Əmək və Əhalinin Sosial Müdafiəsi Nazirliyinin İctimaiyyətlə Əlaqələr və kommunikasiya şöbəsindən XQ-yə verilən son məlumatda bildirilir:
Tibbi-Sosial Ekspertiza və Reabilitasiya Agentliyi tərəfindən bu ilin yanvar–sentyabr aylarında 36 min 900 şəxsə əlillik təyin edilib.
Onlardan 18 min 200 nəfərinə ilkin, 18 min 700 şəxsə isə təkrar əlillik təyinatı aparılıb. Əlillik təyinatından sonra e-sistem üzərindən həmin şəxslərə əlilliyə görə proaktiv qaydada sosial ödənişlər təyin olunub. Qeyd olunan dövrdə agentliyin müəssisələrində 60 min şəxsə reabilitasiya xidmətləri göstərilib.
***
9 ayda DOST mərkəzlərində 518 min vətəndaşa xidmət göstərilib, məmnunluq səviyyəsi 98,2 faiz təşkil edib.
DOST mərkəzləri şəbəkəsinin genişləndirilməsi istiqamətində növbəti addım olaraq bu il avqustun 7-də Prezident İlham Əliyevin iştirakı ilə Bərdədə Qarabağ Regional DOST mərkəzinin açılışı olub. Beləliklə, bu mərkəzlərin sayı 7-ə çatıb. DOST konsepsiyası əsasında 159 sosial xidmət “bir pəncərə”dən, müasir və çevik, şəffaf mexanizmlərlə, vətəndaş rahatlığı və məmnunluğuna uyğun təqdim olunur. “Könüllü DOST” proqramına isə bu ilin 9 ayında 20 min 800-ə yaxın müraciət olub və proqrama daha 1123 nəfər cəlb edilib.
***
Məşğulluq imkanlarının artırılması, qeyri-rəsmi məşğulluğun leqallaşdırılması istiqamətində görülən kompleks tədbirlər bu il də əmək müqavilələrinin sayında artıma imkan verib.
2023-cü ilin yanvar–sentyabr aylarında ölkəmizdə əmək müqavilələrinin sayı ilin əvvəlinə nisbətən 24 min müqavilə və ya 1,4 faiz artaraq 1 milyon 770 minə çatıb. Əməkhaqqı islahatları, əmək müqavilələrinin sayında artım əməkhaqqı fondunda da davamlı artımla nəticələnir. 9 ayda əməkhaqqı fondunda daha 12 faiz artım olub. Ümumilikdə, son 5 ildə əmək müqavilələrinin sayında 35 faiz, əməkhaqqı fondunda 2,6 dəfə artım baş verib.
Z.HÜSEYNOVA
XQ