1280 meqavat gücündə elektrik stansiyasının açılışı 2025-ci ildə olacaq: 

“İndi Mingəçevir şəhərinin Azərbay­canın və nəinki Azərbaycanın, bütün Qafqazın elektroenergetika mərkəzi kimi yeni dövrü başlayır, təxminən 1300 meqavat gücündə olan stansiya, əlbəttə ki, bizim potensialımızı böyük dərəcədə gücləndirəcək. Bu, Azərbaycanın enerji təhlükəsizliyinə verilən növbəti töhfə ola­caq, yüzlərlə yeni iş yerləri yaranacaq və beləliklə, Azərbaycan öz imkanlarından tam istifadə edərək həm daxili tələbatı ödəyəcək, eyni zamanda, həm elektro­energetika, həm də təbii qaz sahəsində daha böyük addımlar atacaq. Çünki yeni tikiləcək stansiyada şərti yanacağın sər­fiyyatı kifayət qədər aşağıdır və bu, imkan verəcək ki, ildə təqribən 800 milyon kub­metr və ya 1 milyard kubmetr qaza qə­naət edilsin. Bu gün Avropa məkanında Azərbaycan qazına böyük tələbat olduğu üçün bu, eyni zamanda, Avropanın enerji təhlükəsizliyinə növbəti töhfə olacaqdır”.

Yeddinci nəğmə

İkinci Qarabağ müharibəsi Mingəçe­virin tarixinə həm şəhərimizin 50 şəhid verməsi ilə – hətta, bir ananın iki oğlu şəhid olub – həm çoxsaylı qaziləri ilə, həm də düşmənin raket atəşlərinə məruz qalması ilə yazılıb. Gənclərin həmin qəh­rəmanlığı, rəşadəti haqqında bu gün hər bir mingəçevirli qürurla danışır. 

Ona görə də, şəhərdə şəhid ailələrinə və Qarabağ əlillərinə göstərilən diqqət və qayğı davamlı xarakter daşıyır. Belə ki, uzun illər mənzil almaq növbəsində da­yanan bu qəbildən olan insanlar üçün 72 mənzilli yeni yaşayış binası tikilib is­tifadəyə verilmək üzrədir. Mənzil növbə­sində dayanan şəhid ailələri və Qarabağ əlillərinin say çoxluğunu nəzərə alaraq, daha bir binanın tikintisi məqsədi ilə tor­paq sahəsi ayrılıb, hazırlıq işləri görülür. Elə bir ay olmur ki, şəhərin məsul şəxs­ləri həmin zümrələrdən olan ailələrlə görüşüb, onların problemlərinin həllinə çalışmasınlar.

Aradan xeyli vaxt keçsə də 44 gün­lük müharibədə iki oğlunu itirən Sevinc xanımla olan söhbətimi heç vaxt yadım­dan çıxara bilmərəm ki, bilmərəm: “Bəs qohum-əqrabadan niyə gəlib yanınızda qalmırlar. Tək yaşamaq çətin deyil?” Su­alımıza Sevinc ana belə cavab vermişdi: “Gəlib, qalmaq istəyən çoxdur. Özüm istəmirəm. Adam olanda balalarımla ra­hat danışa bilmirəm”. – Bu da müharibə­nin ilk günü iki oğlunu – Əlisini və İslamı­nı itirən ananın mənə cavabı. 

Səkkizinci nəğmə

44 günlük İkinci Qarabağ müharibəsi günlərində Azərbaycan Ordusunun qar­şısında aciz qaldığını görən İrəvan rəh­bərliyi bir neçə gecə həm Gəncəni, həm də Mingəçeviri raket atəşinə tuturdular. 2020-ci il oktyabrın 11-də ölkənin kütləvi informasiya vasitələri yazırdılar ki, ermə­nilərin Mingəçevirə hücumları Azərbay­canın Hərbi Hava Hücumundan Müdafiə Qüvvələri tərəfindən dəf edilib: 

“Düşmənin silahlı qüvvələri oktyabrın 11-də gecə saat 04.00 radələrində Cənu­bi Qafqazın ən böyük istilik elektrik stan­siyası olan Mingəçevir Su Elektrik Stansi­yasını hədəfə almaqla cəbhə zonasından 100 kilometrdən artıq məsafədə yerləşən iri sənaye şəhəri Mingəçevirə raket­lər atıb. Raketlər Azərbaycan Ordusu­nun Hərbi Hava Hücumundan Müdafiə Qüvvələri tərəfindən zərərsizləşdirilib.” Bu barədə Baş Prokurorluğun məlu­matında deyilir...Oktyabrın 11-də səhər saatlarında Azərbaycan HHM qüvvələri Mingəçevir istiqamətində uçuşlar həyata keçirməyə cəhd edən Ermənistana məx­sus pilotsuz uçuş aparatını məhv ediblər.

Doqquzuncu nəğmə 

Gənc sənaye şəhəri olan Mingəçe­virin əsası XX əsrin 40-cı illərinin axırla­rında – 50-ci illərin əvvəllərində qoyulsa da, Mingəçevir yaşayış məskəninin adı çəkilən mənbələrin tarixi min illərlə ölçü­lür. Türk alimləri “Mingəçevir” sözünü türk mənşəli Mingəçöhr adlı sərkərdənin adı ilə əlaqələndirirlər. Akademik Ziya Bün­yadov 4500 ildən çox tarixə malik olan bu yerin mənasını elmi cəhətdən belə izah edib: – “Bu ad 839-cu ildə yaşamış və xilafətə qarşı mübarizə aparmış Min­gəçöhr El-Ferqaninin adı ilə bağlıdır”. Bu ərazidə yaşayış hələ eramızdan əvvəl III minillikdə mövcud olub. Arxeoloji qazıntı­lar sübut edir ki, burada yaşayan insanlar böyük mədəniyyətə malik olublar.

Bir neçə il bundan əvvəl qəzetimizdə Mingəçevir haqqında məqalə yazmış­dım. Redaksiyaya zəng gəldi. Dəstəyin o biri başında cavan səsli bir oğlan özünü təqdim etdi:

– Etibar Əhmədovam, Mingəçevir­dən zəng vurmuşam. Yazını oxudum. Xoşuma gəldi. Amma, narazı da qaldım. Mingəçevir haqqında yazıb, onun qədim tarixini qeyd etməmək, Mingəçevir kəndi barədə söz deməmək, məncə, düzgün deyil.

Haqlı iradı qəbul etdim. Söz verdim ki, bu dəfə Mingəçevirə gedəndə mütləq həmin kəndə baş çəkəcəm, onun sakin­ləri ilə həmsöhbət olacam. Danışdığımız kimi, getdim, bu kəndin ləyaqətli, səmimi insanlarının qonağı odum. Xeyli söhbət etdik. Bakıya qayıdıb, Mingəçevirin qə­dim tarixi və bu gün orada yaşayan in­sanlar haqqında yazı hazırladım. Yazının sərlövhəsi belə idi: “Mingəçevir – kəndim, kəsəyim mənim”.

Odur ki, bugünkü yazıda da qısa da olsa şəhərin qədim tarixini qeyd etməsək, kimlərinsə qəlbinə dəyə belərik.

Onuncu nəğmə

Mingəçevirin tikintisində fəal işti­rak edən Sosialist Əməyi Qəhrəmanı, Azərbaycanın fəxri energetiki Sarvan Salmanovu da xüsusi xatırlamasaq in­safsızlıq olardı. O, 1927-ci ildə İsmayıllı rayonunun Zoğallıq kəndində dünyaya gəlib, 2003-cü ildə isə doğma şəhəri Min­gəçevirdə vəfat edib. Əmək fəaliyyətinə 1945-ci ildə Mingəçevir Su Elektrik Stan­siyasının tikintisində başlayıb və bura­da müxtəlif vəzifələrdə çalışıb. İki dəfə Lenin ordeni və medallarla təltif edilmiş bu əmək qəhrəmanının obrazı Xalq şairi Səməd Vurğunun “Muğan” poemasında xüsusi qeyd edilib. 

Poemanın “Mingəçevir qəhrəmanı” adlı on birinci nəğməsində oxuyuruq: 

Car çəkir çarxların çaxnaşıq səsi,

Car çəkir, qışqırır nəhəng motorlar.

Qızır baltaların polad pəncəsi,

İldırım, ildırım vurur Bozdağı.

O daşlı, qumsallı, gilli torpağı

Udur, lay-lay udur ekskavatorlar.

Hay salır, qışqırır nəhəng motorlar.

Və ya...

Bu səs mənim Sarvanımın, 

Sarvanımın səsidir, bax...

O nəfəsi səndən aldı,

Ana torpaq, ana torpaq.

On birinci nəğmə

Əslində, mən bu qəbildən olan ifa­dələri pafos adlandırır və onlardan heç bir yazıda istifadə etmirəm. Amma son beş ildə bu şəhərə rəhbərlik edən, bütün həyatı Mingəçevirə bağlı olan, burada kiçik vəzifədən tutmuş ta şəhər icra ha­kimiyyətinin başçısı kimi məsul vəzifəyə­dək – mərhələ-mərhələ ucalan İlham İsmayılova sakinlərin inam və etimadı­nı görəndə bu sözdən istifadə etməyi məqsədəuyğun saydım. 

İlham müəllim beş ildir ki, bu şəhərə rəhbərlik edir. Amma otuz ildən çoxdur ki, Mingəçevirin abadlaşdırılmasında, inkişafında, sakinlərin problemlərinin həllində heç nəyi diqqətdən kənarda qoymayıb. Onunla birlikdə şəhid ailələri­nin evində olmuşam, əhali ilə saysız-he­sabsız görüşlərdə iştirak etmişəm. Hara getmişiksə, onu hamı öz doğması kimi qarşılayıb, sərbəst sözünü, fikrini deyib. Biliblər ki, heç kəsin qayğısı diqqətdən yayınmayacaq.

On ikinci nəğmə

Dünya xəritəsinə baxanda çayların yarıya böldüyü şəhərlər çoxdur. Hələ məktəb illərindən bilirdik ki, London, Bu­dapeşt, Moskva, Sankt-Peterburq, Paris, Bağdad, Tbilisi və onlarca digər şəhərin mərkəzindən nəhəng çaylar axıb keçir. O zaman mən dəfələrlə düşünmüşdüm ki, bəs o sırada Mingəçevirin adı nə üçün yoxdur? 

Nə yaxşı ki, cənab Prezident 2015-ci ildə Azərbaycanda Birinci Avropa Oyun­larının keçirilməsinə nail oldu. Mingə­çevirdəki “Kür” Olimpiya Tədris-İdman Mərkəzində – mütəxəssislərin fikrincə, MDB məkanında bu mərkəzin bənzəri yoxdur – keçirilən akademik avarçək­mə, kanoe və kayak idman yarışları keçirilməsi Avropada bizim Mingəçeviri də tanıtdı. Hamı gördü ki, mərkəzindən kükrəyən çayların axdığı şəhərlərdən biri də Mingəçevirdir. 

Epiloq

Məktəb illərində bir dəfə müəllimdən soruşmuşdum ki, bu poemada söhbət əsasən Mingəçevir Su Anbarının tikil­məsindən və bu şəhərin salınmasından gedirsə, nə üçün əsərin adı “Muğan”dır? Müəllim demişdi ki, şair o bəndin, həmin su anbarının əsrlər boyu suya həsrət qal­mış, ilanlar mələşən Muğan düzünə hə­yat gətirəcəyini nəzərdə tutmuşdu. 

Mingəçevir, həqiqətən, Muğana hə­yat, Azərbaycanın hər yerinə isə işıq, “nur” gətirib. Həmin həyatın da, nurun da, elə Mingəçevirin özünün də 75 yaşı mübarək olsun!

İlqar HƏSƏNOV,
“XQ”nin bölgə müxbiri